Лагабургъилгу кув чIумал гъили айссар

[dropcap]Б[/dropcap]уттахъул аьрая зана къавхьуну, ятинну ливчIсса, оьрчIшиву дяъвилул шиннардийн тIайла дарцIусса ва мунияр махъсса ккаши-мякьсса чIумал чIярусса захIматшивуртту ккарксса оьрчIал никираясса ур Вихьуллал шяравасса Рамазаннул арс ХIусман ХIаммаккуев.


Андриана Аьбдуллаева
[dropcap]З[/dropcap]ахIмат-жапасса оьрмулул ххуллурдай цала яхIгу, къириятгу дурурччуну, лайкьсса оьр­му бувтсса инсантал бур сайки циняв ва никирал оьрчIру. Дяъвилул гьурттучитурая ливчуну махъ, хIукуматрал ххишаласса къула­гъасрайн ласун аьркин­сса инсантал бухьунссар вай тIий бура. Цуманах вичIи диширчагу, чIивисса оьр­мулуву вайннал бувсса захIматрал хIат-хIисав дакъар.
Увну ур ХIусман 1937 шинал Вихьуллал шяраву. Хъунма­сса Буттал кIанттул цIанийсса дяъви байбивхьусса чIумал, ХIусманнун дахьра 4 шин диркIун дур.
— ХIакьину кунма, дакIний бур нава, ца дагьанигу дургьуну, ганивух уруглай ияв. Бутта дяъвилийн увцуну ур тIий, аьтIий бия ттуярва хъунисса кIива ссугу, бавагу. Ттул бутта яттичIа Агъач-ауллай ивкIун ур, гихава увцуну ур аьрайн, — буслай ур ХIусман.
УрчIва зурува Рамазан шавай увкIун ур. Га циван увкIун ивкIссарив, цукун итаавкьуну ивкIссарив дяъвилул цIарава ХIус­маннун кIулну бакъар.
— ДакIний бур, буттал хъазамрай цIай-цIай тIисса медаль дия. Награда ларсъсса аьралитуран ца-кIива гьантлийсса отпуск дулайсса диркIун дур, мукун отпуск дуллуну увкIун ухьунссия тIий ура. Нюжмар къархьуну, хьхьувай советрайн оьвкуну, гьунттий ачин хIадур хьу куну бия. КIилчин увцуну махъ къабувкIссар я чагъар, я тил. ЯтIа-тIар бакъа акъахьуминнавух дур буттал цIа. КIулну бур га Сталинградуллахсса талатавурттаву, Мамаев Кургандалий гьуртту хьушиву, — тIий ур арс.

