Декабрь зурул 27-нний Аьрасатнаву кIицI лагайссар Ххассалбувултрал кьини. 1990 шинал декабрь зурул 27-нний РСФСР-данул Министртурал Советрал хIукмулийну сакин бувну бивкIссар Аьрасатнал ххассалбувултрал къуллугъ.

Ва кьини ккалли дувайссар Аьрасатнал МЧС-рал гьану бивзсса кьинилун ва ххассалбувултрал пишалул байрандалун. Ххассалбувултрал къуллугъ цуксса агьамсса ва чара бакъа аьркинсса къуллугъ буссарив бусан аьркиншиву чIалай дакъар. Учин ччива так: ва пиша язи бугьайхьунссар кьянкьа-кьурчIисса, сивсусса, инсаннах ччаву дусса инсантурал. Цанчирча, цалламур жандалия ка ларсун, цайминнал оьрмурду ххассал бан гьарнаща къашайссар.

---

[dropcap]Г[/dropcap]ьашину 25 шин бартлаглай дур Аьрасатнал МЧС-рал ххассалбувул къуллугъ сакин бувну. Вайксса шиннардил лажиндарай билаятрал личIи-личIисса регионнай ва дазул кьатIув хьусса балардаву (ЧС) – аьрщи сукку хьусса, щин ялтту ларгсса, цIу ларчIсса, машинартту ахьния багьсса ва цаймигу иширттаву, ва службалул зузалтрал ххассал бувну бур миллион инсантурал оьрмурду.
Ххассалбувултрал байрандалул гьантрай на хьунабавкьура 18 шин ва къуллугърай дурсса, Дагъусттаннал ххассалбувултрал кьюкьлул хъунама, ДР-лул лайкь хьусса ххассалбуву, Жабраилов ХъунамахIамма Русланнул арснащал.

— ХъунамахIаммад, буси инава каялувшиву дуллалисса кьюкьлуя. Цукунсса иширттаву гьуртту хьуссар вил зузалт?
— ХIакьинусса кьини на каялувшиву дуллалисса Дагъусттаннал ххассалбувултрал кьюкьлуву 70 инсан ур. Жул база, хъун бакъасса МЧС-рал шагьру, буссар Къарамандалул поселокрай (Къараман — 5). Жу бакъассагу, шикку дуссар цIу лещан дайсса часть, МЧС-рал дуккаврил центр, ГИМС (государственная инспекция по маломерным судам).

[pullquote]Ккурккуллал шяравасса Жабраилов ХъунамахIамма Русланнул арс увну ур 1972 шинал МахIачкъалалив. Школа къуртал бувну махъ увххун ур Дагъусттаннал политехнический институтравун, инженертал-строительтал хIадур байсса факультетрайн. Институт къуртал бувну махъ, 1995-1996 шиннардий Аьра­луннаву къуллугъ буллай ивкIун ур.
1999 шинайнин инженер-строительну зий ивкIун ур. 1999 шинал зун ивкIун ур Дагъусттаннал МЧС-рал ххассалбувултрал службалуву. 2014 шинал ивтун ур ххассалбувултрал кьюкьлул (ПСО) хъунаману.
Ва ур Дагъусттаннал лайкь хьусса ххассалбуву. [/pullquote]

Жул кьюкьлуйн хъар­ссар щалагу Дагъусттан ва дазуйсса районну. Чув-бунугу ца къахьунмур хьурча, га цIана жуйн леххаву дучIайссар.
Дагъусттаннал ххассалбувулт­рал кьюкьа Аьрасатнаву хьхьи­чIунминнавух дуссар. Жул хха­ссалбувулт гьуртту хьуссар личIи-личIисса республикарттайсса ва регионнайсса операциярттаву: 1987 шинал – Армениянаву, 1991 шинал – Гуржиял шагьрулий Цхинваллай аьрщи сукку хьусса чIумал, мукунма Цалчинсса ва КIилчинсса Чачаннал дяъвирдал лекьа-пIякьу дурмур ччаннай дацIан дуллали­сса давурттаву. Дагъусттаннал ххассалбувултрал ЦачIун дур команда цимилагу альпинизмалул Аьрасатнал чемпионтал хьуссар. Цимилагу ххув хьу­ссар Аьрасатнал ва региондалул пятиборьелул бяст-ччаллаву. ЧIявусса Дагъусттаннал ххассалбувулт лайкь хьуну бур личIи-личIисса наградарттан. КIива инсан ур ДР-лул лайкь хьусса ххассалбувулт.
Шама зузалан дуллуну дур «АьФ-лул лайкь хьусса ххассалбуву» тIисса бусравсса цIа.
55 ххассалбувува 6 инсан дунияллул даражалул ххассалбуву ур.

