[dropcap]Ф[/dropcap]евраль зурул 2-нний ЦIуссалакрал райондалий, Чараваллал ва ЦIуминалийсса ЦIуссачIурттащиял школарттай хьунни республикалий баян бувсса Дагъусттаннал шаэртурал назмурду ниттил мазрай пасихIну дуккаврил конкурсрал райондалиймур этап. Шикку гьуртту хьунни 11-ми классирттал дуклаки оьрчIру. Конкурсрал мурад бия дуклаки оьрчIавусса гьунарду ялун личин баву, миннаву ниттил мазрахсса ччаву ххи даву.
Конкурс тIитIлай, КIулшивуртту дулаврил управлениялул вакил, Пионертурал къатлул директор Пакият Гаппаевал барча бунни конкурсантътал ва чIа увкунни миннан тIайлабацIу. Ванил бувсунни февраль зурул 21-нний хьунтIишиву республикалул конкурс ва муний гьуртту хьун гьантIишиву райондалий хьхьичIунсса кIанттурду бувгьуми.
Ихтилатру бунни жюрилувусса лакрал, чачаннал ва яруссаннал мазурдил методобъединениярттал каялувчитурал.
Хъирив дуклаки оьрчIал бувккунни лакку мазрайсса, яру мазрайсса ва чачан мазрайсса шеърирду. Жюрилул хIасиллу дурну, лакку мазрай шеърирду бувккуминнаву цалчинсса кIану бувгьунни ЦIуссалакрал 1-мур школалул дуклаки душ Кьурбанова Шагьидатлул, 2-сса кIану бувгьунни ЦIуссаккуллал 1-мур школалул дуклаки душ Рамазанова Каринал, 3-сса кIану – Чапаевкаллал 1-мур школалул дуклаки душ АхIмадова Кабиратлул ва Гьамиящиял 1-мур школалул дуклаки оьрчI Жабраилов Аьбдуллал.
