Дурмур чIярур, данмургу хъиннура къачанни

[dropcap]Ф[/dropcap]евральданул 20-нний МахIачкъалалив Национал библиотекалий хьусса ДР-лул Культуралул министерствалул коллегиялий ва ведомствалул 2017 шинал дурсса ва 2018 шинал дувансса давурттал хIасиллу ва планну дунни.


Бадрижамал Аьлиева
[dropcap]Б[/dropcap]атIаву дайдирхьуна Къизлардай хьусса апатIсса ишираву ливтIуминнал аьпалун минутIрайсса пахъ багьаврия.
Министерствалул дурсса давурттаясса доклад бунни ДР-лул культуралул министрнал буржру чIумуйну биттур буллалисса Зарема Буттаевал. Мунил бувсунни ларгсса шинал Министерствалул агьаммур гуж тIайла бувшиву гьунар бусса оьрчIащалсса ва жагьилтуращалсса даврин, халкьуннал аслийсса культура дуруччаврин, музейрдал ва библиотекарттал даврил, регионнал ва халкьуннал дянивсса арарду цIакь даврин.
Ларгсса шинал Дагъусттан, культуралул давуртту хьхьичIу­ннай нани даврицIун бавхIуну, бувхссар хьхьичIунсса ацIра региондалул сияхIравун (ТОП-10). Министрнал чIурчIав дурунни ларгсса шинал культуралул оьр­мулуву хьусса иширттай, щаллу дуван бювхъусса проектирдай, республикалул коллективирттал цайми регионнайнсса ва чил билаятирттайнсса аьрххирдай.
Гихуннай цIакь дунни ва шинал дувансса давурттал план.
Ахирданий ДР-лул ХIу­куматрал чулухасса ХIур­матрал грамотартту дуллунни культуралул аралуву хьхьичIунну зузиминнан. Миннавух бия Респуб­ликалул Халкьуннал творчествалул къатлул информациялул щаллушиндаралсса бувайсса отделданул хъунмур, Уриннал шяравасса ХIабибат Закуева ва халкьуннал творчествалул отделданул пишакар, Гъумучатусса Жамиля Ханова.
ДР-лул Культуралул министерствалул чулухасса грамотарттугу дуллунни хьхьичIун ливчуминнан.