Махъсса шиннардий лапва чIяву хьунни шагьрулувух заназисса машинартту. Машинартту чIявусса бушиврия къулайшивуртту духьурчагу, ДТП-ттугу чIярусса хъанай дур. Ххуллурдай апатIру хьуну Дагъусттаннай чIявусса инсантал литIлай бур. Опыт бакъасса водительтал, бахьттагьалт, велосипедрай наними ва пассажиртал оьрмурдацIа хъанай бур ххуллул низамрал тIалавшиннарду къадурурччуну. Ми хIарчIун рульданух щябикIлай бур, анаварну бачин бувну най бур, мюхчан байсса мухIулттив дахIлай бакъар.
Ва шин дайдирхьуния шинай МахIачкъалаллал ххуллурдай 206 ДТП хьуну дур. Миннуву 17 инсан оьрмулуцIа хьуну ур. Миннавасса ца чIивисса оьрчI бур. 297 инсаннан, миннаву 35 мюрщи оьрчIан личIи-личIисса цIунцIияртту хьуну дур.
Яла чIявусса хьуну бур бахьттагьалтрайн машина щусса ишру. Бахьттагьалтран чIявусса апатIру хъанай бур дарщу-дарккусса чIумал, хаснува чирахъру бакъасса ххуллурдай.
Май зурул 16-нний ссят 23.00. хьусса чIумал МахIачкъалалив Петр 1 цIанийсса кучалий 59-ми къатрал чIарав машина щуну бур мюрщисса оьрчIащал нанисса хъамитайпалийн. ОьрчIру ца 13 шинавусса, гама 7 шинавусса бур. КIулну бакъар машиналул марка, модель ва щун бувма цу уссарив. Хъамитайпагу, кIивагу оьрчIгу цIунцIияртту хьуну азарханалийн биян бувну бур. Ва иширан савав хьуну бур ххуллул низам къадурурччусса бахьттагьалт. Ми машиналул ххуллу лахълай бивкIун бур бахьттагьалтран ккаккан къабувсса кIанттурдай. Бахьттагьалт цанма ккаккан къабувсса кIанттурдай, къадагъа дуллалисса светофорданий ххуллу лахълахъисса, бавцIусса машиналуха хар-хавар бакъа ххуллийн бувксса ишру чансса хъанай бакъар. Ххуллул низамрал тIалавшиннарду шупIиртуралгу дуручлай бакъар, хаснува бахьттагьалтран ккаккан бувсса кIанттурдайх нанийни.
Июнь зурул 4-нний ссят 12.00 хьусса чIумал «Астрахань-Махачкала» федерал ххуллий «Мерседес-Бенц Е«200» машиналул шупIирнал щун бувну бур ххуллу лахълахъисса 60 шинавусса хъамитайпалийнгу, мунищал нанисса 8 шинавусса душнийнгу. Хъамитайпа бусса кIанай къуртал хьуну бур, душ – азарханалий. ШупIир ва иш хьусса кIаная ливхъун ур. Аьй хьуну дур анаварну бачин бувну най ивкIсса шупIирнай ва ккаккан къабувсса кIанттурдай машиналул ххуллу лахълай бивкIсса бахьттагьалтрай.
ХIурмат бусса бахьттагьалт!
Ххуллурдай укунсса бала-апатI къахьуншиврул ххуллу лахъияра бахьттагьалтран ккаккан бувсса кIанттурдай, му чIумалгу личIлулну бикIияра. Щюллисса чани лавхъсса чIумалгума зува мюхчанну бушиврий мукIруну мабикIару. Бургияра, итабакьлай бурув зува шупIирнал. ЦIансса чIумал ххуллу лахълахъийни янна-калий чанна лахъайсса затру дикIан аьркинссар. Мукунсса мухIлу ягу цамур ци-дунугу дархIуну бухьурча зу шупIирнан хIисав хьунтIиссару ва мунийну бала-апатIрая мюхчан хьунтIиссару. ШупIиртуралгу, бахьттагьалтралгу куннал хIурмат куннал буллалисса чIумалли ххуллурдай апатIру чан хьунтIисса.
Лиана Наврузбекова,
ДПС-лул батальондалул пропагандалул инспектор, полициялул хъунмур лейтенант
ХIадур бувссар
А. Аьбдуллаевал
