ОьрчIру буруччаврил кьинилун щала дунияллийра ккаллину дур июнь зурул 1-мур кьини. ХIатта шинал мутталийсса кьинирдава ца кьини ОьрчIру буруччаврил кьинилун ккалли дулларчагу, аьлтта чIалачIисса ишну хъанай бур нитти-буттал бургаврила, ургъилданула оьрчIру тачIав яла багьан къааьркиншиву.

Ккуллал райондалийсса шяраваллаву бур ряхва оьрчIал багъ: Хъусрахь, Ккулув, Ваччав, ЧIяв, Хъювхъав, Вихьлив. Вай багъирдаву бур, ца группалия байбивхьуну, 4-5 группалийн бияннинсса оьрчIру тарбия буллай. ОьрчIал, тарбиячитурал дянив чIун-чIумуй шай конкурсру, викторинартту, спортрал зумунусса тIуркIурду.
Вана ва ОьрчIру буруччаврил кьинигу циняв багъирдаву хьунни байранну. Барча бувунни оьрчIру нитти-буттахъал ва къуллугъчитурал, дуллунни оьрчIан ка диллалисса бахшишругу.
Гьашинусса оьрчIал байрандалул кьинилух ябитан на лавгссияв Вихьуллал оьрчIал багъравун. ЧIюлусса яннардаву багърал хIаятраву ккурандалий бавцIуну бия оьрчIру. Вайннал ккаккан бувантIисса номердах ябитан бувкIун бия ниттихъулгу. Байрандалул кьинилущал оьрчIру ва нитти-буттахъул барча бувна оьрчIал багърал хъунмур ХIусайнова Залиххал. Гания гихунмай багърал тарбиячитал Халилова Аьйшал, АхIмадова Ххассул, Мяммащаллаева Марияннул кумаграйну оьрчIал лакку мазрай, оьрус мазрай бувккуна ватандалун, оьрчIал байрандалун, дусшиврун хас бувсса шеърирду, увкуна балайрду, ккаккан дурна къавтIавуртту. Хъиннура
ххуйну даркьуну дия душваврай тачIаврагу сийлия къалагайсса Вихьуллал чIинчIулт ва бакIвахIуртту. Ахирданий хъуними оьрчIал мюрщиминнан буллуна Аьрасатнал, Дагъусттаннал мюрщи ттугъру.

ХIажимурад ХIусайнов