Июнь зурул 7-нний ЦIущуллал шяравасса Ися МахIаммадовлун 80 шин бартлаглагисса творчествалул кьини хьунни. Шагьрулий дуклакисса шинну личIаннин, ва яхъанай ивкIссар, уттигу уссар, зунттавусса шяраву.

Ися МахIаммадовлул творчествалун хас бувсса мажлис хIадур бувну бия Ваччавсса библиотекалий. Мажлисрай гьуртту хьун бувкIун бия райондалул шяраваллал библиотекарттал каялувчитал, культуралул зузалт, дуклаки оьрчIру, учительтал, шаэрнал дустал, ванал шеърирду ххирами.
МахIаммадлул арс Ися МахIаммадов увну ур 1937-ку шинал ЦIущуллал шяраву. Дуклай ивкIссар ЦIущуллал байбихьулул школалий, 2-мур ЦIувкIуллал арулла шинал школалий, Буйнакскаллал педучилищалуву, 1966-ку шинал къуртал бувну бур Дагъусттаннал университетрал филологиялул факультет.
Цала захIматсса, амма халкьуннал дянив бусравсса учительнал ххуллу Исял байбивхьуну бур Рутуллал райондалий, Дюкъуллал школалий. Ца шинава тIайла увккун ур ЧIатIлухъиял байбихьулул школалул хъунаману. Ккаккан дурсса 3 шинай зийгу ивкIун, зана хьуну ур цала райондалийн ва зун ивкIун ур Вихьуллал школалий оьрус мазрал дарсру дихьлай. 1968-ку шинал ва ивтун ур Ккуллал райондалул школарттал инспекторну. КIира шинава ивтун ур ОНО-рал хъунаману.
Цалла цIуллу-сагъшиврул тагьар хьхьичIун дагьаврийн бувну, 1971-ку шинал Ися МахIаммадов зун ивкIссар ЧIяйннал школалий, 15 шинай – завучну, 11 шинай – директорну.
Ккаккиялунсса захIматрахлу лайкь хьуссар ларайсса цIардан ва чIярусса хIурматрал грамотарттан. 1997-ку шинал ванан дуллуссар «Дагъусттан Республикалул лайкь хьусса учитель» тIисса цIа.
Ванал даврил хьхьичIуннайшивурттая чирчусса цимирагу макьала дуркссар «ЧаннацIуку», «Илчи» кказитирттай. Пенсиялийн увккун махъгу Ися зий ивкIссар ЧIяйннал школалий оьрус мазрал учительну. Ваная хьуссар лавайсса категориялул учитель.
Ванал чирчусса чIярусса макьалартту дуркссар журналлай ва кказитирттай. 1996-ку шинал ванал бувгьуссар цалчинмур кIану Дуккаврил министерствалул баян бувсса конкурсрай, дяъвилул ва педагогикалул даврил ветерантураясса очерк чирчуну.
Оьрму ххуйну кIулсса, тIабиаьт ва буттал кIану ххирасса Ися МахIаммадов ур гьунар бусса шаэргу, чичугу. Ванал назмурду гьарца шинах дуккай лакрал кказитирттай ва журналлай. Мукунма ванал шеърирду бивщуссар «Ца кьюкьлуву», «Чирахъ», «ПархтIутIи» тIисса цайминнащал цачIусса жужирдай. Бувкссар цалалусса «Хъиншиврул чани» ва мюрщи оьрчIансса «Салман ва Султан» тIисса жужругу.
Ися МахIаммадовлул юбилейран цIа кусса мажлисрай махъру лавхъуна Ккуллал райондалул «ЧаннацIуку» кказитрал редактор АбрикI Къянчиевлул, «Илчи» кказитрал Ккуллал райондалийсса корреспондент ХIажимурад ХIусайновлул, Ваччиял шяраваллил администрациялул бакIчи Арсен МахIаммадовлул, ЦIущуллал школалул учительница Нураттинова Нарангуллул, Ваччиял школалул учительтал ХIусайнов ХIусайннул, МахIаммадов ХIасаннул, ЧIяйннал школалул учительтал АьбдурахIманов Сяидлул, МахIаммадова Сиянатлул, Ися МахIаммадовлул душ Маринал,1-мур ЦIувкIратусса ХIажиева Камилатлул, Ккуллал райондалул Ветерантурал советрал председатель Загьидиев Аьбдуллул.
Шаэрнал мукъурттийнусса балайрду увкуна культуралул зузалтрал: Гулжагьра Рамазановал, Асият МахIаммадовал, Шавлухъ СалихIовал, Саманият Аьлиевал. Ванал шеърирду бувккуна Вихьуллал, ЧIяйннал, Ваччиял школарттал дуклаки оьрчIал.
Цала мажлис хъун буван бувкIминнахь хъунмасса барчаллагь куна Ися МахIаммадовлул, бувккуна цаппара цалва махъ чивчусса шеърирду. Ванал библиотекалун бахшиш бувна ххюва томрайсса «Лакрал шаэртурал антология». Дуллуна ванан оьрчIал тIутIивгу. Мажлис хIадур бувсса ХIажиаьлиева ПатIиматлухьгу увкуна барчаллагьрал махъру.
ЦIуллу аннав ина, зунттал шаэр, Ися МахIаммадович!

ХIажимурад ХIусайнов