[dropcap]М[/dropcap]ахъсса ппурттуву МахIачкъалаллал аэропортрай, му гьарта-гьарза буллай, бацIаву дакъа давуртту най дур.Вай гьантрай шикку 8000-хъул квадрат метралийх дацIан дунни дунияллул халкьуннал дянивсса аэропортрал лагрулийсса терминалданул конструкцияртту.
МахIачкъалаллал аэропортрай 5 зурул мутталий бувну къуртал бан най бур цIусса терминал. Дишин най дур шикку 1800-хъул тонна муххал конструкциярттал. ЦIусса терминал бувну махъ МахIачкъалаллал аэропортрай билаятрал кьатIувсса рейсирдайн ссятрал мутталий 190 пассажир кьамул уллан най бур. ХIакьинусса кьини ссятрал мутталий кьамул уллай буссар 60 пассажир.
И. Саидова
ЦIусса терминал буллай бур Сочилийсса дунияллул халкьуннал дянивсса аэропорт буллалийни ишла дурсса технологиярттайну ва муххал конструкциярттайну. Жула аэропортрай цIусса терминал буллай байбивхьуссар 2016 шинал.
Шиккува кIицI лаган, 2014 шинал байбивхьуссар МахIачкъалаллал аэропорт цIу буккан буллалисса давуртту дуллай, 45 метралул гьарта бувссар самолетру леххайсса ща. Шикку ишла дурссар асфальт цIакьну ябувансса материал.
Аэропорт цIу буккан бувну махъ, 2014 шиная шихунмай, аэропортрай байбивхьуссар кьамул дуллай Airbus A318\ 319\ 320\ 321,
Boeing 737, Boeing757, Sukhoi Superjet 100, «Ан-148», «Ту-134», «Ту-154», «Ту-204\ 214», «Як-40», «Як-42» модификациярттал хъунисса самолетру. 2017 шинал май зурул 3-нния шихуннай – Boeing-767-200, Boeing-767-200ER, Boeing-767-300, Boeing-767-300ER, Airbus A-330-200 модификациярттал гьарта-гьарзасса салонну бусса самолетру. Мукунна, жула аэропортрай кьамул дайссар цинярда журардал модификациярттал вертолетругу.
