Ссутнил чIун – му хъуру лакьлакьисса чIун дур. Му чIумал кьатIух бикIай чIявусса инсантал. Мунияту цIу дагьаврийнусса апатIру къахьуншиврул мугъаятну бикIан багьлай бур. Уттигъанну на хьунаавкьуссияв Ккуллал райондалул «ЦIулещан дувултрал» хъунаманал хъиривчу МахIмудиев МахIаммадханнущал.
— Ци тагьар дур, МахIаммадхан, Ккуллал райондалий цIу дагьаврийнусса апатIру къахьун битаврил чулуха?
— ТIайланма учинна, жула инсантал муксса бурувччусса бакъар. Вайннан ххан бикIай, ваца апатI цала чIарах бувккун гьансса кунма. Му бяйкьлакьисса пикрир. ЦIана зунттаву хъуру лакьлакьисса чIун дур. Дугьай хъуруннай цичIав дургьуну дакъахьурчагу, гай хъурунная буллай бур ххулув. Ми цукунчIав къатрачIан гъанну бишин къабучIиссар. ЧIарах ххуллийх нанисса инсаннал, лещан къадурну, экьи лирчусса пIапIрусраяту мурчал кIалай ларсун, цIу дагьан бюхъайссар. Ялагу цукунчIав ххулув къатрал магъулу бишин къабучIиссар. Утти цIуну дуллалисса къатраву ттукIрал ххаллу дур бигьашиврун магъуйх яларай къатравун дуцлай. Мунийн бувну хъиннува мугъаятну бикIан аьркинссар.
Дуклаки оьрчIру, вяйлиявуртту дуллай, питарду пIякь учин дуллай бур. Ттучанчитуран цукунчIав хъуру лакьлакьисса чIумал ми пIякь учай затру дахлан къабучIиссар.
Ссут дучIайхту, жучIара зунттаву ччяни дяркъу хъанан дикIай, ттукIрал пачру лахълан бикIай. Ми цукунчIав инсан шава акъасса чIумал лавхъун битан къабучIиссар. Бюхъайссар, буран бивщуну, цамур иш-тагьар хьуну, замыкание хьун. Мукунма газрай лахъайсса пачру, дукра дайми хьуннав, лавхъун кьабитан къабучIиссар. Ми ишла буллалисса мутталий янилу бикIан аьркинссар.
ЦIу дагьни, жуй бикIай аьй дуллай, зу чIал хьунну, ччяни къабувкIунну тIий. Ва иширал ялув жун баян буван ччива цими минутIрал мутталий ккаккан бувну буссарив райондалийсса шяраваллавун жу биян: Хъусрахьхьун – 30, Ккулув – 20, 1-мур ЦIувкIрав – 25, СумбатIлив – 15, Ваччав – 5-10, ЧIяв – 8, Хъюйн – 15, Хъювхъун – 40, ЦIуйшав – 30, Вихьлив – 40, Къянив – 45, ЦIущарнив – 30, 2-мур ЦIувкIрав – 45.
Жуйн оьвчин бучIиссар аьмсса МЧС-рал 112 номерданий ягу жул 55-17-88 номерданий. Жуйн оьвтIиманалгу чара бакъа цала цIа ва чату оьвтIиссарив бусан аьркинссар. Циван учирча, жучIан цанма хIазран оьвтIисса оьрчIругу бикIай. Хъунмасса тавакъюри оьрчIал нитти-буттахьгу цала оьрчIай дюъ дишаву.
Ялагу шяраваллал бакIчитал буржлув бувну буссар цала шяраву хIасул буван ацIуннаяр чан бакъасса «пожарная дружина». Циван учирча, жу бияннин, цIу дагьсса кIанттах къаялугьлай, га лещан дулланшиврул.
[dropcap]А[/dropcap]мма ва иширах царагу шяраваллил бакIчи къулагъас дуллай акъар, ми «шанайнма» бур. Шиккува кIицI буван ччива ялагу ца агьамсса зат, шяраваллал бакIчитурал къуллугърайн багьайсса: нажагь цIу дагьни, щин ласун аьркин хьун бюхъайсса бяр шяраву чара бакъа бикIан аьркиншиву. Ми бусса кIанттурдайгу дакъар жул машиналул щин ласун бюхъайсса шартIру хIасул дурну. Машиналул дур ласлай арулла тонна щинал, ми харж дайссар ацIра, ацIния ххюра минутIрал мутталий. Яла, щин ласун багьсса чIумал, шяраваллавусса бярдал чIанула бур гьагъ ласлай машиналул, насос дур зия хъанай.
Жул мурад цIу дагьан къаритавур. ЦIараща мудангу бурувччуну бикIан аьркинссар. Нажагь апатI хьусса чIумаллив 24 ссятрал мутталий жу хIадурну буссару кумагращал бучIан.
— Барчаллагь, МахIаммадхан, бувсса ихтилатрахлу, хъинну мюнпат бусса бувчIинбавурттахлу. Зу цIу дагьсса кIанайн гьансса къабагьаваннав!
Ихтилат бувссар
ХI. ХIусайновлул
