Уттара дурккун дия ЦIуссалакрал шяравалу. КIюрххила шиккун нех дирхьуну най бия машинартту. Шяраваллил майданнив бавтIун бия мухлукьат халкьуннал, баллай бия личIи-личIисса миллатирттал мазурдийсса ихтилатру.

ТIивтIуну бия гьарица шяраваллил цала-цала майданну, бивхьуну бия лакку дукрардал супрарду, дирзун дия нажагьссанначIа яхьусса нукIу заманнул самоварду, личIинура нахIусса дия кIалашрай дурсса чяй. ЛичIи-личIисса республикардая, шагьрурдая, районная бувкIсса хъамаллураща бюхълай бия ччимур супралух щябикIан.
Хъамал махIаттал буллай бия цIуссалакрал жяматрал буттал буттахъая шихуннай ядурсса, ва кьини ккаккиялун дуккан дурсса, нукIу заманнул тIахIни-кIичIулул, лаххи-ликкиялул. Майданнив дуккан дурну дия райондалул аслийсса культуралул центрданул экспонатру. ВайннучIа аглан къавхьуну, тамаша къабувну цавагу хъамаличу къалагайва. ЧIирисса чIумул дянив хъуннасса даву дурну дия райондалул бакIчи ХIажи Айдиевлул каялувшиннаралу цIуссалакрал жяматрал. Фестивальданий гьуртту хьун бувкIсса творчествардал коллективирттан дузал дурну дия циняв шартIру. Шяраваллил паркраву бувну бия сахIна, тамашачитал щябикIансса кIанттурду, личIи бувну бия мюрщи циркачтурансса мурцIу.
ЦIуссалакрал райондалий най дия «Дусшивруллу жува бувгьусса» тIисса аслийсса культуралул республикалул фестиваль.
Райондалийн фестивальданий гьуртту хьун бувкIун бия вайннащал уссурвалшиврийсса дахIаву дусса Къиримнал Сакский райондалиясса, Ингушнал Сунженский райондалиясса, Чачаннал Ножайюртовский районнаясса делегациярду, Дарбант, Къизляр, Хасавюрт, Дагогни шагьрурдаясса, Хасавюртуллал, Гумбетуллал, Буйнасккаллал, Казбекуллал, Лаващиял, Нугъайнал районнаясса творчествалул коллективрду.
Фестивальданий гьурттушинна дан мукунма бувкIун бия ДР-лул ХIукуматрал председательнал хъиривчу Билал Оьмаров, ДР-лул Культуралул министр Зарема Буттаева, ДР-лул Миллатрал политикалул министр Татьяна Гамалей хIаласса республикалул делегация.
Райондалул бакIчинащал бусравсса хъамаллурал ххал бунни гьарица шяраваллил цала-цала аьдатру ккаккан дуллалисса, нукIу заманнул матахI ккаккиялун дирхьусса майданну.
Хъирив шадлугърал мажлис тIитIлай ихтилат бунни ЦIуссалакрал райондалул бакIчи ХIажи Айдиевлул.
— ХIакьину ва фестиваль нанисса ЦIуссалакрал райондалий бавкьуну ялапар хъанай буссар лакрал, чачаннал, яруссаннал миллатру. На барчаллагьрай ура вай инсантурайн ссахкIуй къабурувгун, дусшиврул арарду дуручлай тIий, буттахъал аьдатру ядуллай тIий. Хъунмасса барчаллагь тIий ура жул чIарав бацIан, жул кьини хъун дан бувкIсса хъамаллурахь, — увкунни ХIажи Айдиевлул.
Дагъусттаннал БакIчи Рамазан АьбдуллатIиповлул цIания цинявппагу фествальданий гьуртту хъанахъими барча бунни Зарема Буттаевал.
— Жула республикалул бакIчинал мудангу кIицI лагай къавтIавурттаву, балайрттаву, аьдат-эбадатирттаву яхьусса аслийсса культуралул дуручлай душиву жула сипат ва жула ляличIишиву. Мунияту, ванал тIалавшиннарайн бувну, 2013 шиная шихунмай республикалул шагьрурдай ва районнай тIитIлан бивкIунни Аьрасатнал халкьуннал аслийсса культуралул центрду. ХIакьину ва сахIналий творчествалул коллективирттал ккаккан дурсса къавтIавуртту ва балайрдугу Дагъусттанналгу, Аьрасатналгу культуралул ирсирал ца агьамсса бутIану хъанахъиссар. Жунна ялун нанисса никиращал хъуннасса даву дуллан аьркинссар жула ирс ябан, культуралул зузалтрал хIарачат буллан аьркинссар ва давривун жагьилми кIункIу бан,- увкунни ванил.
Ихтилатру бунни Къиримнал Сакский райондалул бакIчи Николай Росоловскийл, Ингушнал Сунженский райондалул депутатътурал советрал председатель ХIусман Умаровлул, Чачаннал Ножайюртуллал райондалул бакIчи Асланбаг Мужуруевлул.
Хъирив ЦIуссалакрал райондалул культуралул къатлул зузалтрал ккаккан дунни лакрал миллатрал багьу-бизу чIалачIи буллалисса къавтIаву.
Цаннияр ца яргсса программарду хIадур дурну дия Къиримнавасса «Казачки», Ингушнавасса «Эзди» ансамбльлал, ЦIуссалакрал искуствалул школалул, Дагъусттаннал Огнилиясса циркрал школалул ва мукунма цаймигу творчествалул коллективирттал.
Байрандалул мажлис бачин бувну ия ДР-лул лайкь хьусса артIист Марат Тимохин. Хъамаллураха аякььалий бия дуклаки оьрчIая сакин бувсса волонтертурал группа.
— Вайксса хъамал бувкIсса, хъуннасса лагрулул фестивальданий аьркин багьлай бия тиха-шиха бувкIминнан цимурца ккаккан дуллансса, жула культуралия, кIанттул ххазинарттая буслансса волонтертал. Жугу хIарачат барду жуйнна тапшур дурсса даву, лажин кIялану дуван, — тIий ур ЦIуссалакрал 1-мур школалул дуклаки оьрчI Шамиль Хутиев. Ил-аьлам бавтIусса ва фестиваль бюхттулсса даражалий, цукунчIавсса ххуттава бувксса иш къавхьуну, ляличIисса низамрай ларгунни. Фестивальданул кьабивтсса асардая рязисса акъа инсан акъая. КIулли ЦIуссалакрал райондалул бакIчинан цумурцагу даву цила багьайкун, сакиншиннарай дан. Цинярдагу хIадуршиннардал давурттугу хьхьичIа-хьхьичI цува хIала увххун дуллай ия. ЛяличIисса хIурмат-кьиматрай кьамул увай ванал районалийн увкIсса цумацагу хъамаличу. Фестиваль нанисса гьантрайгу, кьинибархан шяраву шанма-мукьва кIанттурдай тIивтIуну бия авадансса супрарду.