-Гьарица иширан хасну хIадур бувсса буссарив ххассалбувулт ягу ми цинявппагу журалул ишир­ттаву зун кIулсса бикIан аьркинссарив?
— Жул къуллугърал ляличIишиву мури, шикку зий буссар кIива-шанма, ххишалагу пишарду лав­хьхьусса инсантал. Жул мурадгу – мукунсса пишакартал хIадур бавур. Ххассалбувул пишакаршиврул даража, класс мунал лавхьхьу­сса пишардайн хъар хъанахъиссар. Масала, 2-мур даражалул ххассалбувун ххюва пиша кIулну бикIан аьркин­ссар, 1-мур даражалулманан — 7 пиша, дунияллул халкьуннал дянивсса даражалул пишакар тIурча, 9 пиша кIулсса икIан аьркинссар.

— Ци чIумул мутталий биян бюхъайссар ххассалбувулт­раща Дагъусттаннал ччимур точкалийн?
— Дагъусттаннал точкарду личIи-личIисса манзилданийсса дур. Жул давриву бала хьусса кIанайн бив­сса чIун дакъарча хIисав дайсса, леххаврий бувксса чIунни. Укунма­сса ишру, масала ДТП-тту, хьусса кIанттурдайн жу ца минутIрал дянив буккайссару. Вари жул норматив. ЗахIматсса ишру хьусса чIумал, масала, архну зунттаву машина неххавун багьсса, ягу хьхьирий инсантуран бала-мусиват хьусса чIумал, хасъсса хIадуршинна дан аьркинну дикIайссар.

— Дузалну бурув техникалул? Дуссарив зучIа вертолет?
— ХIакьинусса кьини жу дузалну буру аьркинсса машинарттал ва цаймигу ттизаманнул техникалул. Гьай-гьай, мудан зузисса техника ччяни дух шай, цIудуккан дан аьркинну дикIай. Техника цIу дуккан даву – щалагу жул системалий хьунабакьлакьисса масъалар. Ци чулийгу, хIакьину жучIара дусса техника диял хъанай дур жун жула пишалул бигарду щаллу бан.
Вертолетрая тIурчарив, жул къуллугъран му ккаккан дурну дакъар.
Дагъусттаннал МЧС-рал Агьаммур управлениялул икьрал дурну дуссар Виваллил иширттал министерствалущал ва Пятигорскаллал МЧС-ращал. Иш багьни, вайннал вертолетирттай буккайссару жу леххаврий.

— Гьашинусса шинал цими туристурал группа бавцIур зучIа сияхIрай? Миннан кумаг буллан багьсса кIанттурдугу хьурив?
— Ухссавнил Ккавкказуллал курортру бусса шагьрурдай кунма, чIявусса туристал жучIава къабикIай. Ттун дакIнийссаксса, ларгсса шинал 12 группа бавцIуна жул сияхIрай, миннан жул кумаг аьркин багьсса ишру къавхьунни.

— Дагъусттан аьрщи су­кку шаврия хъуннасса нигьачIаву дусса региондалун ккаллину дур. Му зат хIисавравун лавсун, ххишаласса къулагъас дуллали­ссарив лекьрурдаву зунсса ххассалбувулт хIадур баврих?
— Мукунсса иширттацIун дархIусса личIисса дарсру душивруцIун, вайми дарсирдавугу буссар аьрщи сукку шаврицIун бавхIусса пунктру. Аьрщи су­кку хьусса чIумал ххассалбувултран лекьрурдаву зун багьай хасъсса ярагъуннищал. Ярагъуннищал зунсса куцгу лахьхьин байссар.

