Гьашину Лакрал райондалий школалийн лавгунни 1000-ннийн бивсса оьрчIру. Цалчинмур классравун лавгунни 85 оьрчI. Миннава 42 – Гъумучиял школалийн.

Зулайхат Тахакьаева
[dropcap]С[/dropcap]ентябрь зурул цалчинсса кьини школалий яла агьамми инсантал бур дахьва байбихьулул класс­равун наними ва хъунмур къулагъасгу, гьай-гьай, миннах дур. Гъумучиял детсадраву аьдатравун багьну бур цалчинмур класс­равун нанисса оьрчIру, цалла тарбиялул дайдихьу хьусса кIанттайн бувкIун, цахава аякьалий бивкIсса зузалтрахь барчаллагьгу увкуну, гичча яла тарбиячитуращал школалийн лагайсса.
Дур Лакрал райондалий цIакь хьуну ца цамургу хъинсса аьдат – администрациялул зузалт лагайссар гьарца шяраваллавусса школар­ттайн – дуклаки оьрчIру барча бан.

КIулшивурттал кьини Гъумучиял школалул учительталгу, дуклаки оьрчIругу барча бан бувкIун бия ДР-лул культуралул министр Зарема Буттаева, ДР-лул МВД-лул «Лакский» МО-лул куратор, полицанал полковник Арамис Бегов, Лакрал райондалул бакIчи Юсуп МахIаммадов, КIулшиву дулаврил управлениялул каялувчи Явсупи ХIамзаев, райондалул идарарттал каялувчитал.

КIулшивурттал ххуллийнсса шадлугърал линейкалийн мюрщулт буккан бувна 11-мур классрал оьрчIал карду дургьуну.
Школалул директор Ххадижат ХIусниевал бувсунни Гъумучиял школа тIивтIуну гьашину бартлаглай душиву 130 шин. КIицI лавгунни ларгсса дуккаврил шинал школалул оьрчIал хьхьичIунсса кка­ккияртту хьун дуршиву республикалул лагрулийсса олимпиадарттай, конкурсирттай ва спортрал бяс-ччаллай. Микку хьхьичIунсса кIанттурду бувгьусса оьрчIан дуллунни хIурматрал грамотартту.

Дуклаки оьрчIан тIайлаба­цIусса шин чIа тIий, Юсуп МахIаммадовлул кIицI лавгуна хъунмур къулагъас тарбиялул даврих дуллан багьлай бушиву, тарбия дакъани, багьайсса куццуйсса кIулшивугу ласун къабюхъавай тIий.
Райондалул бакIчинал бувсунни «100 школа» тIисса проектравун кIива школа – Щардал ва Хьурттал багьну бушиву, цIуну буллалисса Гъумучиял школа къуртал бан арцу итадаркьуну душиву ва му хъиривсса дуккаврил шинайннин къуртал бантIишиву.

Цила ватанлувтурахь цIусса дуккарил шингу барачат дан, учительтуран ва дуклаки оьрчIангу тIайлабацIу чIа учин Зарема Бу­ттаева бувкIун бия ссайгъатирттащал – райондалул школарттан ванил пишкаш бунни футболданий буккай ттупру.
Цалчинмур классравун наниминналгу ххари бувна цинявппа, школалухасса ва учительтурахасса назмурду пасихIну ккалай, байбихьулул кIулшивурттал ххуйсса гьану бушиву ккаккан бувну.