Цумур-бунугу миллат миллатну личIаврил шартIру хъанай дур, ттул хIисаврай: 1) му миллатрал цила тарихийсса аьрщи (территория) душиву; 2) миллатрал цинмалусса маз бушиву; 3) миллатрал ца дин (ягу идеология),лархьхьусса (ягу гъансса) аьдат-эбадатру душиву; 4) жяматрал сакиншинна, аьдлу-низам нани дурсса органну щалва территориялий царай душиву; 5) щалва миллатрал аьмсса таварих бушиву, чичрулийнусса бакъахьурчагума, буттахъая нанисса бусалардаву, магьраву, учалардаву яхьусса. Вай шартIирдаву агьаммину хъанай дур миллат цила аьрщарай, цачIу яхъанай бушиву ва ца мазрай гъалгъа тIутIаву.
[dropcap]У[/dropcap]тти бурганну лакралмур миллат ци даражалий бурив.
Лакрал аьрщи, Лакку билаят – му бур цIанасса Лакрал ва Ккуллал районну. Ми дур республикалул административ бутIринугу хъанай, циняв аьркинсса идарартту цанма-цанмасса бакъанугу. ЦIулаккуйгу, тичча бизан буллалимур кIанайгу му чулуха тагьар къулайсса дакъар: ЦIулаккуйми чемоданнай щябивкIун бур, авлахърайн бизан бувми къумукьнал райондалувун бухлай бур. Ми кIивагу кIанттурдайсса школарттай ниттил мазру лахьхьаврил тагьар цукунсса дуссарив ттун къакIулли: лакку мазрацIун школардай цайми миллатирттал мазругу (ми гьарзасса бухьурча) лахьхьайссарив-къалахьхьайссарив, идарарттаву зузими ци мазрай гъалгъа тIун бикIайссарив, личIи-личIисса мероприятияртту ци мазрай дайссарив. Мазру буруччавриву вайгу мюршсса масъалартту бакъархха. Арнил лакрал (хаснура микку хъуни хьусса махъсса кIира никирал) тагьар му чулуха аьщуйн щуну кIул дурсса ххай бакъара. Мунияту ихтилат зунттавуми лакраяр.
[pullquote]Цалчинмур классравун лавгсса оьрчIру хIисав бувну, хъунисса, халкь бусса шяраваллу хъанай дур Ккуллал райондалий Ккул (21), Ваччи (12), Хъусращи (8), Вихьул (7), Хъювхъи (6), ЦIущар (5). Махъми школартту бусса 7 шяраву я 1-мур класс бувагу бакъар (1-мур ЦIувкIул, Къян, Хъюйми), ягу миву 2 (СумбатIул, ЦIуйши), 3 (2-мур ЦIувкIул), 4 (ЧIяйми) ученик ур.
Лакрал райондалий яла чIявуми оьрчIру бур Гъумук – 38, яла Щарав ур 9, ГьунчIукьатIув – 8, Хьурив, ЧIарав, ЧIурттахь – ххю-ххюя, Хъурхъив, Кьубав, Ккурклив, КIундив, Урив – мукь-мукьа, ШавкIрав, Карашав, Кумав, Хъунав, Ххюлусмав – шан-шама, Инишав – ца. [/pullquote]
Масъала цамургу бур: вай официалийну, аьлттуну арив бизан бувми бакъа, жула халкь бур кьанивми районнайхгу ппив хьуну: ччарча къутаннай, ччарча Къизлардал ва миччахсса цайми кIанттурдай минарду дирхьуну.
Хъиннува захIматри маз ябан циняв миллатру хIала бувхсса хъунисса шагьрурдай: яла хъинну хьурча, кIира-шанна никирал оьрмулуву ишла къабуллалисса маз бухлаглай бур.
Мунияту лакку мазрал кьадар хъунмурчIин Лакку кIанттуцIун бавхIуну бур – шикку дур гьарца мащилул, щарнил, гьарца зунттул, бакIул, рахIнил, ратIнил, хъачIнил, щаращул цила цIа, щархъаву бур махIларду, тухунну, бугьараминная мюрщиминнайн нанисса бусаларттугу, бухху-буккугу, ккурчIа-чIирахсса хавардугу, хъатIал (чанну хъанай бунугу) аьдатругу – гьаннайсса миллатрал мархри.
Амма Лаккуйгу тагьар халкьуннан къулайсса дакъар. Шяраваллу ххялтIа дуклай дур, халкь бигьанийн бизлай бур. Микку аьй дансса кIанугу бакъар, так дакI аьраттал хъанахъаву дакъа.
