«Хъунмур нигьачIаву тIабиаьтраясса дакъарча, за къакIулсса проектчитураясса дур»

ХIакьинусса кьини дуллай бур 12-15-20 зивулийсса къатри. 1970 шинал Дагъусттаннай хьусса аьрщи сукку шавугу дакIнийну, жун пикри хьунни цIухху-ккакку буван Дагъусттаннайгу, 

респуб­ликалул дазул кьатIувгу цIа дурксса строитель, аьлимчу «Сейсмостойкие конструкции» НПП-лул директор Шяпинал арс Гьарун Аминтаевлущал.

---

Гьарун Аминтаев увссар МахIачкъалалив, цIа дурксса строитель, «Дагпроект» тIисса идаралул ва «Дагестанстрой» трестрал каялувчи Гъумучатусса Шяпи Аминтаевлул кулпатраву. Ванал бувккуссар Ленинградуллал инженер-строительствалул институт, «Сейсмическое строительство» тIисса сянатрал аспирантура. Зий ивкIссар МахIачкъалалив «Горстрой» трестрай, ДГУ-лул строительствалул факультетрай дарсру дихьлай, «Дагестангражданпроект» институтрал хъунама конструкторну, Кучеренкол цIанийсса Ухссавнил Ккавкказуллал ЦНИИСК-рал филиалданул каялувчину.

ЦIанасса ппурттуву, НПП-лул директор акъасса, Гьарун ур Аьрасатнал Минстройрал сертификациялул технический комитетрал экспертну. Ва хъанахъиссар мукуна Аьрасатнал Архитектуралул ва строительствалул элмурдал академиялул сейсмологиялул ва сейсмостойкий строительствалул Элмийсса советрал член.

---

-1970 шинал Дагъус­ттаннай аьрщи сукку хьу­сса чIумал Москавлия бувкIсса пишакартурал увкуну бур жучIара 5 зивулияр лахъсса къатри дуллан къабучIиссар куну. Утти бучIиссарив?
-Жу та чIумал Москавуллал, Гуржиял ва Къазахъисттаннал пишакартуращал цачIуну аьрщи сукку шаврил биян бувсса зараллал инженерсса анализру дуллай буссияв. Бюхъайссар тайннал увкуну бикIан 5 зивулияр бюхттулсса къатри калпушрал ва чарил къадуван, куну. Муния махъ хьусса аьрщи сукку шавурттал чIалачIи бунни мукунсса къатри, лекъакьарчагу, яла дакьин дуван къашайсса душиву, мунияту ми лекьан дуван багьайссар.
[pullquote]Яла цIакьми къатри хъанахъиссар монолитсса железобетондалул чIиртту буми. Миннул лахъишиву дикIан аьркинссар укунсса: аьрщи су­кку шаврил 7 балл шай­сса кIанттай 24 зивулийсса, 8 балл шай­сса бухьурча – 20 зивулийсса ва 9 балл шай­сса кIанай 16 зивулул лахъшиврийсса.[/pullquote]
ХIакьинусса кьини калпушраяту ва жулва кьувкьу чарттаяту (Дарбантуллал ва Ахъушиял) лапра лахъсса къатри дуллан къабучIи бувну бур: 7 балл шайсса кIанай 4 зивулийсса, 8 балл шайсса кIанай 3 зивулий­сса ва 9 балл шайсса кIанттурдай анжагъ 2 зивулийсса къатри дан бучIи бувну бур. Шиккува учин, бутовый чарил къатри дуллангу аьрщи сукку шайсса кIанттурдай къабучIиссар.

-БучIиссарив 9 зивулий­сса къатри дуллан?
-ХьхьичIра жучIара дуллай бивкIссар 5-9 зивулийсса хъунисса панеллал къатри. Мукун­сса къатри дуллан бучIиссар, цанчирча экспериментру буллалисса тамансса хъиривлаявур­тту, ахттар бавуртту дурну, кIул хьуну бур хъуни панеллал къат­ри аьрщи сукку шаврия мюхчансса дикIайшиву.

-ЦIана дуллай бур 16-20 зивулийсса къатригу. Аьрщи сукку хьурча, минул ахир цукунсса хьун бюхъайссар?
-Дагъусттаннал шагьрурдай чIярузивурду дусса (9-16 зивулийсса) къатри дуллай бур ттизаманнул технологиялий. Ми дур хъунмурчIин монолитсса железобетондалул къат­ри. Микку хъунмур нигьачIаву тIабиаьтраясса дакъарча, за къакIулсса проектчитурая ва экспертътураяр.
ХIасил, яла цIакьми къатри хъанахъиссар монолитсса железобетондалул чIиртту буми.