[pullquote]Арулва оьрчIгу махъ кьабивтун, аьпалу­хьхьун лавгун бур ванал кулпат Ххадижат. Му чIумал вай­ннал хъунма-хъунмур душ 8-мур классраву дуклай бивкIун бур, чIана-чIивима арс шин ва дачIиннувусса оьрчI ивкIун ур. Нину ва ппу сагъсса чIумалгума 7 оьрчI ччаннай бацIан бан бигьа бакъар. Хьун­ссия ХIусманнуща, ччан бивкIния, щар дуцингу. Амма ванан оьрчIан бутталщар ккаккан дан ччан къабивкIун бур. [/pullquote]
Дяъвилия махъсса шиннугу хъиннура захIматсса диркIун дур. ЧиваркI чIявуми аьрайн бувцуну, миннал даймур дуллай, хъунна­сса хъар лахъан багьну бур ХIусман кунмасса чIава жагьилтуран. Школалия тIайла увккун, Сулакьрал даралуву балугъирдаха зий ивкIун ур. Шярава цала маэшатрал хъирив шагьрулийн увкIун махъгу ва тIайла увккун ур зун архсса Камчаткалийн. Таний, ччайнугу, къа­ччайнугу, хIукуматрал тIайла бувк­нийн лагайсса бивкIссар. Бявкъу­сса кIанттурдай, хьхьирийсса даву, гьай-гьай, бигьасса дакъахьун­ссия.
— Балугъру бугьлай бикIай­ссияв. Вертолетру лерххун, жухь цумур кIанттурдай балугъ бу­ссарив бусайва. ПароходрацIун синттарал къаяхъ дархIуну, къертту дичлай, бугьлан бикIайссияв. Гьантлун 4-5 рейс дурсса чIуннугума шайва, — буслай ур ХIусман.
Камчаткалия зана хьуну махъ щаргу дурцуну, Вихьуллал колхозраву зун ивкIун ур. ХIусманнул дукъадайсса даву къадиркIун дур: гъайтIий, ххулув буцлай, къалмул складирттал къарал буллай икIайсса ивкIун ур, архIала хъунна­сса цаламур хозяйствагу дачин дурну. Аьмну 40 шин дурну дур ХIусманнул колхозраву зий, миннува 12 шин – Бабаюртуллал райондалийсса Вихьуллал колхозрал къутандалий.
Амма яла захIматми чIунну ванал оьрмулуву дайдирхьуну дур яла махъ. Арулва оьрчIгу махъ кьабивтун, аьпалухьхьун лавгун бур ванал кулпат Ххадижат. Му чIумал вайннал хъунма-хъунмур душ 8-мур классраву дуклай бивкIун бур, чIана-чIивима арс шин ва дачIиннувусса оьрчI ивкIун ур. Нину ва ппу сагъсса чIумалгума 7 оьрчI ччаннай бацIан бан бигьа бакъар. Хьунссия ХIусманнуща, ччан бивкIния, щар дуцингу. Амма ванан оьрчIан бутталщар ккаккан дан ччан къабивкIун бур.
— Ттуршуннийн бивсса яттил хIайвант, кIива-шанма оьл, къячри ябуллай ивкIра, дука-хIачIанмур цичIав чан хьун къадиртссия. Ттун пикри бия оьрчIру ччаннай бацIан бан, дуккин бувну, касму лахьхьин дурну, инсантуравун буккан бан, — тIий ур ХIусман.
Жула учай, «ххяххабургъил гъили къаувма, лагабургъил гъили къаайссар» куну. ХIусманнив лагабургъил гъили увну ур. ОьрчIшиву, жагьилшиву захIматсса диркIнугу, хIакьину оьрчIалгу, миннал оьр­чIалгу вив лавсун, хъихъи ивтун ур. Ва рязину ур цала захIмат зия къабувсса, тIайла бавцIусса оьрчIая.
Ванал шамагу арс органнай зий ур. Душругу цала-цала давурттай хьхьичIунну, бусравну бур. Ххарину ур ва оьрчIал оьрчIаягу. Так хIайп тIий ур вай ккакканнин цала кулпат къаличIаврий.
Ва макьала чичлачисса чIумал кабинетравун увхсса Ккуллал райондалийсса жула корреспондент ХIажимурад ХIусайновлухь вил шяравучуная чичлай бурахха, ци ххи банна увкуссия.
— Ххаллилсса адаминар. Хъин­­мари. Ца чIивисса затралгу чIалачIи айссар инсан цукунсса уссарив, — куну, ХIажимурадлул бувсунни ХIусманнуцIун бав­хIусса 4-5 шинал хьхьичI хьусса ца иширая:
— Ттул ппу Шяъван, хIаятрал чIира багьну, чIира бансса ус­ттар къаляхълай ия. Ца шяравучунал бия мунахь ХIусманнухь уча куну. Угьарасса инсаннахь чIира бува тIунгу намусну буна, цама цучIав акъа, бутта ХIусманнучIан лавгуна. УвкIун, кIира кьини зий, чIирагу бувну, лавгуна, ца кIапIикI арцулгу къаларсун. Арцу къаларсукун, бу­ттан ка духхала дан ччан бивкIун бия, амма ХIусманнул цичIар кьамул дурну дакъая. Гьарица инсаннал чIарав ацIан чялишсса, цащава шаймур бан ччисса адамина уссар, — куну, бувсунни ХIажимурадлул.
— Вищала инава ливчIсса чIумал ссал пикрирдай икIара, — куну, цIувххукун, ХIусман ур жула ялун нанисса никирал буруккинттарай ушиву буслай.
— Щил-бунугу аькьлулийх лавгун, нитти-буттан дард ккаккан дуллай бур цаппара оьрчIру. Бяйкьу ххуллийн бувкми тIайла бавцIуну ччива, — тIий ур ХIусман.
Гьашину ХIусманнул оьрмулул 80 шин бартлаглай дур. Му чIумул лажиндарайсса ванал оьрмулуву дахIалай учинмур ххишаласса бур хIайп учинмурнияр.