Цала уздансса нитти-бутталгу, агьлу-авладралгу цIа лайкьну дуручлай, яхI-къириятрал кьануннай оьрму бутлатисса адамина ур республикалий чIявучин кIулсса Амучи Амуттинов. Амучи Михайлович кIулну ур республикалул агьалинан, лавайсса даражалул пишакар ва ххаллилсса каялувчи хIисаврай акъассагу, чув-адаминал хасиятру дусса, цала мукъул заллушиву дан кIулсса, инсаннал къуллугърах, даражалух къаурувгун, тIайласса, кьянкьа­сса махъ учинсса рухI дусса инсан хIисаврайгу.

Андриана Аьбдуллаева
— Адаминасса инсан бакIрай кьяпа бивхьуния махъ мунин лайкьну, адаминал къирият дуну икIан аьркинссар, — учай ванал цалагу.
Ванал пишакаршиврул даражагу, лайкьсса хасиятругу хIисавравун ларсун тапшур байхьунссия хъуниминнал ванайн мудангу жаваблувсса къуллугъ. Лакраннив бусравну ур Амучи Михайлович миллатрах ччаву дусса, хIакьсса патриот уну тIий. ЧIявучин дакIнийссар, республикалул Пенсионный фондрай каялувшиву дуллалисса чIумал, ванал чIявусса лак давурттал дузал бувссия, ци къуллугърай ухьурчагу, лакрал чIарав ххуйну ацIайссия.
[dropcap]У[/dropcap]вну ур Амучи Михайлович 1951 шинал СумбатIуллал шяраву. Ва увсса чIумал ванал ппу ивкIун ур Ккуллал райондалий цалчин буклакисса «Ххя­ххабаргъ» кказитрал хъунама редакторну ЧIяйннал шяраву. Ва райондалий хIурматрайсса адамина ивкIун ур. Нину Кабиратгу миккура зий диркIун дур. 1969 шинал Амучил Ваччав марцIну ххювардай къуртал бувну бур 10 класс.
Школалул хьхьичIунсса выпускник хIисаврай ванайн вихшала бувну бур школалул ЯтIул ттугъ ххуйну дуклакисса 1-мур классрал ученикнахьхьун булун. Му ученикгу ивкIун ур жуна ххуйну кIулсса, Лакрал радиолул зузала Гьарун ХIасановлул хъунама арс Шамхала. Муналгу школа мусил медальданий къуртал бувну бур.
Учительтал мудангу тикрал буллан бикIай школалий бивзсса гьану инсаннал оьрмулуву чIявуну бучIи лякъайшиву. Школалий ларсъсса кIулшивуртту Амучи Михайловичлунгу гихуннай дучIи ляркъуну дур. ЛичIи-личIисса къуллугъир­ттайсса чIумал цала даву ххал дан бувкIун, цичIав щилтагъшиву къаляркъусса ревизортурахь ванал учайсса бивкIун бур: «На школалий ххуйну дуклай уссияв», — куну.
Школагу къуртал бувну, ва увххун ур сумбатIуллачIа сийлийсса муххал ххуллул институт­равун Ростов шагьрулий.
— Ттунма цуппа, чIявуми та заманнул оьрчIан кунма, космонавт хьун ччай буссия. Аьпа баннав, ниттил увкуна: «Ттул арс, жунма космонавтътал къааьркинни, сумбатIул муххал ххуллийх занай аьдат хьусса инсанталлича, ттун инагу муххал ххуллийх занай ччивав. Вил хъирив ттигу ххюя буссар, ина цукун авчурав, гаймигу мукунма бачинтIиссар», — куну. Жул кулпатраву ряхва оьрчI бия – шама уссу, шанма ссу. Миннаву хъуна хъунама на ияв. Ниттил тIийкун, миннан эбрат ккаккан дан багьлай бия, — буслай ур Амучи Михайлович цала муххал ххуллул пиша язи бувгьусса куц.
Ххуйсса кьиматирттай институтгу къуртал бувну, ца шинайсса Алма-Ата шагьрулий зий ивкIун ур тиккун тIайла увккун.
Яла Дагъусттаннайн увкIун, мелиорациялул давурттай зун ивкIун ур, архIала политехнический институтраву лекцияр­ттугу ккалай. Элмулул ххуллийх гьан хъинавав, администрациялул къуллугъирттайх гьан хъинавав тIий цалий къаацIлай ца­ппара шинну хьуну дур. 1984 шинал ивтун ур строительствалул механизациялул управлениялул (УМС) хъунаману.
— На инженер ияв, строи­тельствалуцIун, ххуллур­дацIун, машинарттацIун бавхIу­сса пиша – ва ттул пиша бия. Управлениялул хъунаману итайхту, ттун, инс­титутравусса лекциярттугу кьабивтун, ттула кIул­шивурттугу, гьавасгу ва даврий ишла буллан багьуна. Мадара хIарачатгу бувссия управлениялул даража гьаз бан, — тIий, буслай ур Амучи.
