[dropcap]М[/dropcap]оскавлив хьусса Аьрасатнал Пенсионертурал союзрал 8-мур съездрай 2016 шинал пенсионертурал Союзрал регионнал отделениярттал дянивсса конкурсрай цалчинмур кIану бувгьусса Дагъусттаннал Пенсионертурал союзрал отделениялул хъунама АьвдурахIман МахIаммадов

Ци тIилисин буссарив къа­кIулли, таний жула зунттал щархъаву, хъунисса кулпатирттаву хъуни хьусса оьрчIру ччяни аькьлу-кIулшилул балгу­сса, бюхъу-бажар бусса бивкIун бур. Зунттал щархъава цивппалу шагьрурдайн лавгун, чул бищунсса, чIарав ацIансса акъа­нува, дугу-дурккуну, нитти-буттайн къавщунма, цайнува цивппа ххуллу ласлай аьдат хьусса бур. Мукунминнавасса ца ур чIявучин ххуйну кIулсса, сайки 13 шинай Дагъусттаннал пенсионертурал организациялий каялувшиву дуллалисса, Ккуллал шяравасса Кьурбаннул арс АьвдурахIман МахIаммадовгу.
А. Аьбдуллаева
АьвдурахIманнул ппу Ккузма-Кьурбан Ккуллал шяраву цалчин диплом лавсъсса учитель ивкIун ур. Амма ванан 2 шинайсса бакъа учительшиву дан кьисмат къавхьуну бур. Ванал ппу МахIаммадов ЦIаххай Ккуллал район сакин хьусса гьантрайва, 1934 шиная 1937 шинайн ияннин, исполкомрал председательну ивкIун ур. 1937 шинал ва, троцкист хIисаврай, дуснакь увну ур. Троцкистнал арс хIисаврай, Ккузма-Кьурбангу школалий зун къаивтун ур, хIатта та чIумал дурккусса, дип­лом лавсъсса учительтал нажагьсса бакъа къабивкIнугу.
Кьурбаннул ва ПатIул кулпат­раву 7 оьрчI бивкIун бур.
Ккулув 8 классгу къуртал бувну, АьвдурахIман зун увххун ур Каспийскалийсса «Дагдизель» заводрайн. Зий унува, къуртал бувну бур зузисса жагьилтурансса хьхьувайсса школа. Оьрмулул 17 шинавусса АьвдурахIманнулнияр хъунма­сса харж бусса цама къаивкIун ур ва зузисса цехраву. Буттал шяраву, ччарча яттичIан занай, ччарча колхозрал давурттай, зий аьдат­сса АьвдурахIман, цумур духьурчагу даврия махъаллил къашайсса ивкIун ур. ХIарачат бу­сса жагьил 18 шинаву коммунист партиялувунсса кандидатну кьамул увну ур. 1973 шинал увчIуну ур «Дагдизель» заводрал комсомол организациялул секретарьнугу. Тай шиннардий комсомол организациялуцIун, коммунист партиялуцIун бавхIусса къуллугъругу щийн-бунугу тапшур къабайсса бивкIссар. Комсомол организациялул секретарь хIисаврай, АьвдурахIман тархъан увну ивкIун ур аьрали къуллугърая, амма ванал, Каспийскаллал комиссариатрайн лавгун, къуллугъ бан уцара тIий, аьрза буллуну бур. Къуллугъ буллай ивкIун ур Тула шагьрулий гьавалул-десантътурал аьра­луннаву. Шиккугу сивсусса жагьил хъуниминнал итталун агьну ур, батальондалул комсомол организациялул секретарьну увчIуну ур.
1975 шинал полкрал командованиялул тIайла увккун, ув­ххун ур Оренбург шагьрулий­сса высшее зенитно-ракетное командное училищалувун. Му марцIну ххювардай къуртал бувну тIий, буллуну бур тархъан­сса диплом.
Училищалуву дуклакисса мукьрагу шинай АьвдурахIман ивкIун ур учебный дивизиондалул партиялул организациялул секретарьну. Училище къуртал бувну махъ лавгун ур къуллугъ буллан Германнавун. 1984 шинал Германнава ва гьан увну ур Краснодардал крайрайн, Ейск шагьрулийн. Шикку каялувчинал ва сакиншинначинал опыт бусса АьвдурахIманнуйн тапшур бувну бур ПВО-лул личIисса дивизиондалул командирнал хъиривчунал къуллугъ.
