Май зурул 20-нний МахIачкъалалив Судрал приставтурал управлениялул къатрал чIарав кIира пIякь учаву хьунни.

А. Аьбдуллаева
Цалчин пIякь увкумур бомба цIакь бувну бивкIун бур коррупциялун ххуллу кьукьлакьисса отделданул (управление ССП) хъунаманал «Тойота» машиналуцIун. ПIякь учай зат 1,5 кг. тротилданул гужирайсса диркIун дур, амма 100 гр. дакъа пIякь къаувкуну дур. Га пIякь учаву хьуну 20 минутIрава, хьхьичIмур машиналия 25-30 мет­ралул архну бавцIусса, ВАЗ-2108 машиналул багажникраву цамургу зат пIякь увкунни.
КIилчинмур бомба 40-50 кг. тротилданул гуж бусса бивкIун бур.
Вай пIякь учавурттаву 4 инсан ивкIуну ур, 40 инсаннайн щавурду дирну дур.
ДР-лул Президентнал къуллугърайсса Рамазан АьбдуллатIиповлул тапшур бувну бур ДР-лул Правительствалийн терактраву ливтIуминнал ва бивщуминнал кулпатирттан кумаг бан.
Ва оьхIалсса тахсиркаршиву дащуй дихьлай, Р. АьбдуллатIиповлул баян бунни:
— ВахIшисса тахсиркаршиву дунни. Инсантал ливтIунни, бивщуссагу чIявусса хьунни.
…На баян буллай ура, къахьун­тIиссару террористураща, экстремистуращал жува нигьал бан. Ва тахсиркаршиву дурми лякъиншиврий ва Аьрасатнал законнайн бувну миннан кьянкьасса танмихI кьукьиншиврий на мукIруну ура…
Хъирив кьини, май зурул 21-нний, ссят 11.07 хьусса чIумал Аьрасатнал МЧС-рал Ил-76 самолетрай Москавлив бувцунни терактраву зарал бивсса шама инсан.
Вайннал ххал бунни Доргели шяраву ичIува газ пIякь увкуну зарал бивсса нину ва оьрчIру. Нину, хъинну захIматсса тагьарданий душиврийн бувну, дуцин къархьуну дур. ОьрчIру тихунмай буцин аьркиншинна дакъар.