— Вил мадарасса шинну хьуну дур му къуллугърай зий. ЛичIи-личIисса ишир­ттащал хьунаавкьухьун­ссара. Яла винма дакIний личIансса иш цумур хьур?
— Къуллугърал бурж биттур буллай, инсантурайн бала-мусиват ливксса иширттащал хьунабакьлай, миннуйн аьдат хьусса кунма чIаларчагу, гьарица иширал цила аьш кьаритай дакIниву. Хаснува, балаллухьхьун мюрщисса оьрчIру биривну бухьурча. Мукунми ишру хъиннува асаргу шай, дакIнийгу личIай, амма миннуя гъалгъа тIун, дакIнийн бичлан къаччива.
— Чув хIадур байссар зул службалуву зунсса пишакартал? Цукунсса тIа­лав­шиннарду дуссар минная?
— Дагъусттаннай ххассалбувулт хIадур байсса хасъсса центрду ба­къар. Мукунсса центрду Пятигорскалий, Сочилий, Ногинскалий бур. Мунияту, жучIава зун ччиминнава кандидатътал язи бугьару. Жул буссар официалнайну сияхIрайн лавсъсса спорт — ххассалбувултрал многоборье.
Ххассалбувулт хьунсса кандидатътал жу жула базалий уграт хъанан битару, жула зузалтрава личIи бару миннан тренертал, дулару аьркинсса снаряжение. Гьан бару личIи-личIисса спортрал бяст-ччаллаву гьуртту хьун. Миннава яла лайкьми кьамул бувару зун.

— Агьаммур тIалавшинна цIуллу-цIакьсса бушивурив?
— ЦIуллу-цIакьшиврущал, профессионалнайсса ва психологическийсса хIадуршиннагу дикIан аьркинссар. Цания ца чулуха хьхьарашиву духьурча, ххассалбувултрал пиша – миннал пиша бакъар.

— Ца бур къуллугъраву винма эбратну хьусса инсантал?
— Кьянкьашиврул ва пишакаршиврул эбратну ттун хьхьичIва-хьхьичI хьу­ссар чIярусса шиннардий Дагъусттаннал ххассалбувултрал кьюкьлул хъунаману ивкIсса дунияллул халкьуннал дянивсса даражалул хха­ссалбуву, чIярусса паччахIлугърал наградарттан лайкь хьусса ттула ниттиуссу Муртузялиев Зиябуттин Муртузялил арс. Ва эбрат хьунур на ххассалбувул пишагу язи бувгьу­сса. Ца на бакъасса, чIявусса ттул шяравасса оьрчIалгу. ХIакьинусса кьини Ккурккуллал шярава дур­ккун дур щаллусса династия хха­ссалбувултрал. «ДакIний битияра, хха­ссалбуву мудангу хха­ссалбувур — бигьалагай кьинирдай ва отпускалийгу, хъатIул мажлисрайгу», — учайссар ванал жухь. Му кIулну зий буру жугу.
Аьмну жул коллективраву личIи-личIисса миллатирттал вакилтал бур. ХIакьинусса кьини цинявппагу ттула зузалтрая рязину ура.

— Ххассалбувултрал байрандалул гьантрай ци учин ччива вила зузалтрахь?
— Ттун барча бан ччива ва бигьа бакъасса, амма хъинну бусравсса пиша язи бувгьусса хха­ссалбувулт цинявппагу. ЧIа тIий ура цIуллушиву, дуллалимуниву тIайлабацIу, ужагъирттай нахIушиву. Паракьатсса хьуннав зул зузи кьинирду, къааьркин багьаннав щинчIав жул кумаг.

Ихтилат бувссар
Андриана Аьбдуллаевал