Яла архмур мизит

[dropcap]А[/dropcap]рхангельскалий цIу­буккан бунни Аьрасатнаву ухссавнил чулданий яла архмур мизит. Ва 1902 шинал шагьрулул бусурман агьулданул хIарачатрайну бувсса мизит бур цуппагу. 1931 шинал мизит буллуну бур паччахIлугърал идаралухьхьун. Яла ва ччувччуну бивкIун бур, 2002 шинал цIубуккан бувансса хIукму бувну бур. Мизитравун чак­лийн 500 инсан лагайсса ур.

Исландиянаву – цIардан къадагъа

335 азара инсан яхъанахъисса Исландиянаву ув­сса чIивитIун дизансса цIа язи дугьан аьркинну бусса бур паччахIлугърал комитет­рал дизан ихтияр дуллали­сса цIардал сияхIрава, нинугу, ппугу Исландиянал граждантал бухьурча. Ччимур цIа дизансса ихтияр дусса дур анжагъ кьатIаллил билаятрал граждантурахь. Вай гьантрай къадагъа дирхьуну дур славяннал дянив машгьурсса Андрей тIисса цIа дизаврин. Му грекнал цIа исландиянал мазрал чичрулул кьаралдануцIун даркьусса дакъану тIий. СияхIравун руртун дур му цIанил цайми вариантру. Андреан, Андреас, Андэ, Андрес ва исландиянал цIа Андри.

Суратирттай бакъа къаккавксса
марххала

Африканаву, ххюцIалла шинал лажиндарай марххала къабувсса Марокколий мар­ххала бувну, агьали ххарил лехлай бусса бур. Дяркъу духьурчагу, инсантал, марххал­ттаний тамаша буллай, чанардай бигьлай, гуржай буклай, мар­ххалттания неъмат ласлай бу­сса бур. Метеорологтал бур Ухссавнил Европанавасса бявкъусса гьава бивнур Марокколий марххалтту бувсса тIий. ЧIявуми агьалинан, суратирттай бакъа, уттинин мар­ххала ххал хьуну бакъар.

Даниянаву – ххуйсса дуснакь

Яла къулаймунин ккаллийсса дуснакь бувну бур Да­ниянаву, Гундслев тIисса шагьрулия арх бакъа. Камерардаву бусса бур холодильник, телевизор, шкаф, къулайсса кровать, чичрурду дай стол, ванна. Дуснакь бувминнан кухнилий цанна ччисса дукра шахьан бучIину бур. Бусса бур ххуйсса багъ, килиса, спортзал, бигьалагай парк.

ХIадур бувссар
П. Рамазановал