[dropcap]Л[/dropcap]аргсса шинал декабрь зуруй Дагъусттаннал телевидениялий дуркссия Хасавюртуллал райондалиясса Ссуравчиял (Сулевкент) шяравасса дуклаки оьрчIал дуллалисса роботирттаябусласисса передача. Ссуравчиял шяраву Аьлибулат Аьлибековлул роботру даврил гьунар бушиву хьхьичIава аьлттту хьуну бур.

[dropcap]Ч[/dropcap]Iава жагьилнал гьунардания цанма баяйхту, ДР-лул захIматрал ва социал хьхьичIунмайшиврул министрнал буржру биттур буллалисса Расул Ибрагьимовлул тапшур бунни «Успех» центрданул директор Шамил МахIаммадовлуйн ванащал хьунабакьин.
Шамил МахIаммадовлул, Аьли­булатлул учитель Артур Мажидовлуйн оьвкуну, ЗахIматрал министерствалий хьунабакьинсса кьутIи дунни.
Хьунабавкьуну, ихтилат бувну махъ, дуклаки оьрчIащал ва мунал учительнащал вай лавгунни «Квантроиум» тIисса оьрчIал технопарк­равун. Технопаркрал директорнал бунни экскурсия ва ккаккан бунни шивусса ххювагу секция. Аьли­булатлуйн, цала гьунар хъиннува итххяххан баву мурадрай, оьвкунни технопаркраву дуклан.
Му бакъассагу, ванахьхьун ихтияр дуллунни, «Жагьилсса пишакартал» тIисса региондалул lll-мур чемпионатрай гьуртту хьуну, цала гьунарду ккаккан бувансса.
ОьрчIал гьунарданун кьимат бивщуну махъ, «Успех» центрданул зузалтрал хIарачатрайн бувну, Аьлибулат Аьлибеков дуклан гьан унни итххявхсса оьрчIансса респуб­ликалул лицей-интернатравун. Ва интернатраву Аьлибулатлуща бюхъантIиссар чIал къавхьуну хьунтIисса чемпионатрайн хIадур хъанан.

ХIадур бувссар
Имара Саидовал