Сентябрь зурул 15-нний ЦIуминалийсса ЦIуссачIурттащиял школалий хьунни 1999 шиналсса дяъвилул иширттаву экст­ремистурал оьрмулуцIа увсса Адамов ХIусайннун мемориал ула тIитIлатIисса ва ЦIуссачIурттащиял школалун мунал цIа дуллали­сса шадлугърал линейка. 

Шикку гьуртту хьунни ЦIуссалакрал райондалул администрациялул бакIчинал хъиривчу ХIажи ХIажиев, Къумтуркъалаллал РОВД-лул хъунаманал хъиривчу Уллубий Аьли­беков, географиялул элмурдал доктор Шагьимардан Мудуев, виричунал нину ХIурун, гъан-маччами, архIал къуллугъ буллай бивкIми, дустал.

---

Шадлугърал мажлис тIитIлай, ихтилат бунни школалул директор Темирбулат Адамовлул. Ванал оьвчаву дунни дуклаки оьрчIайн, виричунал цIанин лайкьну дуклангу, яхъанангу аьркинссар куну. Барчаллагь увкунни ххаллилсса арс тарбия увсса ниттихь.

Цала ихтилатраву ХIажи ХIа­жиевлул кIицI лавгунни махъсса кIира шинал дянив, паракьатсса чIумал, 25 полициялул зузала оьрмулуцIа хьушиву. Утти­гу терроризмалул мархха-ххун сагънура душиву, ва му балаллуйн цинявппагу ца хьуну къаршину бацIан аьркиншиву.
Виричунал ниттил ХIуруннул хъунмасса барчаллагь увкунни цила арснал аьпа абад бан ва даву дурминнахь, мажлисрай гьуртту хьун бувкIминнахь.

Ихтилатру къуртал хьуну махъ тIиртIунни школалул ла­жинчIирай цIакь дурсса ХIу­сайн Адамовлул мемориал ула. Дирхьунни тIутIив.
Хъирив дуклаки оьрчIал дурккунни виричунахасса наз­мурду, увкунни балайрду.
Адамов ХIусайн ХIаби­лович увну ур 1966 шинал ЦIуссалакрал райондалий­сса ЦIуссачIурттащиял шяраву. 1982 шинал ххуйсса кьиматирттай школагу къуртал бувну, увххун ур Дагъусттаннал шяраваллил хозяйствалул институтравун. ЦIуссалакрал виваллил иширттал отделданий зун ивкIун ур 1997 шинал. 1998 шинал ППС-рал батальондалул взводрал командирну ивтун ур. 1999 шинал сентябрь зурул 8-нний ЦIуссачIурттащиял блокпострай жан дуллуну дур.

Та кьини ХIусайн, кIира хьхьу-кьини лув-ялув дежурствалий ивкIун тIий, игьалаган ца кьинисса итаавкьуну ивкIун ур. Амма, ХIусайннул дакI паракьат дакъа, га кьинигу дустурачIан блокпострайн лавгун ур. Шяравун бувххун нанисса боевиктурал бувцIусса машинартту гьан къабитан бавцIуну, къучагъшиврий жан дуллуну дур милицанал лейтенант ХIусайн Адамовлул ва милицанал прапорщик МахIаммад Рамазановлул. Вай кIиннаннагу дуллуну дур Къучагъшиврул орден (аьпалул хьуну махъ). ХIусайн увччуну ур ЦIуссачIурттащиял шяраву. Шяраваллил агьаммур кIичIираваллингу, утти ЦIуссачIурттащиял школалунгу дирзунни ванал цIа.