1 – мусил, 3 – арцул ва 5 чарвитул медаллу ларсунни Дагъус_ттаннал боксертурал июльданул 31-нния августрал 5-ннийнин Наз­раннай най диркIсса СКФО-рал чемпионатрай.

Сайки 100 Ухссавнил Ккавкказуллал спортсментал хIарачат буллай бивкIссар сентябрьданий Грозналий хьунтIисса боксрал Аьра­сатнал чемпионатрай гьуртту хьунсса ихтияр ласун.
Так ца Дагъусттаннал цачIун­дур командалул вакилнаща бювхъуну бур чемпионатрал ахирданийн марцIну, чувчIав ахкъавчуну уккан. Ва ур мусил медалданийн лайкь хьусса (56 кило) АьбдулхIаким Батыров. Арцул медаллан лайкь хьуну бур мукунма жула 3 боксер: Аьбдул СалахIуттинов, ХIусайн Аьлиев ва Темирлан Хангишиев.
Чарвитул медаллу ларсун дур Асламидин Аьлисолтановлул, Расул Аьлиевлул, Зубер Якьубовлул, Мурад Рабадановлул ва Шамил Мирзаловлул.
Чемпионатрал хIасиллайн бувну, Дагъусттаннал цачIундур командалул бувгьуну бур 2-мур кIану, цалчинмур кIанай хьуну дур Чачаннал команда.