ЦIуссалакрал райондалий Ватан дуруччултрал кьинилун хасну, райондалул Спортрал ва физкультуралул комитетрал сипталийну, хьунни «Гьурала, оьрчIрув!» тIисса спортрал бяст-ччаллу.
[dropcap]Ш[/dropcap]икку гьурттушинна дунни 9 школалул дуклаки оьрчIал. Бяст-ччаллу хьунни байрандалул кьинилун хасну чIюлу бувсса ЦIуссачIурттащиял школалул спортзалдануву. ОьрчIал чIарав бацIан ва ми барча буван бувкIун бия райондалул администрациялул вакилтал, школарттал директортал ва ДСЮШ-дал зузалт.
ЦIуссалакрал райондалул бакIчинал хъиривчу ХIажи ХIажиевлул кIицI лавгунни укунсса мероприятияртту жагьилтурал оьрмулуву хъинну агьамсса хъанахъишиву.
ОьрчIру барча бунни райондалул Спортрал ва физкультуралул комитетрал зузала Анзор Абакаровлул ва 1-мур ДЮСШ-рал директор Сергей Аьлимовлул.
Спартакиадалул хъунама судья ХIажи Буттаевлул баян бувна бяст-ччаллал номинацияртту ва тIуркIулул низам.
Спартакиадалий гьуртту хьусса цинявппагу оьрчIру шайсса хIарачат буллай бия гьунарду ккаккан бан.
Бяст-ччаллаву аьмну цалчинсса кIану бувгьунни
ЦIуссачIурттащиял школалул командалул, кIилчинсса кIану бувгьунни Чапаевкаллал школалул жагьилтурал. Шамилчинсса кIану кIибавчIунни ЦIуссалакрал гимназиялул ва Аьхъардал школалул командарттайх.
Ххув хьусса ва гьуртту хьусса командарттан дуллунни хIурматрал грамотартту, кубокру, медаллу ва бахшишру.
Имара Саидова