Ванал бувсса хIарачатгу зия къалавгун бур. Управление Совет Союзрай яла хьхьичIунмур, яла ххуймур организациялул даражалийн лархъун дур. Вайннал лавсун бур цал Дагъусттаннал, яла Аьрасатнал ва Совет Союзрал ЯтIул ттугъру. Мунияр махъсса шиннардий Амучи Амуттинов МахIачкъала шагьрулул депутат хьуну ур.
Миккун нанисса 8 инсаннава най унува ва ххув хьуну ур. 1994 шинал, Республикалул Совет сакин буллалисса чIумал, ва Госсоветравун лакрал вакилну увчIуну ур. Му къуллугърайн ччи­сса цаймигу бивкIун бур, миккугу Амучи Михайлович ххув хьуну ур.
1997 шинал ванайн тапшур бувну бур экономикалул министр­нал къуллугъ. Цайнма тапшур бувмур лажин кIялану бартбигьлагьисса, бюхъу-бажар бусса каялувчи ушиву чIалай, ва ивтун ур кIива-шанма къуллугъ архIал бачин бан. ИвкIун ур экономикалул министрнугу, Госсоветрал членнугу, ХIукуматрал председательнал хъиривчунугу.
Экономикалул министерствалий каялувшиву дуллалисса чIумалгу ванал кка­ккан бувну бур цала пишакаршиврул даража. Шикку яла пагьму бушиврун ккалли бай­сса бур хIакьинусса тагьарданул хIакъи-хIисав дурну, гьунттий хьунтIимунил тIайласса прогноз дулаву. Та чIумал Амучи Михайловичлул прогноз Москавуллал ккалли дурну дур регионнал экономикалул министртурал прогнозирттаву яла тIайламунин.
Ванал хъиривлаявурттугу дурну, лайкьну дурурччуну дур 2000-ку шинайнин Да­гъусттан социал-экономикалул хьхьичIунмай баврил программа. Мунил хIасиллайн бувну, Аьрасатнал Президент В. Путиннул дуллуну дур «АьФ-лул лайкь хьусса экономист» тIисса бусравсса цIа. 1998 шинал ахирданий та чIумалсса Госсоветрал председатель МахIаммадаьли МахIаммадовлул оьвкуну, бавцуну, тири-хъири бувсса Пенсион фондрайсса тагьарданиягу, му къуллугъ бугьан ччи­сса чIявусса бушивриягу бувсун, Пенсионный фондрал хъунаману ацIу увкуну бур. Закондалийн бувну къабучIину бунугу, ХIукуматрал председательнал хъиривчунал къуллугъгу винма ччиссаксса хIаллай вичIава бикIанссар увкуну бур. Укун, 1998 шинал Амучи Михайлович ивтун ур республикалул Пенсионный фондрал управляющийну.
Хъинну захIматсса тагьарданийсса, ца чулуха дарцуну тири-хъири дурсса, гамур чулуха инсантуран пенсияртту къабуллалисса чIумал бакIрайн лавсун бур Амучи Михайловичлул ва къуллугъ. Республикалул хъуниминнащалгу маз лявкъуну, Москавлив лавгун, тийхминнащалгу кIул хьуну, чIирисса чIумул дянив ххуйсса пишакарталгу лявкъуну, даву нирхиравун дуртун дур. Ва къуллугъ 11 шинай лажин кIялану бачин бувну ивкIун ур. Шиккугу ккаккан бувну бур Амучи Михайловичлул цува гьунар бусса каялувчи ушиву, 216 инсан зий ивкIсса Пенсион фондрай ва гичча нанисса чIумал 1600 инсан ивкIун ур.
— Мяйжаннугу, на гиккун бавтIссия ххаллилсса пишакартал, лакрал бусса элита, элмурдал доктортал, кандидатътал, бур чинсса инсантал.
Ттухьва лак чIявусса буцлай ура учинсса уккарчагу, на кьянкьану жаваб дулайссия: «Ххал бара вай хьхьарасса пишакартал бурив, баян бара конкурс», — куну. Цахъи гьутру буну гъалгъа тIурча хъунама, цувагу бунагьру буллай акъахьурча, ччиманащал гъалгъа тIун шайссар, — тIий ур Амучи Михайлович.
Пенсион фондрай каялувшиву дуллалисса шиннардий ванан дуллуну дур «Заслуженный экономист РФ» тIисса бусрав­сса цIа, мира шиннардий Аьрасатнал Президентнал дуллуну дур орден Почета. Амучи Михайловичлул ва кIилчинсса орден дур.
