[dropcap]А[/dropcap]лхIаткьини МахIачкъа­лалив къуртал хьунни «Лакку кIанттул лига — 2017» футболданул турнир. Турнирданул сакиншинначитал бур «Гъази-Гъумучи» фонд.

Зулайхат Тахакьаева
Дайдирхьуссар му август зурул 20-нний ва гьарца алхIаткьини хьунабакьлай бивкIссар ххюра райондалиясса – Лакрал, Ккуллал, ЦIуссалакрал, Ахъушиял ва Рутуллал, шяраваллал жагьилтал.
Финалданийн дурккун дия Ккуллал, ЧIарттал, Вихьуллал ва Хъусращиял командартту. ЧIарттал командалуяр ххув хьуну (2:0), «Лига Лакии-2017» турнирданул чемпион хьунни Хъусращиял команда. КIилчинмур кIану бувгьунни Вихьуллал командалул, шамилчинмур кIану – Ккуллал командалул.
Турнир лакьлакьисса шадлугърай гьуртту хьунни «Гъази-Гъумучи» фондрал хъунама, Лак­рал райондалул азарханалул хъунама хIакин АьвдурахIин Дибиров, ДР-лул Халкьуннал Мажлисрал депутат Амирхан Амирханов, Шяраваллил хозяйствалул министерствалул управлениялул каялувчи Эмил Ттаттаев.
Гьашинусса турнирданул проектрал каялувчи ур Илияс Мугутиев. Чялишсса гьурттушинна дурунни Халипа ТIагьировлул, Ися Бархаевлул, Физули Уруджевлул. Ва даврил чIарав хъинну бавцIунни Амирхан Амирханов, Эмил Ттаттаев, ишбажаранчи ХIасан Аьлиев.
АьбдурахIин Дибировлул кIицI лавгуна ца базилух, цала гьалмахчуначIа хъамалу лакрал жагьилтал цачIунмай баврил ялув жапрай буна, хIасул хьушиву спортрал кунма жагьилтал ссалчIав цачIунмай къабай, нани жува футболданул турнир сакин данну, тIисса пикри. «Турнирданул сиптачитурал хьхьичI бивхьусса мурад чулийн бувк­ссар учин бюхълай бур. Цанчирча дукIугу, гьашинугу чялишну хIала бувххунни жула жагьилтал ва давривух», — увкунни ванал. КIицI лавгунни, ларгсса шинал­сса турнирданул командарттава язи-язими личIи бувну, сакин дурсса Лакрал командалул Да­гъусттаннал футболданул чемпионатрай бувгьушиву кIилчинмур кIану. Командалул тренер – Эмил Ттаттаев, капитан – Маллааьли Кьурбанов.
Ххув хьусса ва хьхьичIунсса кIанттурду бувгьусса командарттан, хьхьичIунсса буккултран сакиншиндарал комитетрал чулуха буллунни дипломру. Цалчинмур кIану бувгьусса Хъусращиял командалун Эмил Ттаттаевлул ва ванал ссурахъу Шипа­уттин АхIмадовлул дуллунни 200 азарда къуруш арцул. Шиккува дакIнийн бутанна, Эмиллул 10 шинал хьхьичI МахIачкъалалив сакин бувссар футболданул клуб «Хъусращи».
«ЦIана чIун оьлуркъусса, жагьилсса ник бигьану хъяврин хьунсса сававртту чIярусса дур. Спортрал жагьилтал ми ишир­ттая байгьин буллалиссар. Му бакъассагу, спортрал инсантал цачIунмай буллалиссар. Шяраваллава бивзун мукьах, ца шагьрулий, хIатта кувнначIан кув гъанну ялапар хъанай бухьурчагума нажагьвагу цаннан ца ккак­лай бакъару жува. Футболданул клуб сакин бувния махъ жу нюжмардий кIийла хьунабакьайссару «Спартак» школалул футболданул майданнив. Командалуву уклай уссар 20 инсан. Бур тамашалийн бучIайссагу. Жу жущалва жула оьрчIругу буцай­ссар, мюрщинува кувннан кувгу кIулну бикIаншиврул, дусшивугу цIакь хьуншиврул», — тIий ур Эмил.
Цала командалун арцуйну­сса бахшиш дурунни Ккуллал шяраватусса ишбажаранчи ХIасан Аьлиев­лул.