[dropcap]Н[/dropcap]ава ихтилат буллали­сса цума-цагу инсаннахь чара бакъа цIуххара даврицIун бавхIуну дакIний ливчIсса иширая. Му суал ттухьхьунма нава буллукун, яруннил хьхьичI бацIай дурусну 10 шиналхьхьичI хьусса оьзрусса иш – Дагъусттан Республикалул ПаччахIлугърал хорданул дирижер ва каялувчи,Дагъусттанналгу, Аьрасатналгу магьирлугърал лайкь хьу­сса ишккакку Рамазан ХIажиев концертрая махъ, инфаркт хьуну, сахIналийва къуртал хьусса. Му дия декабрь зурул 25-кусса, гъаралгу сив-сив тIисса бизарсса кIинтнил кьини. ХIажиевхъал ужагърай тIурча, хIадур хъанай бия байрандалийн, концерт къуртал шайхту, гъан-маччацириннайн ва дустурайнгу оьвкуну, ссупралух щябикIан. Амма Заннал чичру га кьини цамур куццуй чирчуну ляркъуна.

---

 

Зулайхат Тахакьаева
«Многие лета» тIисса балайлийну концерт дайлиртIуну махъ чIявусса бия ххаллилсса концерт­рахлу ганахь барчаллагь учин тIутIал кацIурдищал сахIналийн лахълахъими. Душнища, Каринаща тIутIивгу ларсун, щарнил ссил канища ласлай унува, левкьун лавгуна маэстро. Дахьва сахIналийн лавхъсса кулпатрал канивату тIутIал кацIгу щяв багьуна.
КIива «Анаварсса кумаг­рал» машиналий бувкIсса хIакинталгу, Рамазан ХIажиев ххассал ан къабювхъуну, лавгуна. ХIакинтураща бан къабювхъумур цищава бан хьунсса ххай, бакIрацIгу щябивкIун, буттал хъазам ссуку буллай бия Карина. Дуаьртту ккалай бия кулпат. Тамашачитуравагу цуя-ца тинай къавхьуна, цинявппа ялугьлай бия, цирив ца караматсса иш хьунсса кунма.
«Авуршиву бивкIулул. Хьурдай ттунмагу мукунсса бивкIу», — тIий ия лазгиял композитор МахIаммад ХIусайнов. Рамазан дунияллия лавгунни ххарисса ва гьалаксса асардай, аьнтIикIасса дирижернал фрак­раву, дирижернал жиритгу канихьну, тIутIавунгу ахьлавгун.
Рамазан ХIажиев увну ур 1944 шинал февраль зурул 7-нний аьраличунал кулпатраву. 1958 шинал Ваччиял арулла шинал школа къуртал бувну, увххун ур МахIачкъалаллал музыкалул училищалул хорданул дирижер шайсса отделениялийн. Яла къуртал бувну бур Л.В. Собиновлул цIанийсса Саратовуллал паччахIлугърал консерватория. Муния махъ зий айивхьу­ссар МахIачкъалаллал музыкалул училищалий, хорданул дарсру дихьлай. 1981 шиная шинай зий ивкIссар «Дагестан» ГТРК-лул хорданул каялувчину ва дирижерну.
Музыкантнал даврил авадансса опыт бусса Рамазан ХIажиев хьхьичIунну зий уссия педагогнал даврийгу, Дагъус­ттаннал паччахIлугърал педагогический университетрал музыкалул факультетрай дарс дихьлай. 2004 шинал ванан дуллуссар хорданул дирижированиялул кафедралул профессорнал цIа.
2000 шиная мукьах архIала зий уссия Дагъусттаннал па­ччахI­­­лугърал опералул ва балетрал театрдануву дирижерну, 2004 шиная шинай тIурча – каялувчинугу.

Залму ХIажиева, кулпат:
— Музыка бия Рамазаннул оьрмугу, кьадаргу, хиялгу, ИчIувамигу цинявппа, ганан кумаг бан, ичIаллил давуртту, буруккинтру ганайн къабичин хIарачатрай бикIайссияв.
Шанна даврий зий ухьурчагу, царагу даву дахьра харжирал цIаний къадайва. Гьарцагу давриву щалла дакI дишайва. Хор ганал кьадар бия. Оркестр – чIивинияцIасса хиял бия. Дук­лан ухлахийни, оркестрданул дирижер хьун ччай ивкIхьурчагу, бакIрайн агьну ия хорданул дирижер шайсса отделениялийн. Амма чIивинияцIавасса хиялданул Рамазан кьакъаивтуна.

Ширвани Чаллаев:
— ЖучIара, Дагъусттаннай, унгу-унгусса хор душиврий на га хьхьунура мукIру хьусса. Цалчинмур бутIа къуртал хьуну, кIилчинмур бутIа байбишиннин, га цувагу ия ххарину ттухь ттул хорданул укун ххуйну балай тачIав къаувкуссар тIий. Микку культуралул министргу гъан хьуну, бувсуна хорданул солистуран харж лахъ буллалисса ххарисса хаваргу. Ххаришиврул лавсун лавгсса куна чIалай ур ттун Рамазан. Дуниялгу чаннал дуцIин дурну, муруллуйн, ххяллуйн щусса куна, цавува­сса гьавасрал цIарал ччувччуну лавгунни. Заннан хъинну ххирасса инсаннан бакъа къабулайссар мукун­сса бивкIу.

Рамазан Фаталиев, Дагъус­ттаннал Композитортурал союзрал хъунама:
— Магьирлугърай бунияла дакI цIуцIаву дусса, баччиба­къулшиву дакъасса инсаннаща бакъа Рамазан МахIаммадович кунма зун къашайссар. Ганан тачIаввагу бигьану къабикIайва. Классикалул балай учайсса даражалул балайчиталгу жучIава хъинну чанну бухьувкун, ганан багьайва чIивисса коллективращал хъуни-хъунисса мурадру хьхьичI бихьлан. Амма ганаву цIу лархъна дикIайва, магьирлугърал чулухунмайсса гъира ганаву бувагу къалещайва.

Навруз Шахбазов, миллатирттал инструментирттал оркестрданул каялувчи:
— Рамазан ттун кIулли ччянияцIава. Жу зий буссияв радиокомитетрай. Га хорданул дирижерну ия, на – миллатир­ттал оркестрданий каялувшиву дуллай. Дуссия жул кIинналлагу цачIусса давуртту. Ттун ганаву караматсса музыкант найунува хIисав хьуна. Ганан муксса магьирну асар шайва хоргу, оркестргу.
Махъра-махъсса концерт­рай бивкIминнан тачIав хъа­макъаритантIиссар га кьини. Цанчирча паччахIлугърал хорданул укунсса концертру ччя-ччяни къадайва. Хор щалва гьурттуну бия, концертрал прог­рамма кIива бутIуйсса дия, музыка захIматсса бия. ХIайп, ххарисса лахIза пашманшиврийн кIура бавуна.
2007 шин.