Аьралий савлугърал датарду

Август зурул 1-нний дакIнийн бутайссар Дунияллул цалчинмур дяъвилий ливтIуцири. Ва кьини 1914 шинал Германиянал Аьрасатнан дяъви баян бувссар.

***
Вара кьини 1770 шинал оьруснал аьрал КагуллачIасса туркнащалсса талатавриву ххув хьуссар.

***
Август зурул 2-нний 1572 шинал кIиниязтал Михаил Воротынскийл ва Дмитрий Хворостининнул каялувшиву дуллалисса оьруснал аьралуннал татарнал аьрал бух бувссар Молодинск талатавриву. Къиримнал хан Девлет – Гирейл 40 азара инсан усса армия ххит бувссар миннал бачIиссакссавагу бакъасса оьруснал аьралуннал. Гирейл аьралуннаву турк ва ну­гъайгу бивкIссар.

***
Август зурул 6-нний 1915 шинал Осовец тIисса къала ябуллалисса инсантал бас буван немецнал загьрусса газ ппив бувссар, амма оьруснал аьралуннал мадад къабуллуну немецнайн гьужумрай бувкссар. Му гьунар тарихраву личIантIиссар «жаназарттал гьужум» хIисаврай. Загьрусса газрал азурда бувсса оьрус­нал аьралуннал чувшиврий немец хIайранну бивкIссар.

***
Август зурул 9-нний 1714 шинал Петр Цалчинма каялувшиву дуллалисса оьруснал флот Гангут тIисса мысрачIа шведнал аьралуннаяр ххув хьуссар. Му ххувшаву ларсукунни Петр Цалчинманал, «Кьирийсса аьрал бусса паччахIлугъ ца ка думурди, флот дусса паччахIлугъ кIира ка думурди» увкуссагу.

***
Август зурул 12-нний 1759 шинал Салтыковлул каялувшиву дуллали­сса оьруснал аьралуннал союзниктуращал архIал КунерсдорфрачIа пруссиянал аьралуннащалсса талатавриву ххувшаву ларсъссар.
ХIадур бувссар
П. Рамазановал
***
Август зурул 15-нний 1799 шинал Александр Суворов каялувшиву дуллалисса оьруснал аьралуннал палангнал аьрал бух бувссар, 7 азара палангнал саллатI ливчIссар талатаврил майданнив, 3 азара ясирну агьссар.