[dropcap]Г[/dropcap]ьашину июнь зуруй, Аьрасатнал халкьуннал Ассамб­леялул советрал хIукмулийну, ду­ван­тIиссар Аьрасатнал яла миллатру чIявумур жяматийсса ккурандалул 20 шинал юбилей. Июль зуруй хьунтIиссар, ва юбилейран хас дурну, Аьрасатнал халкьуннал конгресс. Тикку агьаммур докладгу бувантIиссар конгресс­рал хIурмат лавайсса председатель Рамазан АьбдуллатIиповлул.

П. Рамазанова
Дагъусттан Республикалулгу гьурттушинна дувантIиссар юбилейрал мероприятиярттай. Юбилейран хасну дувантIиссар таман­сса давуртту. Миннуву ца агьаммурди миллатирттал кказитирттащал уртакьну дуклаки оьрчIал дянив сочиненияртту чичаврил конкурс баян баву. Конкурсрай гьур­тту хьунтIиссар 5-11-ми классир­ттал дуклаки оьрчIру. Сочинениялул темагу хъамал ххирашивруцIун, хъамаллурал хIурмат бушивруцIун дархIуссар: «Куначество – основа единства наших народов».
Конкурс январь зуруй дайдирхьуссар, апрель зуруйнин найнна дикIантIиссар. Гьарцагу миллат­рал кказитрал конкурсрал хIасиллу дувантIиссар май зурул ахирданий. Язи дургьуну яла ххуйми сочиненияртту, тIайла дуккантIиссар кIицI лавгсса Ассамблеялул советрайн.
Ххув хьуминнан дулунтIиссар ХIурматрал грамотартту ва кьимат­райсса бахшишру.
Жул хъунмасса миллат бур, лак­рал шяраваллавусса, шагьрурдай­сса школардай лакку мазрал дарсру дихьлахьисса учительтурахь, ва конкурсраву гьурттушинна дувара, дарсирдай оьрчIру сочиненияр­тту чичин бувну, миннувату ххуйми язи дургьуну, тIайла дуккияра редакциялийн. Сочиненияртту, гьай-гьай, лакку мазрай чичин буварча, хъина. Амма оьрус мазрай чирчумигу кьамул дуванну, жура таржума дурну рищунну кказитрай.
[dropcap]А[/dropcap]гарда учительтуран сочиненияртту электрон адресрай гьан дуван къулайну бухьурча, ва адресрай гьан дан бучIиссар: patimat_ramazanova1968@mail.ru
БучIиссар «Илчилийн» тIайла дуккан кказитралмур электрон адресрайгу: ilchi 1992@mail.ru
Конвертраву почталийх тIайла дуккан ччай бухьурча, гьан дара ва адресрай: 367018, г. Махачкала, пр. Насрутдинова, 1а, 3-й этаж, редакция газеты «Илчи», на конкурс «ЧIимучIали».
Жу цурда ца сочинение къулагъас къадурну къакьаританну.
Ялугьлай буру зул сочинениярттах.