ДуркIунни чIявучин ххирасса, кIинтнива бувккун, уттарасса цимурца цIу лагайсса, тIабиаьт чантIа тIисса чIун, мунищала – Интдайдихьулул байрангу.Лакрал щархъаву, хьхьичIра кунна гурну кIицI къалагларчагу, ва байран дуллай бур шайсса куццуй. Бити ссурулун бивсса къавтIилун кIанай чIиви-кьивисса бикIан. КъавтIилул лагма, хьхьичIва кунма, чIявусса инсантал лавгун бакъанугу, хьхьичIва кунма, каруннахь оьрчIи-чIюлусса бартригу дургьуну, лечлачисса, шяраваллил кIичIиртту лахъсса чIурдал ласун бувну нанисса оьрчIал чIурду бакъанугу.
Ци даххана хьурчагу, Интнил байрандалул ца яла агьаммур, ца яла яргмур лишанну личIлай дур барта, гиж дартIсса карунних ми дуллан чIарав амухъул дакъанугу, ва аварасса, ссанчIав чIун диял къахъанахъисса заманнай, шарда дуллаяр, дурнурасса бартри машан ласлай бунугу.
[dropcap]Т[/dropcap]Iабиаьтрал дур цилла низам, инсаннайн хъар дакъасса – цинналусса низам. Мунийн бувну дуркIунни ирглийсса Инт.
Барча Интнил байран, ххирасса буккулт! Къурагьшиву къадагьаннав, лухччинул чIан дуцIиннав, хъунил бакI дуцIиннав, ризкьи чIяву баннав, някIсса, чаннасса ссав тачIав ялату къагьаннав!
Бадрижамал Аьлиева
