[dropcap]Б[/dropcap]игьливу буссар фруктоза, глюкоза ва чIявусса витаминну: С, В1, В2, В9, Р, РР, А. Хъинссар бигь склерозран ва давление лахъминнан. Бигьлил хъуварду щаращи бувсса щин хъин­ссар яруннил цIуцIавурттан, ангиналул чIумал кьакьари вилаглан, укун­сса щинал лажиндарал бурчугу кIукIлу бай­ссар. Бигьлил мурхьирал чIапIаягума дарур­тту байссар.
Бигьлил маз ххартта байссар, щин ду­ккан дайссар, оь бацIан байссар.

Тамара ХIажиева
Халкьуннал медициналул тIимунин бувну, шяра дирсса чIумал, хъугьу тIутIийни бигьлил хъуварал чяй дурну дулайссар къашайшалан. Бигьлил хъуварал хьюмушиврул (слизь) воспалениелун кумаг байссар, кьакьари кIукIлу лаган байссар, хъугьу лагь байссар. Хъуварал хьюмушиву даншиврул гайннул ялун щин дутIайссар (5:100) лагрулий. Яла вай хьюмушиву ишла дайссар бронхитрал, гастроэнтеритрал, колитрал, метеоризмалул цIуцIавурттан.
Яруннил къашайшиву думиннан бучIиссар памма хъуварал хьюмушиврийн щуну ярунний бихьлан, ангиналул чIумал кьакьари вилаглан. БучIиссар лажиндарайх дуклан, бурчу кIукIлу бай­ссар. Шархьсса бигь хъинссар ттиликIрал къашайшалан, дакI ларай нанисса, кIарчIа тIисса чIумалгу.
Бигьлил сок хъинссар чахоткалул (туберкулез), астмалул, гастритрал къа­ша­вайминнан, хьюму лавсминнан, къюкIлил, ттиликIрал къашайшалтран, ссихIирал ххуллурду къашайминнан.
Бигь цурдагу, бигьлил щингу къабучIиссар лякьлуй щаву (язва) думиннан.
Хъин бувансса рецептру (астмалун, къюкIлин, ттиликIран):
— дукра дукан хьхьичI гьантлун ца ягу бачIи стакан бигьлил сокрал хIачIаван аьркинссар.
Малокровие, сахарный диабет думиннан:
— бигьлия личIурду дурну, хъувараягу марцI дурну, термосраву дирхьуну, ялун щаращисса щин дутIайссар (1:20). 2 ссят­рава бучIиссар хIачIлан гьантлун 3-лла. Вай щин хIачIайссар дукралул дянив.
Хьюму лавсминнан:
— 200 гр. личIурду дурну дурурсусса бигьлил ялун дутIайссар ца литIра щинал, цIарай бивзун кIункIур, 20 минутIрайсса щаращи байссар. Ссятрай цал бачIи-бачIи стакан вай щинал хIачIларча хъин­ссар хъин хьунцIа.
Аьвкъу-гъили хьуни, дукралух тамахI бакъани:
— ца чяйлул къуса бигьлил хъуварал ялун бачIи стакан щаращисса щинал бутIайссар, чIумуя чIумуйн хъюлчугу дуллай, 2 ссятрайсса дитайссар. Диргьуну махъ, дукралул хьхьичI, гьантлун шамийла ца-ца хъунна къуса вайннул хIачIларча, хъинссар.
Косметикалул даруртту, кIиз кьатI тIутIиминнан:
— бигьлил чIапIив (50 г) мюрш бувну, кьувкьуну, гайннул ялун ца литIра щинал дутIайссар, 1 минутIрайсса щаращи дурну, ца ссятрайсса кIучI дурну, вай щинай вилагайссар марцIсса чIарарду.
ЦIуллуну битаннав.