ХьхьичIрагу, Спитакрай аьрщи сукку хьусса чIумал кумаг буллай ивкIун тIий, ванан дуллуну диркIун дур орден «Дружбы народов». Владимир Путин Аьрасатнал Президентну нани­сса чIумал, Амучи Михайлович ивкIун ур Дагъусттаннайсса ванал вихшаласса инсан. 2000 шинал вайннал цачIу рирщусса суратгу дур. БувчIавурттай кумаг бувну тIий барчаллагь тIисса чагъаргу бувкIун бур Президентная. [pullquote]1999 шинал ЦIуссалакрал аьрщарай дяъвилул ишру нанисса чIумалгу таний Дагъусттаннал ХIукуматрал председательнал хъиривчуну ивкIсса Амучи Михайлович гьан увну ивкIссар Дагъусттаннал хъуниминнал гихун штабрал хъунаману.
— Ттущава шайсса хIарачат бувссия, дяъви нанисса гьантрайгу, гания махъ дяъвилул ппив дурмур цIу дуккан дуллалисса чIумалгу, — дакIнийн бутлай ур Амучи Михайлович.
[/pullquote]
Амучи Михайловичлул оьр­мулуву хIукуматрал бикIу, жяматийсса бикIу къуллугъ бачин къабувсса чIун дурагу да­къар.
2011 шинал лакрал миллат­р­ал съездрай ва увчIуну ур Миллатрал советрал председательну. Муния шихунай, лакрайн багьайсса цавагу масъала ягу хIукуматрал политикалул ишру чIарах буккан къабивтун, чялишсса гьурттушинна дуллай, цаламур пикри буслай ур. ЦIанагу чIявусса лакрал ма­съалартту ххал бигьлай, миннул ялув ци зун бурив пикри буллай бур Советрал члентал. Шикку кIицI къабувну къабучIир Миллатрал советрал, хъинчулийгу ккавккун, чялишсса гьурттушинна дуршиву Дагъусттаннал педуниверситетраву лакрал отделение тIитIлатIисса давриву. Ва даврицIун бавхIусса масъалартту вайннал тапшур бувну бур Советрал вакил Илияс Къаяевлуйн. Ххуйну дуклакисса отделениялул ца студентнан стипендия цала буллан бакIрайн лавсун бур Амучи Михайловичлул. Уттигъаннугу, циняв миллатирттал советру бавтIун, Президентнайн чагъар чивчуну бур. Чагъарунний гьаз бувсса ма­съаларттавасса ца бур лак бизан баврицIун бавхIусса. Репрессиярттахьхьун биривсса чачаннал хIакъиравусса, закон дурккун дур, гужирай гайннан кIанай бизан бувсса лакрал хIакъиравусса закон ттигу дакъар. Му закон кьамул дувара тIий чивчуну бур вайннал.
Президентная жаваб дуркIун дур чагъар ПаччахIлугърал Думалувун тIайла бувкссар тIисса.
Шиккува бусан, 1999 шинал ЦIуссалакрал аьрщарай дяъвилул ишру нани­сса чIумалгу таний Дагъусттаннал ХIукуматрал председательнал хъиривчуну ивкIсса Амучи Михайлович гьан увну ивкIссар Дагъусттаннал хъуниминнал гихун штабрал хъунаману.
— Ттущава шайсса хIарачат бувссия, дяъви нанисса гьант­райгу, гания махъ дяъвилул ппив дурмур цIу дуккан дуллалисса чIумалгу.
Гийх ттул кIулсса, мачча­сса цукIуй акъая. Чув бириврив, микку уттубихьлай бивкIру. ЦIубутIуй захIматнугу бия. Гьарица хьхьуну ссят 23.00 хьу­сса чIумал штабраву совещание дурну, гьунттий-сара дан­сса давурттал план дайссия. Ччя-ччяни хьунаакьайссияв Казанцевлущал. ЧIявусса лакрал дакI-лякьа цIий кумаг буллай бивкIссар та чIумал кьини дурксса ЦIуссалакрал агьулданун, — дакIнийн бутлай ур Амучи Михайлович.
ЦIанасса чIумал Амучи Михайлович «Аммитали­хъал хьхьем» тIисса минерал щинал завод тIивтIуну ур. Дянивну 50-ннийн бивсса инсантал зузисса, циняв журалул щин итадакьлакьисса завод бур ва. АммитIалихъул вайннал тухумрал цIа дур.
Цала тухумралгу, нитти-бутталгу цIа лайкьну дуруччин хIарачат буллай, щилчIав махъ къаучинсса, аьй къадансса ку­ццуй яхIирай дуллай ивкIун ур гьарица цала дуллалисса даву Амучи Михайлович. Ихтилат къуртал буллай ци учин ччива куну цIувххукун: «Ттун хъунма­сса пахру бикIай ттула миллатрал тарихрая, цIадурксса Аьли Къаяев кунмасса миллатрал лайкьсса арсурваврая», — тIий ур Амучи Михайлович.