[dropcap]Л[/dropcap]аргмур шинал ахирданий, махъра-махъсса нюжмаркьини, рес­публикалул бакIчинал буржру биттур буллалисса Владимир Аьбдуаьлиевич Васильев хьунаавкьунни дахьва цIу буккан бувсса Дагъусттан Республикалул бакIчиначIасса (Совет старейшин при Главе Республики Дагестан) Хъунисриннал советращал.

Качар ХIусайнаева
[dropcap]С[/dropcap]оветрал хъунама Аьбдулла Аьбдуллаевич МахIам­мадовлул баян бувна батIаврил савав, В. А. Васильевлун, Советрал члентуращалгу кIул хьуну, гай цIу шинал байрандалущал барча бан ччишиву ва цала дурсса ва дан дакIнийсса давурттая жухьвагу бусан ччай ушиву. Лахъи бакъасса цала ихтилатраву Аь. МахIаммадовлул, В. А. Васильевлул къуллугъгу, ялун дирсса шингу барча дурну, бувсуна республикалул халкь цIусса, хайрданунсса дахханашивурттайн умудрай бушиву. «Вин ххира хьунтIиссар гьар чулуха хIарачат бусса, итххявхсса, дакI-аьмал ххуйсса дагъусттаннал халкь. Вин ккаккантIиссар жу оьшиврия, энадрая архсса инсантал бушиву», -увкуна Аь. МахIаммадовлул. Бувсуна Хъунисриннал Советравун бавтIун бушиву бусравсса, жаваблувсса къуллугъирттай чIярусса шиннардий зий бивкIсса, республикалул иширттай ва халкьуннай хIакьинугу дакI цIуцIисса инсантал.
— [dropcap]А[/dropcap]мма вайннал буллали­сса маслихIатирттах хъуниминнал чулуха ттинин ккалли дан­сса къулагъас диркIсса ххай ба­къару, — куна Хъунисриннал советрал хъунаманал. Бувсунни цIусса хIукуматрал хъуниминнал му кIантту цанма кумагран ишла банссар тIисса умуд бушиву. В.А. Васильевлулгу гиккура тIалав дуруна му маслихIатирттал сияхI, ва кумагчинайн амру бувна ххал дигьин ва ишла дансса сант лякъин.
Яла В. А. Васильевлул бувсуна 10 шинал хьхьичI цува Да­гъусттаннайн ивсса чIумалнияр республикалул ишру биялну ххуй чулийнмай баххана хьуну чIалай бушиву цанма, хъунмасса хIарачат бувшиву цаярва хьхьичIминнал республика захIматсса иширттава личин дан. В. В. Путиннул цайва бивхьусса бурж лажин кIялану биттур бан цувагу хIадурну ушиву. «На Дагъусттаннайн учIайхту, чIявусса халкь на къуллу­гъирттая халкьру букьан буллай улукьиннин, личIи-личIисса танмихIирттайн къуллугъчитал кIункIу булланнин ялугьлай бия. Амма ттунгу, ттущалминнангу цал куртIну гьарзатрал хъирив лаян аьркинну бия. Республика гьалак дуккан дуллан аьркиншинна дакъая. Ттун чIалай дур дурмургу, дан аьркинну дунура, къадурмургу, дан къааьркинну дунура дурну диркIмургу. ЧIун дур хъирив лаянсса. Аьркинну бухьурча, тахсирлувтал танмихIрайн кIункIу банссагу», — увкуна ванал.
В. Васильевлул цала ихтилатраву буцлацисса мисаллайну, кIицI лаглагисса цифрардайну чIалай бия ваначIа диял­сса ва хIакьсса информация душиву, сайки гьарзатрал хъирив хъинну цIакьну лавну ушиву. Дагъусттан дурккусса, пишардаву усттарсса кадрардал авадансса республика дур. Чувнияргу жагьилтал чIявусса кIану бур. ЗахIмат ххирасса, дан-дитан кIулсса, дурккусса, давриву ус­ттарсса халкь бур Дагъусттаннай», — увкуна Васильевлул. Ванан кIулну бия халкь хъинну рязи бакъасса масъаларттугу, аваданминналгу, мискинминналгу дянивсса тапаватшиву жучIара хъиннура иттав ххяхлахисса душиву. «Гьарца хьумунил хъирив лаян республикалийн даву канилух дурксса, авторитет дусса 38 прокурор ва 40 ревизор тIалав увну уссар. Ми инсантал ятсса, Да­гъусттаннай щилчIав гъан-мачча, дус-къардаштал бакъасса бушиврулгу бусласи­ссар даву багьайкун дантIишиву. Дагъусттан, тIабиаьтрал бикIу, инсантурал гьунар-хIарачатрал чулуха бикIу, ххишала дакъа авадансса республика душиву чIалай бур. Цайминнал даврил опыт ххал бигьин жу бивру, масалдаран, Татарсттаннайн. ЧIявусса затру лаласарду жучIавагу хайрданун ишла бан бюхъансса. Жула ватан тIутIайх дичин дан циняв хIала бувххун, зул, бусрав­сса хъунисриннал, кумаграйнугу жува хIарачат бан аьркинссар, бугу бантIиссар», — куна В.А. Васильевлул.
