2012 шиная шихунай Дагъусттаннал УИС-рал 1-мур силистталул изоляторданул хъунаманал хъиривчуну уссия личIи-личIисса жаваблувсса къуллугъирттай цала пишакаршиврул даража ва бюхъу-бажар ккаккан бан бювхъусса лакку оьрчI,
Шушиннал шяравасса Аьбдуссаламлул арс Давуд Давидов. Нанисса шинал август зуруй, Давудлул даврил опытгу, иш-тагьар кIулшивугу хIисавравун ларсун, ва ивтунни изоляторданул хъунаману. Уттигъанну цинярдагу УИС-рал идарарттал зузалтращал вайнналгу кIицI ларгунни пишалул кьини. Пишалул байрангу барча дан, цала биялдарайсса идаралиягу цIухху-бусу бан на хьунабавкьура Давуд Аьбдуссаламовичлущал.
Давидов Давуд Аьбдуссаламович увну ур 1975 шинал июнь зурул 10-нний ЦIуссалакрал райондалий Шушиннал шяраву.
2003 шинал къуртал бувну бур Дагъусттаннал университетрал юридический факультет.
ЗахIматрал ххуллу байбивхьуну бур 1995 шинал Хасавюртуллал РОВД-лия. Мунияр махъ 2009 шинайн ияннин личIи-личIисса къуллугъирттай ЦIуссалакрал РОВД-лий зий ивкIун ур. 2007 шинал увкIун ур Дагъусттаннал ФСИН-лул управлениялийн тахсиркартурал группардайн къарши бацIайсса отделданул хъунама оперуполномоченныйну. Управлениялийгу Давуд Аьбдуссаламович жаваблувсса къуллугъру бачин бувну ивкIун ур. Ва ивкIун ур режимрал отделданул хъунаману, силистталул изоляторданул хъунаманал хъиривчуну, 7-мур тIайла бацIан байсса колониялул хъунаманал хъиривчуну, 1-мур силистталул изоляторданул хъунаманал хъиривчуну. ЦIана ва ур 1-мур силистталул изоляторданул хъунаману.
— Давуд цими инсан ур хIакьину ина каялувшиву дуллалисса 1-мур силистталул изолятордануву щяивкIун? ЧIявусса бурив хъами?
— ХIакьинусса кьини жучIа щяивкIун уссар 550 инсан, миннава 36 хъамитайпа бур.
— ЩябивкIми хъунмурчIин ци тахсир хьусса бур?
— ЧIявуми бур АьФ-лул УК-рал 228-мур (наркотикру ишакаш баву) ва 159-мур (хIарамзадашивуртту) статьярттайн багьайсса тахсир хьусса.
— Бурив изолятордануву терроризмалул ва экстремизмалул хIакъиравусса статьярттайн бувну тахсирлув буллалисса? Бурив миннавух Сириянал билаятрайсса иширттащал дахIаву диркIсса?
— Терроризмалул ва экстремизмалул статьярттайн бувну тахсирлув буллалисса 80-нния ливчусса инсантал бур хIакьину жучIа. Миннава 10-нния ливчусса инсантал бур Сириянавусса иширттащал дахIаву диркIсса. Миннавух бур ца-кIива жагьилсса хъамитайпагу. Вай статьярттай тахсирлув буллалими циняв 20-30 шинавусса жагьилсса инсантал бур.
— Буссарив зучIа аваза бувтсса тахсиркаршивурттаву гьуртту хьусса?
— Буссар мукунссагу. Амма уттигу силистта найнма буявхьур, миннал хIакъираву цичIав бусан къахьунссар.
Цими инсан икIайссар камералуву? Камерардаву кувннащал кув бивсса, бакъакьлакьисса кIанттурдугу шайрив?
— Ца камералуву 4-6 инсан икIайссар. Гьай-гьай, куннащал кув къабавкьусса ишругу шай. Гьарица инсаннал цалла-цалла хасият дикIай. Мукунсса ишру хьун къабитаву ягу ми бюхъавай чан баву мурадрай жу хIарачат бару цалчин дуснакьравун багьми ва хьхьичIвагу щябивкIун бивкIми, къалиян учайми ва къаучайми, кIусса тахсиркаршивуртту дурми ва личIину хъунмасса тахсир къавхьуми цачIу къабитан.
— Дуснакьравуми аьраттал бувксса, бунт гьаз дурсса ишру хьуссарив инава зузиссаксса хIаллай?
— 2012 шинал шанма-мукьва камералуву щябивкIминнал архIал туннурду кьувкьуну бия, шиккусса низам лиян. АдвокатътурайхчIин, ихтиярду дуруччултрайхчIин, жяматийсса комиссиярттайхчIин миннал дуснакьраву цала тIалавшиннарду щаллу дуллали бан кьаст лархIуна.
— МютIи къахъанахъиминнащал ихтилат бан нину-ппу, гъан-маччами буцин багьсса кIанттурду шайрив?
— Ва мюрщи оьрчIру бикIайсса кIану бакъар. Закондалул ххуттава къабувккун, дуснакьравума низамрайн мютIи ан жущавагу бюхъайссар. Цал мукунсса гъалатI итабавкьуну, му жун ххирану бавцIуссар. Хъинма хьун ччан бивкIсса ОНК-лул (Общественная наблюдательная комиссия) вакилгу, дуснакь увманал нинугу сававну, жу жула зузалацIа хьуссару. ХьхьичIсса шиннардий комиссиялулгу, жул зузалтралгу кувннан кув къабувчIлачIисса, цаннацIун ца къабакьлакьисса кIанттурду чIявуну шайва. ЦIана жу кувннан кув бувчIлай буру. Дуснакьравуминнал ихтиярду ссуссукьу дуллалисса кIанттурду жучIа бакъассар.
