[dropcap]М[/dropcap]арт-апрель зурдардий лакрал жяматрал, цала-цала буттахъал аьдатрайн бувну, Хъурдаккаврил байран дувай. Му байрандалиясса ца хайрну бухьунссар махъсса шиннардий лувату бивзун лаглагисса шяраваллал жагьилтал, душру, цал ххишала цачIун бавтIун, куннащал ку хъиннува мачча хьун баву, хIалашиву дусшиву ххишала хьун даву.
Ттун кIулния шихунмай ттул буттал шяраву Уручрав мукьва махIла бикIайва. Ссуттила личIи айва хъарас щаврил байрандалул хъар ласунма. ЧIявуну язи угьайва хьхьичIунма зузала, гьарца бригадалул кьюлтIну чIурду буллуну. Кьуру лавсма, февраль зуруйва цала гъан-маччамигу бавтIун, маслихIат ккаклай, хъарас щаврийн хIадур хъанан икIайва. Миккува ккаккан байва дукьрахIан дувансса цала агьулданиясса хIанттихъалагу (хъамитайпа бувчIайва), кIут бансса, ини бансса къама бищайва. ХIадур хьувкун, кIут ва ини гьаен гьарахъун лагайва. Муния махъ, кIира нюжмардул хьхьичI, зиниччатI шахьлай байбишайва. ХIанттихъалал дуллалисса хIан щарай дурив ххал дан, цукунсса хъанай дурив ккаккан, шамийлва Хъузалал дустал бучIайва.
Байрандалул мажлис буван кIива гьантта ливчIсса чIумал, бувккун жяматрал жагьилтал, ХъузалачIа щябикIансса кIантту хIадур буллай, программа сакин дуллан бикIайва. Хъами-душру тIурча, ччатI бушлай, мевтIурду дуллай, байрахъру батIлан бикIайва. Хъузалагу, ницру, хъарас хIадур дуллан икIайва. Хъузалал щарссанил салкьи дайва дулагъру, бурчул усру, хIухчил кьяпа, хIинча, ххютIа, гьанна бичинсса ххуржинтту. Мажлис буван хьхьичI кьини щалла щарнил жямат батIайва лавхъ-хIалахIулийн. Микку шайнал цала гьунар ккаккан байва (балай учин, щялмахъ ляхъан бан, къавтIун изан, ссигъа бусан ва м.ц.).
Хъарас щайсса кьини циняв жагьилтал, арамтал хъамаллуращал архIал кIюрххилва буккайва Хъун-КкурчIав. Хъами тIурча, Хъузалал къатлувун бавтIун, дуки-хIачIия хIадур дуллай, хъамал лайкьну хьунабакьин хIадур хъанай бикIайва.
Бюхттулнийн гьаз хьусса Уручуллал щар ххуйну чIалачIисса кIанттугу хIисавравун ларсун, ччясса заманная шиннайра нанисса аьдатрай, Хъарас щун буккайва ХьхьичI-Къурув. Миккура дайссия дялахърурдугу, тIуркIурдугу. Миккува бишайссия, мизитрал имамгу хьхьичIну, зикригу. Хъарас щуну махъ баян байва хъу дугьаврил чIун тIиртIушиву.
Хъарас щаврил мажлисрацIун дархIусса, ттунна дакIнийсса, аьдат-эбадатирттая бувсун махъ, жула лакрал ккурчIану хъанахъисса «Илчи» кказитрал кашилихчин баянгу буллай ура гьашинусса Хъун Хъузалану нава ушиву.
ОьвтIийгу ура ттула махъ бияйсса цинявннайнвагу, апрель зурул 5-нний Уручуллал шяраву хьунтIисса Хъурдаккаврил байрандалийн бухьхьияра тIий!
Нагу зул дуаьчи
Ширванинал арс Ханов ХIусайн