Николай Росоловский, Къиримнал Сакский райондалул бакIчи.

КIира шинал хьхьичI ЦIуссалакрал райондалущал жу дурссия уссурвалшиврийсса ва дусшиврийсса кьутIирду. Сакский райондалун 85 шин хъанахъисса юбилейрал мажлисрай гьуртту хьун бувкIун буссия ЦIуссалакрал райондалиясса хъунмасса делегация. Таний цIуссалакрал ккаккан дурна цала миллатрал авадансса творчество, халкьуннал багьу-бизу. Мукунма жугу гьуртту хьуссару Совет Союзрал КIийла Виричу АхIмадхан Султаннун 85 шин шаврин хасну республикалий ва райондалий дуллалисса мероприятиярдаву, бивссару Виричунал буттал шяравун. Къиримгу Дагъусттан кунма чIяву миллатру ялапар хъанахъисса регионни. Ялагу жува цачIун буллалиссару КIийла Виричунал цIа ларсъсса АхIмадхан Султаннул. Виричунал цIа цIуку Дагъусттанналли, ца – Къиримналли. Гьай-гьай райондалул бакIчи ХIажи Шихамировичлул ва фестивальданийн оьвкукун, жучIава хIурмат бусса инсантурачIан жу гъирарай бувкIру. 30-хъайсса инсантал буссар хIакьину шикку жул райондалиясса. Щак бакъар жула дусшиву уттиния тихуннай хъиннура цIакь хьуншиврий.

Тамара Леонова, Сакский райондалул «Казачки» ансамбльданул солистка.

Жул ансамбль сакин дурну 15 шин хъанахъиссар. Жу цалчинну Дагъусттаннайн бувкIсса. Барчаллагьрай буру жуйнма шиккун оьвкуну тIий. Дагъусттаннал халкьунная ливчIунни къамакъабитайсса, тIааьнсса асарду. Хъиннува ххуй бивзунни бакIрал ххуйсса оьрчIру-душру ва хъамал ххирасса инсантал.

Ширвани Мурадов, Олимпий чемпион.

«Жува дусшивруллу бувгьусса» тIисса фестиваль, мяйжаннугу миллатирттал дянивсса дусшиврул арарду цIакь дуллалисса хьунни. Райондалийн, ва жура дуллалисса даву хъун дан вайксса делегацияртту, творчествардал коллективрду бучIаву му хъунмасса ишри. Дагъусттаннал халкь оьрмулухун кувнащал кувгу, чIахху-чIарахминнащалгу бавкьуну, уссурвалшиврий ялапар хъанай бивкIссар ва уттиния тихунмайгу мукуннама бикIан аьркинссар.

Амирхан Амирханов, ДР-лул Халкьаннал мажлисрал депутат.

Ххаллилсса фестиваль хьунни. Ва фестиваль дан дан савав хьунни шанна нюжмардул хьхьичI чIаххурайсса Казбекуллал райондалий хьусса тIааьн бакъасса иширайн бувну, Республикалул БакIчи Рамазан АьбдуллатIипов ЦIуссалакрал райондалийн учIаву. Му чIумал хIукму хьунни республикалийгу, республикалул кьатIувгу жува бавкьуну бушиву, дустурал хIурмат бушиву тасттикь буллалисса дусшиврул фестиваль дан. Хъуниминнан дакIнийн багьсса ва пикри, укун ххаллилсса фестивальданийну къуртал хьунни. Умуд бур дусшиврул фестиваль аьдатравун дагьанссар тIисса.

Батыр, Ингушетиянал халкьуннан мажлисрал депутат.

Нюжмардул хьхьичI ЦIуссалакрал райондалиясса делегация бувкIун буссия жучIан хъамалу. Му чIумал Ингушнал Сунженский райондалул ва ЦIуссалакрал райондалул дянив чирчуссия хIала-гьурттушиврул кьутIирду. Утти жу бувкIун буру ва райондалий дуллалисса агьамсса меропиятиялий гьурттушинна дан. ЦIуссалакрал жяматрал жу хIурматрай кьамул бунну. КIул хьуру Дагъусттаннал миллатирттал культуращал, багьу-бизулущал. Пикри бур цахъи хIаллай шиккува аглан хьунсса, уздансса Дагъусттаннал халкьуннащал хъиннува гъанну кIул хьунсса.

А. Аьбдуллаева,
И. Саидова.