МахIачкъалаллал №33 школа-гимназиялул дуклаки душ Дарья Лысова Москавливсса «ПатриУм» тIисса гъинтнил лагерьданий сакин дурсса «Миллатирттал культурардал хасшиннарду» цIанилусса видео-конкурсрай кIилчинмур кIанттун лайкь хьуну бур.
З. АьбдурахIманова
Дарья занай бусса бур МахIачкакъалалив «ЦIулагаву» тIисса алхIаткьинирдай зузисса школалийн. Конкурсрайн ванил, цила уртакьтуращал цачIу, хIадур дурну диркIун дур жулла республикалийсса диннал культуралия бусласисса видео.
Ххув хьусса оьрчIру барчагу бувну, миннан бахшишру дуллуну дур Федерациялул Советрал къатраву Элмулул, кIулшивуртту дулаврил ва культуралул комитетрал каялувчинал хъиривчу Лилия Гумеровал.
КIулну бикIан, «ПатриУм» цIанилусса гъинтнил лагерь Гуманитар кIулшивуртту дулайсса институтрал проектри. Ванил мурад жула оьрчIаву гиччава най буна «граждан позиция» тарбия бавур ва Ватан ххира хьунсса давурттавух хIала буххан бавур. Проектрал лагрулий ттинин дурну дур 27 конкурс. Миннуй ххув хьусса щалва билаятраясса оьрчIру «ПатриУм» лагерьданий июньдалул 21-23-нний хьусса конкурсравухгу гьуртту хьуну бур. Шиккугу Дарья ххув хьуну бур.
Лагерьданий сакиншинначитурал оьрчIансса мастер-классру, лекцияртту, «ккуркки столлу» ва личIи-личIисса пишакартуращалсса хьунабакьавуртту хIадур дурну дур. Дуклаки оьрчIал вичIидирхьуну дур «Ххирар ттун Ватан» тIисса литературалул лекциялух, бивну бур Ххувшаврил хъунмур музейравун. Ахирданийгу «ПатриУм» лагерьданул оьрчIру бувцуну бур сайрданий Москавуллал дязаннийх: Кремль, ЯтIул майдан ва цаймигу кIанттурду ккаккан.
