[dropcap]Б[/dropcap]усан ччива Ккуллал райондалий ца бакъа бакъасса, гъаттарал хIакинну зузисса хъамитайпалия. Му хIакин цуппагу бур
Вихьуллал шяравасса – Аьлиева ТIутIи Усттардул душ.
Чичрурдавун дагьну дур «Альпийские луга» тIисса калима. КуртIну пикри бувсса чIумал, жула Дагъусттаннаясса хавар чIявуми дунияллул агьалинан кIулну бакъахьунссар. Дагъусттаннал зунттавуса ятту-гъаттара гъинттул гьухъалданийн лагайсса кьаннайн, зунттурдайн, рахIайн «Альпи зунттурдал кьанну» тIийнма буру жува. Циванни чуврив архну Европанаву жунма къаккавксса зунттурдал цIарду жунна жуламиннуйн тIун багьлагьисса? Учин багьлай бур: Аьндиллал, Гъуниннал, Агъуллал, Лакрал, Ккуллал, Ахъушиял зунттал бизантту, арду куну. Ва пикри бансса зат бур.
ХIажимурад ХIусайнов
Вана вай Ккуллал райондалийсса зунттурдал ххинчурдайсса уртту-тIутIив къепа тIий канай оьллал дулайсса накIлия дурсса нис – «Ккуллал нис» тIий, дагьан къадитай Дарбантуллал базардаву. Яттилмур, гъаттаралмур дикIгу мукунна жулами зунттурдай ябуллалисса хIайвантралми нахIуссар. Циван учирча, ссалчIав зия къадурсса тIабиаьт дуну тIий жучIара.
Вай зунттавусса жула хIайвантрал ялув бавцIуну бур цалла даву ххуйну кIулсса гъаттарал хIакинтал. ХIакьину ттун бусан ччива Ккуллал райондалий ца бакъа бакъасса, гъаттарал хIакинну зузисса хъамитайпалия. Му хIакин цуппагу бур Вихьуллал шяравасса – Аьлиева ТIутIи Усттардул душ.
Инсаннал ци-дунугу цIий дусса чIумал, га цIуцIимур кIану чув буссарив бусан бюхълай бур шаппаминнахь, хIакиннахь. Ятту-гъаттараща бюхълай бакъар цIуцIи кIанаяту бусан. Мунияту ветеринарнал кIулшиву инсанналмурнияр хъиннура гьарта-гьарзасса дикIан багьлай бур.
1980-ку шинал, Вихьуллал дянивмур даражалул школа къуртал бувсса шинал, ТIутIи найбунува бувххун бур Дагъусттаннал шяраваллил институтрал ветеринар факультетрайн. СССР дусса чIумал техникум, институт къуртал бувми зунсса давурттив дусса кIанттайн тIайла буккайсса аьдат дикIайва. Зун тIайла бувксса чагъарданийгу чивчуну бикIайссия чара бакъа яхъанансса кIану дузал буван аьркиншиву. Буслай бур Аьлиева ТIутIи:
— На Дагъусттаннал шяраваллил институт къуртал бувссар 1985-ку шинал. Зун тIайла бувккунав Ярославуллал областрайсса Шасикова тIисса поселокрайн. Гичча арх бакъа бия Андропов тIисса шагьругу. Ганиннин, дуклай бунува, на ташу бувссия жула чIаххуврай яхъанахъисса Аьлищал. Аьлил къуртал бувссар Буйнакскалийсса механизатортурал школа. Жун, тихун бучIайхту, буллуна яхъанан секциялул лагрулийсса къатта. На гъаттарал хIакинну, Аьли ттул шоферну зий буссияв. Тийх жул аякьалулу буссия гъаттара ва романовский журалул ятту. ЧIявусса ятту-гъаттара ябуван шайсса хъинну ххуйсса кIану бия. Каялувчитал, тикку яхъанахъисса инсантал жуя рязину бикIайва. Жу тийх зий буссияв 1990-ку шинайннин. Ми шиннардил дянив жул кулпат хъунма хьуну, шама арсгу, ца душгу хьуна. Яла, оьрчIан школалийн гьан багьлай бушиврийн бувну, гай буттал кIанттаяту ятну тарбия къахьун, жу зана хьуссияв жула буттал шяравун Вихьлив. Амма ттун ттула касмулул даву къархьуна шяраву. ОьрчIру мюрщину бушиврийн бувну, цайми кIанттурдай даву тIалав дуллан бюхълай бакъая. Мунияту на 2000-ку шинайннин, дакI хъунна къадурну, Вихьуллал шяравусса ххюра шяраваллил ялув дарцIусса ветучастокрай техничкану зий бивкIра.