[pullquote]ХIакьинусса кьини калпушраяту ва жулва кьувкьу чар­ттаяту (Дарбантуллал ва Ахъушиял) лап­ра лахъсса къатри дуллан къабучIи бувну бур: 7 балл шайсса кIанай 4 зивулийсса, 8 балл шайсса кIанай 3 зивулий­сса ва 9 балл шайсса кIанттурдай анжагъ 2 зивулийсса къатри дан бучIи бувну бур.[/pullquote]

Миннул лахъишиву дикIан аьркинссар укунсса: аьрщи сукку шаврил 7 балл шайсса кIанттай 24 зивулийсса, 8 балл шайсса бухьурча – 20 зивулийсса ва 9 балл шайсса кIанай 16 зивулул лахъшиврийсса.
Аьркинссар так, тIайлану проектгу хIадур дурну, къатта буван багьайсса даражалий.

-МахIачкъалалив сайки 400 чIярузивурду дусса къатта закондалий бакъа бувну бур тIий, бувсунни республикалул каялувчинал. Утти ми къатрал мюхчаншиву ххал дигьин Москавлия пишакартал бучIантIиссар тIий бур. Му тIайлассарив?
-Ттун му хавар къабавунни.
-Жулва кIанттул пишакартураща къашайссарив ми къатри ххал дигьин мюхчаншиврул чулуха?
-Шайссарча, амма цаймигу бур федерал ведомстварттал вакилтал хIала-гьурттуну бакъа чулийн буккан буван къахьун­сса масъалартту.
Масалдаран, газопроводир­ттал трасса-ххуллурдай къатри даву, муххал ххуллучIан лапра гъанну, Каспий хьхьиричIан гъанну къатри даву.

-Агарда Дагъусттаннай гужсса аьрщи сукку шаву хьурча, вил пикрилий, цукунсса зараллу хьун бюхъайссар?
-Ттула опытрайн чул бивщуну бусанна хьун бюхъайсса зараллая эксперт хIисаврай
1.Бюхъайссар шяраваллал районнай кIанттул стройматериаллая дурсса къатран гужсса зараллу биян.
2.Шагьрурдай лахъсса къатрацIун ларчIун дурсса тайкссара лахъсса пристройкартту лекьан бюхъайссар.
3.Бюхъайссар инсантурал оьр­мурдан нигьачIаву къадиянсса даражалийсса зарал биян монолитсса железобетондалул каркасирттал къатрайн, ми къатрал конструкцияртту цIакь дуллан аьркинссар. Ми цIакь даншиврул бюхъайссар инсантал къат­рава бизан буван.
Му куццуйсса, ххуй-хъинсса проектрайну дурсса цаппара къатран бюхъайссар куклусса зарал-зиян биян, мукунсса зараллу бивсса къатри шайссар дакьин дуван.
4.Монолитсса железобетондалул чIиртту бусса чIярузивурду дусса къатран зарал-зиян биян къабюхъайссар.
5.Бюхъайссар цаппара къатри лекьангу. Мукунсса къатри дуван аьркинссия «сейсмобезопасность» тIисса программалул лагрулий.

-Къатран хьусса заралданул жаваб щилли дулайсса?
-Проектрал ххуй-оькки­шив­рул жаваб дулайссар проектру дурсса идаралул ва экспертиза дурминнал. ПаччахIлугърал (субсидарно) жаваб дулайссар паччахIлугърал экспертизалул итабавкьусса гъалатIрахлу, амма къапаччахIлугъралмур экспертизалухлу жаваб къадулайссар.
Къатри къаххуйну даврихлу жаваб дулайссар, агарда 2 шинал гарантиялул чIун ккаккан дурну дакъахьурча къатри дурсса сакиншиндарал. Къатри тIайлану ишла даврил (техническое состояние) жаваб дулайссар къат­рал залуннал.

-Къатри даврил бутIуву хъинчулийсса дахханашивурттугу дуссарив?
-Дур хъинчулийсса дахханашивуртту. Къатри давриха зузисса ишбажаранчитурал ишла дуллай бур цIусса стройматериаллу, оборудование ва технологияртту. Миннан лав­хьхьунни монолитсса железобетондалул къатри дуллан, мунил къатри цIакьсса шайссар ва аьрщи сукку шаврия зарал къахъанахъиссар.

Ишла дуллай бур ххуй-хъинсса опалубка, бетон ххилай бур миксердаву, му хьхьичIра макIрарагу къакка­ккайссия. Къатраву ишла дуллай бур ттизаманнул сантехникалул ва электротехникалул оборудование, цIусса отделкалул материаллу, къатри ччясса чIумал дуллай бур.
— Барчаллагь.

Ихтилат бувссар
ХI. Аьдиловлул