Гьашину сентябрьданий дия Ккуллал райондалий ва Лакрал райондалий циксса оьрчIру цалчинмур классравун лавгссарив бусласисса макьалартту. Ккуллал райондалий гьарца школалий цими дуклаки оьрчI уссаривгу ккаккан бувну бия. КIа сияхIрах бургарча, чIалай бур шяраваллаву жагьилми чансса бушиву. Цалчинмур классравун лавгсса оьрчIру хIисав бувну, хъунисса, халкь бусса шяраваллу хъанай дур Ккуллал райондалий Ккул (21), Ваччи (12), Хъусращи (8), Вихьул (7), Хъювхъи (6), ЦIущар (5). Махъми школартту бусса 7 шяраву я 1-мур класс бувагу бакъар (1-мур ЦIувкIул, Къян, Хъюйми), ягу миву 2 (СумбатIул, ЦIуйши), 3 (2-мур ЦIувкIул), 4 (ЧIяйми) ученик ур.
Лакрал райондалий яла чIявуми оьрчIру бур Гъумук – 38, яла Щарав ур 9, ГьунчIукьатIув – 8, Хьурив, ЧIарав, ЧIурттахь – ххю-ххюя, Хъурхъив, Кьубав, Ккурклив, КIундив, Урив – мукь-мукьа, ШавкIрав, Карашав, Кумав, Хъунав, Ххюлусмав – шан-шама, Инишав – ца.
ЧIалай бур жагьилсса кулпатру шяраву Лаккуй хъинну чансса бушиву. Дуккаврил реформа най духьувкун, оьрчIал багъругу дуккаврил системалувун бивчуну бухьувкун, ци тагьар дикIантIиссар мюрщисса щархъаву оьрчIру дуккин баврил? Цукунсса тагьар дуссар оьрчIру чансса классирттаву миннахь дарсру дишаврил? Республикалул цуми идарартту буссар мукунсса школарттан дуккаврил пособияртту буллалисса, мукунсса классирттаву зузисса учительтуран цукунсса шартIру дуссар, миннаягу, минналгу цукунсса тIалавшинну дуссар, миннан цукун кумаг байссар?
ЦIана ттул ихтилат так лакку мазрал дарсирдая бакъар. Мими предметругу мукунсса классирттаву багьайсса даражалий лахьлай бакъахьурча, ци тагьар, цукунсса стимул дикIантIиссар нитти-буттал шяраву бацIан?
Вай масъалартту ххал бивгьуну ччива, дуккаврил каялувшиву дайми хIукуматрал идарарттугу, цивппа учительталгу хIала хьуну. ЧIун-чIумуйсса отчётру, школарттай хьусса мероприятиярттаятусса репортажру дакъа, оьрчIал ва учительтурал даврия, миннал тIалавшиннардая бусларча хъина, кказитрай бикIу, цайми информациялул средстварттай бикIу. Бухьунссархха Лаккуй ххуйсса, эбрат ласунсса учительтал. Бухьунссар личIи-личIисса лахъсса даражартту (категорияртту) буссагу. Жула СМИ-рдаву ми мяйжаннугусса захIматчитураяту чанну бакъа ихтилат бакъар. Аьпабиву, Аьжа Аьбдулгъапурова му чулуха хъинну цила даврий дакI цIуцIисса бикIайва. Лаккуй зузими учительтурал цала даврия буслай ттун хIисав къавхьунни. ЦIукъаххайсса бурвав? ЦIуххиннин къабавцIуну, зува булусияра! Шяраву, буттал кIанай зузиминнай дакъарив жула лакку дуниял дарцIуну дусса? Ххуйри, гьай-гьай, къуллугъчиталгу, артистъталгу, иширал, мукъул заллухъругу, хъунисса даражарттайн лавхъсса аьлимталгу. Ккаланну гъирарай миннаягу. Амма бусиярартал укунмасса инсантураягу – хъуниха, гъаттараха зузисса, оьрчIахь дарсру дихьлахьисса, шяраву мюрщи-хъунисса предприятияртту тIивтIуну, цанмагу, жяматрангу мюнпат буну зузисса. Цукунсса перспективартту дуссар шяраву зун ччиминнан?
Вай так багьу-бизулул масъалартту бакъар – вайри миллат ябаврил хьхьичI ххуттавуми суаллу.
Гьухъалиятусса
Мусихъал Роза
