«Илчилул» редакциялийн бувкIунни Каспийскалий яхъанахъисса 84 шинавусса пенсионер Сяидов Сяидлуясса укунсса чагъар:
«Ххирасса «Илчи» кказитрал зузалт! «Илчи» кказит чикъавчусса, къабувккусса къархьуссар ттул царагу шин.

Ттула чIаххуврай яхъана­хъисса гьалмахчунал уттигъанну ттучIан лавсун увкIунни «Пенсионер» тIисса кказитрая кьувкьусса чагъарданул парча. Микку бия чивчуну 80 шин хьусса пенсионернан дуссар хIаллихшиннарду, льготарду тIий – налогру дулаврил, даруртту ласаврил. На ивра цаппара идарарттайн, амма му зат тасттикь бай­сса организация къаляркъунни, жучIа мукунсса закон дакъассар тIий бур на ивми кIанттурдай.
Ттул чIивисса пенсиялул хъунмасса бутIа дарурттах, налогирттах лаглай бур. Ттул хъунмасса тавакъюри, ва ттул суалданунсса жаваб лякъайрив ххал дара. На кунмасса бухьун­ссар тIий ура хъинну къачансса цайми-цаймигу».
Ялавай бишлай буру, хъирив бивзун, цаппара хасъсса идарарттайнгу бивну, жущава кIул бан бювхъумур. Укун­сса дур 80 шин хьуминнансса хIаллихшиннардал сияхI:

1. ЖКХ-лул хIаллихшин­нарду. Агарда коммунал шар­тIирдахлу цувалусса пенсионернал ласайсса доходраяту 22% булайхьурча, мунан аьркинссар лахъаву дуван шагьрулул социал управлениялий, миккува зузалтрал бувчIин бантIиссар лахъаву (компенсация) цукун дайссарив.

2. Капитал ремонтрахлусса хIаллихшиннарду. 80 шинавун бивсса пенсионертал ялапар хъанай бухьурча чIявуквартирартту бусса къатраву, миннал дулун аьркинссар взносру, амма ми арцу зана дайссар махъуннай субсидиярттайну. ХIаллихшиннарду дагьайссар зукъазисса ва цив­ппалу яхъанахъисса пенсионертурангу, лас ва щар кIиягу пенсионертал бусса кулпатирттангу. Гьашину январьданул 1-нния махъ хIаллихшинну дагьайссар, агарда лас ягу щарсса 1-мур ягу 2-мур группалул инвалидтал бухьурча.

3. Ялун ххи бувсса отпуск. Агана 80 шин хьусса пенсионер зий ухьурча, мунан булун аьркинссар ялун ххи бувсса 2 нюжмардийсса отпуск, амма мунихлу арцу къадулайссар га зузисса идаралул. Гьашину январьдания тинмай миннахьхьун дулайссар шинай 2 кьини — диспансерданийн гьаншиврул.

4. Налогирттал хIаллихшин. 80 шин хьуминнаща бюхъайссар царай къатрахсса хъуслил налог къадулун (имущественный налог).

5. Медициналул чулухасса хIаллихшиннарду. 80 шин хьусса пенсионернан ккаккан бувну бур хIакиннал чивчусса даруртту уква булун (ЦIуллушиву дуруччаврил министерствалул сияхIрацIун бавкьуну), санаториярттай хъин хьун, ккарччив дишин (ххирасса материаллая­сса личIаннин).

Ва ялагу, 80 шин хьусса инсаннацIун цIакь айссар мунан ка-кумаг бансса инсан, мунихлу мунан дулайссар 1200 къуруш зуруй.
Вай цинярда хIаллих­шин­нар­дал хIакъираву гьартану кIул бан ччарча, гьан бучIиссар ДР-лул ЗахIматрал ва социал иширттал министерствалийн, ягу зува ялапар хъанахъисса социал буруччаврил идаралийн (Управление по социальной защите).
ХIадур бувссар
ХIасан Аьдиловлул