Ца шинал хьхьичI ттун, Ккуллал райондалийсса «Илчи» кказитрал корреспондентнан, ччан бивкIуна цумур-бунугу райондалийсса ца школалий «литературалул кружок» тIиртIуну, га дачин дуван.
Мукунсса пикри хьуна ттун, школалул дуклаки оьрчIру ттучIанма, цала чивчусса шеърирду, макьалартту кказитрай рища тIий, занай бушаврийн бувну. Ва ттула пикрилия на бувсъссия Ккуллал райондалул УО-лул каялучинахь. Ганал ттухь: «Ина педагог акъара», — куна. Нагу яла «аьвкъунав». ХIатта нава кIива луттирал ва «Илчи» кказитрай рирщусса азарунния лирчусса макьаларттал ва цаймигу журналлай, кказитирттай итадаркьусса макьаларттал автор унува, ттухьхьун ихтияр къадуллуна литературалул кружок дачин дуван.
Уттигъанну «Илчи» кказитрал 1-мур номерданий дурккунни Роза Эльдаровал ва Сулайман Мусаевлул ниттил мазран хас дурсса макьалартту. Мунияту га литературалул кружокрай нара цалчин дишин дакIний ивкIсса дарсирай оьрчIахь бусан ччай ивкIмунищал кIул буван пикри хьунни кказит буккулт ва дуклаки оьрчIру.
Инсан дунияллий лявхъуну махъ буклан бивкIун бур зуматусса махъру. Гай махъру личIи-личIину баллалаврил жухьва буслай бур инсантал жула дунияллий личIи-личIисса кIанттурдай, билаятирттай яхъанай бивкIшиву ва уттигу яхъанай бушиву. ЧIун наниссаксса хIасул хьуну бур гай инсантурал цала-цала мазру. Мукун – жула лакку мазгу. Оьрмулул кьинирдал чIун данди дацIлай дур шеъриятрал дунияллийн. Учиннуча, пикри бувсса чIумал, жула кьинирдаву янин чIалай бакъар шеърирду. Амма инсаннал аькьлу-кIулши мукунсса дурхха, га ляхъан дуллай, сакин дуллай ур кIилчинмур дуниял. Га дуниялгу хъанахъиссар исвагьисса литература. Жува ганийн ялагу учару «художественная литература» куну. Вайнна ганил журарду: шеърирду, хаварду, кьиссарду, романну, пьесарду, эссерду, магьри ва м.ц.
Ци-дунугу дуллан ччисса чIумал, инсаннал, ганиясса ихтилатругу чан бувну, га дакIнин ччимур дуллан аьркинссар. Инсан дунияллийн уккайссар марцIсса «чIапIину». Аьлимчуну, чичуну, шаэрну, космонавтну, учительну, усттарну, цукун-дунугусса даврил инсан най унува къаикIайссар. ТIайлар, генетиктал бур инсаннаву Аллагьнал буллусса 5% пагьмулул бикIайссар тIий. Гайми 95% давулийну, дуккаврийну, захIмат баврийну бакIуйн буккан буван бюхъайссар тIар. Бюхъай мукун бикIангу.
Мунияту нава тIисса кружокрал мурадну хъанахъиссар зуву, оьрчIаву, душвараву, чичрулул чулийннайсса ччишиву цуксса хъуннасса дурив кIул даву. ТачIав щищачIав къашайссар инсаннан цанма къаччимур ялув бухIан. Шеъри ляхъан буван, макьала, хавар чичин лахьхьин буван къашайссар. Шайссар гайннучIансса ххуллу ккаккан буван. Буссар классикалул зумунусса ца далил: «Ккашилнан балугъ цуппа къабуллуну, га бугьайсса куц лахьхьин бува», — тIисса. Нагу хIарачат буванна ттунма кIулмур зухь кIибачIин. Умуд бур жула иш бакIуйн букканссар тIисса.
Шеъри, макьала, пьеса чичин шайссар бакIравусса пикрирдал «хьхьури» итадаркьуну, дакIниймур аьч булларча. Ялагу кIицI буван ччива, литература ссахунчIав, царагу касмулухун, къадахчайссар.Тула шагьрулий троллейбусрал паркраву бухгалтерну зий ивкIссар Борис Чичибава тIисса хъунасса оьруснал шаэр. На буккав ттучIавасса луттирдаву жула Ленин ивкIшиву, Ссибирнавун тIайла увксса чIумал, шеърирду ляхъан буллай. Юрий Андропов, КПСС-рал генеральный секретарь, ивкIун ур шеърирду чичлай.
Мукунсса мисаллу чIявусса бур. Мунияту дугьияра зунна ччисса касму, амма шеъриятрал, макьалартту чичаврил зул кIулшиву, дакIнил дуниял хъиннура авадан дувантIиссар, хасият ххуй хьунтIиссар, инсантал, тIабиаьт хъиннура ччан хьунтIиссар.
Лажин хIадур дурссар
ХIажимурад ХIусайновлул
