[dropcap]И[/dropcap]чIува оьрмулун ва цIуллу-сагъшиврун нигьачIаву дусса иширттая мюхчан шаву мурадрай, гьарца инсаннан личIлулну икIан аьркинссар. ЦIуххин бюхъай, цукунсса нигьачIаву дикIан бюхъайссар инсаннан ичIура куну.

Токрал ххаллу ва токрайн дучIайсса затру саргъунну дакъахьурча, цIу лачIунсса нигьачIаву дуссар. Газ экьинай бухьурча, гужсса пIякь учаву хьун ягу инсан загьрулул хьун бюхъайссар. Щинал бургъурду саргъунну бакъахьурча, щин ялтту нан бюхъайссар.

Шяраваллил кIанттурдай чIявуну шайссар ишру лавхъсса пачлил угарданул инсан загьрулул увсса. Укунсса иширттан багьана-савав хъанахъиссар инсаннал биччибакъулшиву, ичIура ишла дуллалисса прибордахунсса инструкция щаллу къабуллалаву, цIарая мюхчан хьунсса тIалавшиннарду къадуручлачаву.

НигьачIаврия мюхчан хьун оьрчIан лахьхьин бан аьркин­ссар мюрщину бунува. Саргъунну зузисса прибордаягума инсаннал оьрмулун ва цIуллу-сагъшиврун нигьачIаву дуссар, агана миннуха инструкциялийн бувну зий бакъахьурча.
ЦукунчIав къабучIиссар гъаргъсса, саргъун дакъасса электричествалул приборду ишла дуллан, ми къулагъас дакъа кьаритан. КъабучIиссар ца розеткалувун кIира-шанна прибор дучIан. Прибор лахъан нанисса чIумал, хьхьичI ххал мунивун дучIан аьркинссар, яла — сетьравун. Лещан ччисса чIумаллив, хьхьичI сетьрава дуккан аьркинссар. Зузисса приборданийн атилсса ка щун къабучIиссар. Дахьрасса саргъундакъашиву хIисав шайхту, прибор дакьин дан дулун аьркинссар. Сетьрайн дуркIсса электроприборду ччучлай духьурча, щин рутIлай, лещан дуллан къабучIиссар.

ЦIана ичIува компьютер бакъасса цучIав акъахьун­ссар. Компьютер ишла баврилгу дуссар цила низам. Монитор дикIан аьркинссар яруннийн тIайлану. Къахъинссар компьютерданух цIансса къатлуву зий. ОьрчIан 25 минутIраяр ххишала компьютерданух щябикIан къабучIиссар. Компьютерданух хъунмасса хIаллай зий бухьурча, чIун-чIумуй зарядка дан аьркинссар.
Гьарица къушлий бур дукра дайсса газрал пачру, мангъаллу, телевизорду, светильник­ру. Щин гъили даншиврул къатраву дихьлай бур колонкарду. Газрал приборду ишла дуллалийни, мюхчанну бикIан аьркинссар экьинанисса газ сававну пIякь учаву къахьун ягу загьрулул къахьун. Газ лахълахъисса чIу­мал, спичка дургьуну махъри тIитIин аьркинсса кран. Лавхъсса газ къулагъас дакъа битан къабучIиссар.

Ялув бацIан аьркинссар ялтту ларгсса хьюмушиврул газ лещан къабан. Балики мукунсса иш хьурча, газ левщун, чIавахьулу тIивтIуну, гьава марцI бувккун махъ лахъан аьркинссар цIунил. Газ лавхъсса чIумал форточка тIивтIуну бикIан аьркинссар, кухнилул нузру тIурча – ларкьуну. Цанчирча газ ччучлачисса чIумал заралсса затру дачайссар. Газрал цIу чаннану някIсса, хъахъи-ятIулсса рангру хIала дакъасса дикIан аьркинссар.
Гьартасса чIан дусса чяйникру ва кIункIурду лахъну бишин аьркинссар, гьава къабащаншиврул. Подъездраву, квартиралуву, лувчIинний газрал кьанкь духьурча, оьвчин аьркинссар 04 номерданийн. Хасъсса къуллугърал зузалт бияннин, нузру, чIавахьулттив тIитIин аьркинссар, цукунчIав цIу лахъан къабучIиссар.
Газ, ялув кIункIур, чяйник бакъанува, укунма лавхъун хъунмасса хIаллай битан къабучIиссар. Газрайсса кIункIур щаран бикIайхту, цIу лагь дан аьркинссар. Чяйник хъунмасса хIаллай щарай битан къабучIиссар, чару бакьай­ссар. Дукра дуллалисса чIумал, кIункIурдуй кьалакьи дикIан аьркинссар.

ИчIура газрал кьанкь рищурча, га цIана газ лещара. Яла лакьияра кран. Ишла мадувару цIарал пиягь личинсса зат. Ка щун къабучIиссар выключательлайн, цанчирча ми лахълай-лешлашисса чIумал пиягь личин бюхъайссар. Гьава марцI букканшиврул мугьлат бакъа тIитIин аьркинссар чIавахьулттив. Оьвчин аьркин­ссар хасъсса къуллугърайн.
М.С. Супиянов,
Ялув бацIаврил ва профилактикалул даврил управлениялул хъунама, виваллил къуллугърал капитан

ХIадур бувссар
А. Аьбдуллаевал