Мажидлул душ МахIаммадова Роза
Уттигъанну аьпалул хьунни оьр­мулуву, кулпатраву, гъан-маччанал ва жяматрал дянив хъинну бавкьу­сса, тIул-тIабиаьтрал, мяърипатрал чулуха лащу-щаллусса, захIмат ххирану ва лайкьну оьрму бувтсса, ЧIяйннал шяраватусса Мажидлул душ МахIаммадова Роза.
Бувну бур Роза ЧIяв 1937 шинал апрельданул 10-нний. Цила оьрмулул дус Ризваннущал ванил 65 шин хьуссия цаннал ца лахъа-хъун буллай, нахIуну-хIалалну ялапар хъанай.
Вайннал хъуни бувссар 5 оьрчI, вайннаятугу бивзссар хъунма­сса ххуйсса наслу. Биялсса хIаллай Роза зий бивкIун бур Каспийскаллал общепитрал аралуву хъунмур цIигьурну. Цила кулпатрангу, уссур­ссуннангу, чIахху-чIарахнангу Роза дакIний личIантIиссар оьрму ххирасса, дакIнил хъинсса, ас-ламус бусса нинуну, кулпатну ва иман ххисса инсанну.
Цил гьав нурданул дуцIиннав, алжан нясив бувну лякъиннав.
Роза бивкIулул шаврил пашманшивугу кIидачIлай, дакIнихтунусса жижара буллай буру ласнахь, оьр­чIахь, оьрчIал оьрчIахь ва махъсса цинявппагу гъан-мачча­миннахь.

ЧIяйннал жямат

---

Кьубиял Мусттапанал аьпалун

Вин ххирасса ссувагу,
Вийн оьвтIий, аьтIийнма бур,
Вил аьзиз щарссанилгу
Яру къявхъа тIийнма бур.

Вил ххирасса оьрчIругу
Нузахун ялугьлай бур.
Яттийн ххалаххи бувну,
Ппу зунттату учIаннин.

Вийн цIуцIаву щуникул,
Дуаьлий бия кулпат:
«Арнивух дуккай ликри
Гъагъан мадара, Зал!» — тIий.

Ва чаннасса дуниял
Ца-цанналгу кьадиртссар,
ДикIувча кьупIа тIийнна
Вил аьзизсса щарссагу.

Алжаннул ххари аннав,
Гьав нурданул дуцIиннав,
Вин къабуллусса оьрму
Ххира оьрчIан булуннав.

Гъазиева Бахттун,
ш. ЧукIун