1989 шинал ивтун ур ПВО-лул учебный центрданул политотделданул хъунаману. 1993 шинал Дагъусттаннайн зана хьуну, аьрали комиссарнал хъиривчуну зун ивкIун ур. Ххюра шинава запасрайн увккун махъ, «Российское военное братство» тIисса фондрай каялувшиву дуллан ивкIун ур.
Дагъусттаннай миллатирттал суккушиннарду щурущисса шиннардий (1998-2001) лакрал миллатрал суккушиннараву жяматращалсса даву дачин дурну ивкIун ур. 2001 шинал зун ивкIун ур республикалул Пенсион фондрай. КIира шинава ивтун ур Пенсион фондрал профсоюзрал организациялул председательну. 2004 шиная хIакьинусса кьининин Дагъусттаннал пенсионертурал союзрай каялувшиву дуллай ур. Ва организациялуву хIакьину 30 азарунния ливчу­сса пенсионертал бур. 2005 шиная шихунай АьвдурахIман хъанай ур Аьрасатнал Пенсионертурал союзрал председательнал цалчинма хъиривчу. 2013 шиная шихунай – Аьрасатнал ПрезидентначIасса ветерантурал иширтталсса буллалисса координацион советрал член.
АьвдурахIман МахIаммадов ур 2005 шиная шихунмай буклакисса «Дагъусттаннал пенсионер» кказитрал учредитель ва хъунама редакторгу. ХIакьинусса кьини Ухссавнил Ккавкказнаву му кказитрал дур ца яла хъуннасса тираж – 45 азаруннийн лахълахъисса.
— Жу жула кказитрай политикалул иширттая къачичару. Шикку бивщуну бикIайссар пенсионертуран аьркинмур – миннал хIакъиравусса законну, цIуллу-сагъшиву дуруччинсса маслихIатру. ЖучIан бучIайссар 100-хъул чагъарду. Гьарица чагъарданун жавабгу чичайссар жул зузалтрал.
ЦIана агьалинан хIукуматрал хIаллихшиннарду электрон журалий дуллай бур. Амма чIявуссаннан, хаснува оьрмулул хъуниминнан, кIулну бакъар ттизаманнул технологиярттащал зун. Мунияту жу тIитIарду «шамилчинмур никирал университет». Му тIивтIуну 3 шин хъанай дур. Ва чIумул дянив жу пенсиялийн уклакисса 3 азарунния ливчусса инсаннан уква лахьхьин барду компьютердащал зун. Ва давривугу жул ххуйсса ккаккияртту хьунни. 2016 шинал Президентнал грант ларсун, ми арцухгу 700-нния ливчусса инсантуран лахьхьин барду компьютердащал зун, — тIий, буслай ур АьвдурахIман.
Му бакъассагу, вайннал хъуннасса даву дуллай бур пенсионертурал гьунарду ялун личин бан, ми тяхъа-таза буккан бан. Аьрасатнал Пенсионертурал союзрал сипталий гьарица шинах пенсионертурал дянив дувайсса дур спартакиадартту. Уттинин 8 спартакиада хьуну дур. Гьашинумур хьунтIий дур Пенза шагьрулий, Бугьараминнал кьинилун хасну. Да­гъусттаннал Пенсионертурал союзралгу 8 инсанная сакин дур­сса команда хIадур дурну дур ми­кку гьуртту хьун.
— Жул мурад пенсионертал лайкьсса оьрму бутлати бавур, ялун нанисса никиран эбрат ккаккан давур, Дагъусттаннал аьрщарай паракьатшиву дуру­ччавур, — тIий ур АьвдурахIман.
ЧIалай бур, чув, ци даврий ухьурчагу, буттал къатлуву захIмат буллай аьдат хьусса ва аьрали къуллугъирттай савсъсса АьвдурахIманнул цалла даву лавайсса даражалий дуллай ушиву, цува зузисса давурттай бусравну ушиву. ХьхьичIунсса каялувчи ва ххаллилсса пишакар хIисаврай, лайкь дурсса наградарттугу ваначIа чансса да­къар, цаннарив яла бусравмур 2012 шинал дуллусса Президентнаясса цIа кусса ссят дур.