Дяъвилул цIаравусса Сириянава уттигу 40-нниха ливчусса Аьра­сатнавасса хъами ва оьрчIру ххассал бувну, Грозналийн биян бувунни. Миннавух Дагъусттаннаяссагу бур.

П. Рамазанова
[dropcap]Ч[/dropcap]ачаннал БакIчиначIасса инсаннал ихтиярду дуруччай совет­рал член Хеда Саратовал баян бунни силовиктурал Дагъусттаннаясса 3 хъамитайпа бувгьушиву. «Дагъусттанная бувкIсса низам дуруччай органнал зузалтрал бувцуну лавгунни силистталул делорду дурсса хъами. Будайханова Виктория Москавлив биян бувантIишиву бувсунни, му тикку розыскрай буну тIий», — увкунни Х. Саратовал.
Сириянава ххассал бувминнащал самолетрай ивкIсса Чачаннал Республикалул БакIчинал Гъанмур Машрикьуллал ва Ухссавнил Африканал билаятирттайсса вакил Зияд Сабсабил вара кьини журналистътурахь бувсунни Сириянавусса ва Иракьнавусса цинявгу Аьрасатнал граждантал ватандалийн биян буваншиврул хьхьу-кьини дакъа зий бушиву, ва даву дуванма хIасул бувсса группа уттигу луглантIишиву кумаграх мюхтажминнах. Бувсунни хъаннин кIулну бивкIшиву цивппа суд-диваннайн багьан бюхъайшивугу. «Жу гьарцаннуя расписка ларсъссар, ми цивппа хушрай ватандалийн най бушиву исват буллалисса, гужрай цучIав къауцарду, Аьрасатнавун бияйхту, судирттай зума цIухлантIишиву кIулну бунувари хъами ватандалийн зана хьуссагу», — увкунни ванал.