[dropcap]Ф[/dropcap]евральданул 19-нний ДР-лул БакIчинал кIанайма Владимир Васильевлул Къизлардай дунни апатIсса иширттацIун дархIусса батIаву.

[dropcap]Б[/dropcap]автIминнал хьхьичI ихтилат буллай, республикалул каялувчинал кIицI бунни бухIан захIматсса, хажалатрансса иш хьуну бушиву. «Лаласун къашайсса, бувчIин захIматсса иш хьуну бур. Му так ца Къизлардайн щилащисса иш бакъарча, му бур щалва Дагъусттаннайнгу, Аьрасатнайнгу щавщи биян буллалисса апатI. Гьалбатта, мукунсса ишру буллалиссар инсантурал дянив дичаву дуван, инсантал данди буккан буван, питна буван. Амма мукунсса иширттайну миннал мурадру къабартлагай­ссар, агарда жува ми иширттайн къаршину бацIарча», — увкунни Владимир Васильевлул. Мунал мукунма бувсунни инсантуращалсса давурттах къулагъас ххи дан аьркиншиву. Яла-яла ми давурттавух хIала духхан дуллан аьркинссар жяматийсса организацияртту.
ДР-лул БакIчинал кIанай­манал увкусса куццуй, му апатIсса иширал Аьрасатнаву чIявусса инсантал къайгъурдахун бивчуну бур.
Жижарартту бувкIунни Москавуллал ва щала Аьрасатнал Патриарх Кириллуяту, Аьрасатнал Муфтийтурал советрал председатель Равил Гайнуттиннуя. Циняв регионну жижара буллай бур. Му куццуй жула чIарав бацIаврил жунна хъуннасса агьамшиву дуссар, — увкунни республикалул каялувчинал.
БатIаврий ихтилатру бунни мукунма ДР-лул Халкьуннал Мажлисрал председатель Хизри Шихсаидовлул, Дагъусттаннал Муфтий АхIмад-хIажи Аьбдуллаевлул, Къизлардал къазахътурал округрал атаман Валентин Ивановлул.
Циняв ихтилатчитурал, ца зумату кунма, Къизлардай хьусса апатIсса иширан бивщунни цава ца кьимат: уттинин республикалий къархьусса тахсиркаршиву даврил мурад бур цаннайн ца щун бан личIи-личIисса диннал инсантал. Гьарца ихтилатчинал бувсунни хIадурну бушиву, цачIун хьуну, региондалий дакьаву ва паракьатшиву цIакь даврил ххуллийсса давуртту дуллан.