— Туну зучIа, УИС-рал цайми идарарттай кунна, дуснакь бувми ссавур дакъа ялугьлагьисса «нузру тIиртIу кьинирдугу» къадикIайссарив?
— Кварталданий цал дикIайссар. Мигу — хозяйствалул давурттаха зузисса кьюкьлувуминнанни.
— Махъсса шиннардий изоляторданул къатри цIу дуккан дуллай, гьарта-гьарза дуллалисса давуртту щириркIуну дия. Дузалссарив циняв корпусру?
— Мяйжаннугу, махъсса шиннардий диялсса давурттив дурссар шикку. ЦIана вай дур 4 зивулийсса, 7 корпус бусса гьарта-гьарзасса, европанал стандартирттай дурсса къатри. Мукьва корпус (А, Б, В, Г) щаллу бувну зий буссар, шанма корпус (Д, Ж, Е) уттигу зун бувассар. ЦIана гьарица камералуву 4-6 инсан уссар. Дуссия чIунну камералуву 25-27 инсан усса. Циняв камерардаву буссар телевизорду, холодильникру. ХьхьичIрасса шиннардих бурувгун, шикку къулайсса шартIру хьуссар. Дуснакь увманан 4 кв.м. чанну дакъассар.
Лимит 893 инсан ур. ЖучIарив дянивну 600-650 инсан икIайссар. ХьхьичIва 1000-1500 инсан икIайссия.
— МуницIун бавхIуну, зузалтрангу бигьашиву хьухьунссархха?
— Гьич. Ялунгума зузалтран даву ххишала хьунни. НукIу 2 зиву ва 2 корпус бивкIхьурча, утти 4 зиву ва биялсса корпусру бур. Гьарица зивулий, гьарица корпусраву постру буссар. Хъунмасса гуж багьлай бур мюрщими инспектортурайн.
— Цими инсан зий ур хIакьину зучIа?
— ЦIанасса чIумал шикку зий уссар 166 инсан. Уссия 193 инсан, 27 инсан чан хьунни, давурттив тIурча, ххишала хьунни.
— ЗучIа къуллугъ буллан ччисса чIявусса бикIайрив? Цукунсса тIалавшиннарду дуссар минная?
— Шикку зун ччисса чансса къабикIай. ХIаписартуралми къуллугъирттай дурагу вакансияртту дакъар. Мюрщими къуллугъирттайн тIурча, ца кIанайн 3-4 инсан икIай. ЖучIа зун ччими бикIан аьркинссар ларайсса кIулшивуртту ларсъсса, бюхъавай юридический кIулшиву дусса, цIуллу-цIакьсса, цала цивппа бувгьусса, ссавур дусса.
— Уттигъанну дия УИС-рал зузалтрал пишалул кьини. Цукунсса ккаккиярттащал хьунадакьарду зу му?
— Жул пишалул кьини кIицI дуллан бивкIун бур 2006 шиная шихунмай. Гьашину жу 12-чин хьунадакьарду ва байран. Пишалул байрандалуцIун бавхIуну, жу хьунабавкьуру Дагъусттаннал халкьуннал хозяйствалул университетрал студентътуращал, ихтилат барду «Зунттал билаят» радиолувух, бусарду жула къуллугърая. Ялагу, пишалул байрандалуцIун бавхIуну, жул 3 зузалан, цала къуллугърал буржру дакI марцIну бартбигьлай тIий, дуллунни наградартту. Ттуща кьянкьану учин хьунссар: наградалун лайкь акъасса цаягу зузала акъассар жучIа.
Дуснакьрал системалий зузиссаксса хIаллай инава рязисса ва къарязисса ци хьуссар?
— Нава рязину икIара ва хIакьинусса низам дишин бюхъаврий изолятордануву. Аьрасатнава жучIан бувкIми махIаттал хъанай бикIай шиккусса низамрай ва шартIирдай.
Жул изолятор хьхьичIунсса 5 изоляторданул сияхIрай буссар. Къуллугърах, ду-дакъашиврух къабурувгун, цинявннан цакуцсса шартIру дуссар.
2009 шинал 7-мур тIайла бацIан бай колониялий бунт хьусса чIумал, на тIайла увккунав кIиккун низам дишин. Шин ва дачIиннуй кIикку зий, цин лархьхьусса низам дишин бювхъуна. 2012 шинал увкIра ва изоляторданувун. На увкIсса чIумал, шиккугу захIматсса тагьар дия. Хьуна ишру къадагъа дирхьусса затру духхан дурсса.
Шайва ишру зузалт нигьал буллалисса, ми букканнин кьатIув ялугьлагьисса. Закондалул тIалав буллалисса куццуй зун бюхълай бакъая зузалтраща. Хъунмасса захIматрайну жуща шикку низам дишин бювхъунни. ЦIана шикку дуснакь увманал зузала нигьаусан уллалисса иш цукунчIав къахьунабакьайссар. Къашайссар мукунма ишру зузалтрал дуснакь бувминнай зулму буллалисса, миннал ихтиярду ссуссукьу дуллалиссагу.
— Барчаллагь, Давуд. ДакIниймур дузрайн букканнав.
Ихтилат бувссар
Андриана Аьбдуллаевал
