![](http://ilchi.beget.tech/wp-content/uploads/2018/10/little_gr.jpg)
Уттигъанну ттун бахтти хьунни Вихьуллал шяравусса оьрчIал багъраву дурсса «Мусил ссут» цIанилусса шадлугърах ябитан.На махIаттал увунна оьрчIал бусласимунил, гайннан лахьхьин бувмунил луртамалул гьарзашиврул.
[dropcap]Ш[/dropcap]икку тарбия буллай бур ца мюрщиминнал, цагу хъуниминнал оьрчIал кIива группа. Группардавугу бур ца-цанниву15 оьрчI. Мюрщиминнал тарбиячину бур Халилова Аьйша, хъуниминнал тарбиячину бур АхIмадова Ххассу. Шадлугъ кьатIув дуван пайда къахъанай бушиврийн бувну (зунттаву ччяни дяркъу шай), цала-цала группардаву дуруна.
Цалчин шадлугъ дуруна мюрщимий оьрчIал группалул. Шикку столданий дирхьуну дия зунттаву шайсса ахънилсса, багъралсса ва хъув дургьуну ххяххайсса бакIлахъия. ОьрчIал каруннахь бия мурхьирдал чIапIал кацIру, ларххун бия ссутнил чIюлушивруха лархьхьусса яннардугу. Аьйшал ца-цаних тIий гьаз дуллай ахънилсса, ахъулсса оьрчIахь цIувххуна гайннун цIарду.
![](http://ilchi.beget.tech/wp-content/uploads/2018/10/big_gruppa.jpg)
[dropcap]Б[/dropcap]якъавкьуну, буслай бия оьрчIру чимусул, нисвартилул, гьивчул, хъюртул, къалмул ва цаймигу затирттал цIарду. КIулну бия оьрчIан банан жучIара зунттаву къашайшивугу. Къама, гьарахъ гьавуну, иникIма дайшивугу бувсуна. ИникIмалия ччатI, гьавккури байшивугу бувсуна. Гъаттарансса диссиндалийнгума дичайшиву иникIма кIулну бия. КIулну бия оьрчIан ахъулссаннул чIаврду ссуттихуннай ятIул шайшиву. Му чIумал гай бучIишиву риттунгу. Дурккуна оьрчIал ссутнин хас дурсса назмурдугу. Гай дурккуна оьрус мазрай ва лакку мазрай. ОьрчIал ккаккан дуруна цала чурххал тазашивурттугу: лирчуна къутри, бувуна шпагатру, бивзуна къавтIун.
[dropcap]О[/dropcap]ьрчIах уруглагийни ттун дакIнин дагьлай дия нава гайннал оьрмулувусса чIун. Цуксса начнугу, ттун гайксса затру къакIулну бивкIссар.
Яла дуруна хъуними оьрчIал шадлугъ. Ссутнил «мусил чIапIал» чIюлу бувсса, кIяласса, исвагьисса гьухъуву, ссуттил дияйсса ахъулссаннул бувцIусса чIапущал хъамалу бувкIун бия оьрчIащал хьунабакьин ссутнил вакил. Ва номер щаллу бувну бия театрал постановкалул лагрулий. Валлагь, оьрчIру муксса гьавасрай ккалай бияхха шеърирдугу, ччарча оьрус мазрай, ччарчагу лакку мазрай бякъаливчIун. Бувсуна оьрчIал ссуттил дияйсса бакIлахъия цумур ссан хъинссаривгу.
[dropcap]Ш[/dropcap]иккува бия оьрчIал ккаккан дуллалисса шадлугърах буруглай оьрчIал багърал каялувчи ХIусайнова Залихха ва оьрчIал ниттихъул. Гайннал оьрчIал ккаккан буллалисса номерду, ххарину хъатру рищлай, кьамул буллай бия. БувкIун бия ниттихъул оьрчIачIан , нацIу-кьацIушивурттугу ларсун.
Гьай-гьай, ва тарбиячитурал цала касму ххуйну кIулшиврул муттар. Халилова Аьйша ва АхIмадова Ххассу цимилгу гьуртту хьуссар райондалийсса оьрчIал багъирдал тарбиячитурал дянивсса конкурсирттайх, бувгьуссар хьхьичIунсса кIанттурдугу. ЦIуллу баннав зу, жула ялун нанисса никирал тарбиячитал!