Гьашину МахIачкъала шагьрулул гьану бивзун 160 шин хъанай дур. Му юбилейран хасну шагьрулий унгу-унгуну булувкьуну бур кIичIиртту, лахъ къатрал хIаятру, паркру, скверду бакьин буллай, чIюлу буллай, цIу буллай.
Щурущи дурну дур «НигьачIишиву дакъасса къулайсса ххуллурду» тIисса приоритетсса проект. Му проектрал лагрулий бакьин бан тIий бур Ахъушинскийл, Кошевойл, Нахимовлул, Титовлул цIанийсса ва цаймигу кIичIиртту. Дуллай бур ххуйссагу, цIа дан лайкьссагу, амма муницIунма кIулшилуща лаласун захIмат хъанахъиссагу давурттив.
Бур миннувух Николаевлул цIанийсса кIичIирагу. Мяйжаннугу, шикку, уттизаманнул техникагу зий, хъунисса давуртту най дия. Духми бордюрду дизан дурну, ганзсса асфальтрал къат рутIин ххуллу хIадур буллай бия. Амма ци къулай къабивзри учирча, укунмагу щюллишиврух, мурхьирдах мюхтаж бувксса шагьрулий кIичIира бакьин буллалиссар, машинарттансса ххуллу гьарта буллалиссар тIий, бугьарами мурхьру кьатI буллалаву кьурчIи бизлай бия.
КIичIираву дуцири давуртту дурну махъ, шагьрулул администрациялул бусаврийн бувну, пикри бусса бур ва кучалун уссурвал НурбахIандовхъал цIа дизансса.
Залму АьбдурахIманова