— ТIутIий, ина хъамитайпалун къабигьасса сянат язи дургьуну дур. Ци савав хьуна вин му касму язи дугьан?
— Шяравусса оьрму бавхIуну бур кIива иширацIун. Цалчин, къатта-къушлий дуланмагъ дикIаншиврул, дугьан багьлай бур хъуру. КIилчин, шяраваллил кIанай ятту-гъаттара якъабуллай яхъанангурив бюхълай бакъар. Ттул ппу, аьпабиву, Усттар, щала оьрмулий хIухчуну зий ивкIсса инсан ия. Ялагу жул къатри дирхьуну дия шяраваллил гъаттара гьухъалдаийн тIайла буккайсса бакIшяраву, БакIул-Бяраялу тIисса кIанттул чIарав. Шиккун инттухунмай, ссуттихунмай бучIайва ветеринартал гъаттарайн ххалаххив буван. Миннаву бикIайва, чурххал лагьсса бухьурчагу, дирисса МахIаммадова Шура тIисса хъамитайпагу. На жула хъювату ганих буруглай бикIайссияв. Бигьану оьл, чIаваоьл цукун бацIан буванссаривгу заллухъруннахь бувсун, ца усттарну ххалаххи байва Шурал. Цийрагу тунтну някIсса хялат дикIайва. Ганил даву ттун хъинну дакIний лирчIуна. Бунияла маз къакIулсса ятту-гъаттарал цIуллушиврул ялув бацIайсса касмугу ттун, харжи ласайсса дакъагу, чирилунсса, язухъ бавринсса, инсаннал хасият кIукIлу хъанахъаврин кIункIу тIисса касмуну чIалан дикIай. Циванни мукун бикIан къабучIисса?
— Яла, 2000-ку шиная махъ, чув зий бивкIра?
— КIицI дурсса шинал на зий буссияв Ккуллал райондалул Ветуправлениялий, бакIрая зий буссияв дизотрядрал каялувчину. Жун багьайва ятту-гъаттара гьантта битайсса ппаллаву, гураннаву ятту-гъаттарайн цIуцIаву диян дуван бюхъайсса ущу-щулгъи, нацI, чIакри литIун бувансса дарув пурх буллан. Хъинну чаран шайва ва давриятугу цIуцIавуртту махъун щун дуван. Яла 2005-ку шиная шинмай зий бура шиккува райондалул Ветуправлениялул лабораториялул хъунмурну. Ттуйн хъар шайссар мукунма ЧIяв ва Вихьлив шайсса базардугу. На микку дахлахисса дикI, нагь-нис ххал дувайссар, лабораториялуву анализ дуван ларсъсса чIуннугу шай. Нажагь, ахьния багьну, биххан багьсса ятту-гъаттара бухьурча, мукунсса дикI даххан къабитайссар. МютIий къахъанахъисса бухьурча, га цIана участковый учIан увайссар. Амма мютIи къахъанахъисса инсантал нажагь бакъа къабикIай. Ялун бургайхтура, ттун дикI кIул шай цукунсса дуссарив. Мукунма на дикI даххан бучIишиврул чагъаргу даххухьхьун булайссар.
— Бигьассарив хъамитайпалун гьарца кьини ацIра километралул манзилданий Вихьуллал шярава Ваччав даврийн занан?
— Цахъисгу къазахIматри. Циван учирча, ттун ттулла даву хъинну ххирар.
ТIутIил даврия цува хъинну рязину ушиву бувсуна ттухь Ккуллал райондалул Ветуправлениялул каялувчи Будайчи ХIажирамазановлулгу: «ТIутIи Усттаровна бур бунияласса зунттал душнил хасият дусса, цила даву кIанийн дуртун дувайсса хIакин. Вихьва бусан, Ккуллал райондалий, ва ца ТIутIи бакъа, бувагу бакъар гъаттарал хIакиннал кIулшиву ларсъсса хъамитайпа. Мунияту жучIа ванил хъунмасса хIурмат буссар».
Жувагу чIа учинну ТIутIин тIутIал ттюнгъашиву, арс-душваран тIайлабацIулийсса ташурду ва дакIниймур бартлаглагисса чIярусса кьинирду.