[dropcap]Х[/dropcap]ъирив кутIасса махъ ла­хъансса ихтияр дуллуна Совет­рал кIия-шама уртакьнахьхьунгу. Миннавух му хIурматран лайкь хьура нагу. Ттула чIивисса мукъуву на миннат бав, цала В.А. Васильевлул кIицI лавгсса куццуй, итххявхсса, гьунар бу­сса, бакI-чурх ххуйсса жула жагьилтал, кьисматрах луглай дунияллийх ппив къахъананшиврул, «вацIравух» къазананшиврул, вайннан цала кьисмат цала ватандалий дузал хьунсса сант лякъин.
[dropcap]А[/dropcap]лчиев Николай Юрьевичлул дакIнийн бувтуна республикалий хIасул шайсса электроэнергиялулссагу, газралссагу идарартту къабагьавай республикалул дазул кьатIув Пятигорскалийн, масалдаран, буккан бувну бушиву ва гай чара бакъа махъунмай зана битан аьркинну бушиву. Му чIумал жучIара датIайсса налогирттал лагругу хъун хьунтIиссар, куна ванал.
Ихтилатру бан ччи­сса чIя­в­усса бия. МаслихIатру цIу­ну республикалул бакIрай авцIу­манахь бансса чIявуя. Амма В.А. Васильев, шинал ахирданул аварасса чIумуву, цамур агьамсса мероприятиялийн анаварну ия. Баян бувна цува кьинибархан хъунисриннал маслихIатирттах мюхтажну вичIи дишин хIадурну ушиву цIусса шинал январь зурул цания ца кьини.
Советрал даву, В.А. Васильев лавгун мукьахгу, лахъи ларгуна Председательнал хъиривчу Сиражуттин Илиясовлул каялувшиндаралу. Барча дуруна цIунилгу цаннахь цаннал ялун нанисса ЦIусса шин. КIул бувна цIуну Советравун кьамул бувминнащал. Ххал бивгьуна цаппарасса Советрал документру, дансса, гьуртту хьун­сса хIукуматрал давурттал ва иширттал сияхI.
[dropcap]Ш[/dropcap]иккува кIицI лаган, рес­­публикалул бакI­чи­на­чIасса Хъунисриннал советрал 49 инсан усса сияхIрай 6 ла­ккучу ур: Илиясов Сиражуттин МахIаммадович (Советрал председательнал хъиривчу), Аьбдуллаева Халла Оьмариевна, Абакаров Рапи Аьбдуразакьович, ХIусайнов АьвдурахIман ХIажиевич, Магьдиев Дани­ял МахIаммадаьлиевич, ХIу­сайнаева Качар Абачараевна. Мукуна шаннагу лакрал районная ур ца-ца вакил: Оьмаев Кьурбанзабиуллагь Шахшаевич (Ккуллал райондалия), Магьдиев Даниял МахIаммадаьлиевич (Лак­рал райондалия) ва Шагьмаев Мизраб МахIаммадханович (ЦIуссалакрал райондалия).
ТIайлабацIу хьуннав ЦIусса шинаву гьарца ишираву угьаранангу, ва, хъиннува ххишалану, жагьилминнангу. Гьарцанналгу оьрмурдай барачат бишиннав.
Дагъусттаннай лирмур дазинсса, жува тIайлашиврул, буллугъшиврул, нахIу-хIалим­шиврул, талихIрал ва узданшиврул ххуттайн буккан бан­сса ниятрай жула республикалийн Владимир Аьбду­аьлиевич Васильевлул лавсъсса шагу барачатсса, хайрданунсса, тIай­лабацIулунсса лякъиннав.