Вай гьантрай МахIачкъалалив Расул ХIамзатовлул цIанийсса Национал библиотекалуву тIиртIунни «Ттул шяравалу – Гъази-Гъумучи» тIисса суратирттал ккаккия.

Ва дур ДР-лул Культуралул министерствалул ва Республикалул Халкьуннал творчествалул къатлул районнал администрациярттащал цачIуну дуллалисса цIусса проект. Цил мураднугу бур Дагъусттаннал шяраваллал агьлу, тарихийсса кIанттурду, тIабиаьт, магьирлугъ, зузи кьинирду ва байранну суратирттай ккаккан дуллансса, жагьилтал цала буттал улклух къулагъас дуллали бувансса.
Выставкалий дирхьуну дия лакрал цIа-кьини гьаз дурсса, дунияллийх машгьур хьусса инсантурал, элмулул, магьирлугърал ишккаккултрал, захIматкашнал, сянаткартурал суратру. Дия райондалул администрациялул ва Аьрасатнал аслийсса магьирлугърал центрданул зузи кьинирдан, райондалий хъанахъисса иширттан, байраннан хас дурсса суратругу. ЧIяруми суратру дия цIанихсса фотожурналист Камил Чутуевлул.
Выставка тIитIлатIисса шадлугърай гьуртту хьунни ДР-лул культуралул министр Зарема Буттаева, виваллил иширттал министр Аьвдурашид МахIаммадов, Лакрал райондалул бакIчи Юсуп МахIаммадов, Аьрасатнал Жяматийсса палаталул член Айгум МахIаммадов.

Зарема Буттаева:
— Гъази-Гъумучи хъинну авадансса тарих бусса шяравалур, ларгмур ттуршукулий Ухссавнил Ккавкказнаву шагьрулун ккаллину бивкIсса, машлул ва экономикалул центрну бивкIсса. Шикку бивкIссар дунияллул хьхьичIунсса музейрдаву цан кIану лявкъусса давуртту канилух дурксса цIанихсса заргалтурал кюру.
Дагъусттан Республикалул БакIчи Рамазан АьбдуллатIиповлул амрулийн бувну, сакин бувну бур Аьрасатнал аслийсса магьирлугърал центрдал даврил ялув бацIлансса Координацион совет. Му советрал цалчинсса агьамсса проектну хъанахъиссар Дагъусттаннал шяраваллан хас дурсса суратирттал выставкарду. Укуннасса выставкарду хьунтIиссар цаймигу Дагъусттаннал хьхьичIунсса щархъан хас дурсса.

Юсуп МахIаммадов:
— ХIакьинусса выставка дур лап ляличIисса ва хъуннасса агьамшиву дусса. Вай суратирттал буслай бур лакрал тарихраягу, багьу-бизулиягу, аьдатирттаягу, цIанихсса инсантураягу. МахIачкъалалив дайлиртIуну махъ «Ттул шяравалу – Гъумучи» выставка дантIиссар Лакрал райондалул, Ккуллал ва ЦIуссалакрал районнал шяраваллавугу, яла – Дагъусттаннал цайми-цайми районнайгу.
Татьяна Петенина, магьирлугърал ишккакку:
— Дагъусттаннал цумур-цагу шяраваллил бур щихачIав къалавхьхьусса тарих, цанна хасъсса сянатру, аьдатру, магьирлугъ, миллат бюхттул бувсса инсантал. Гъумучиял шяраваллилгу Дагъусттаннан, Аьрасатнан, щалагу дунияллун буллуну бур цIанихсса арсру-душру. Минная жува буслан аьркинссару хъирив нанисса никирахь. Ккаккиялий дирхьусса 200-нния лирчусса суратирттаву ябацIансса дур революция хьуннинсса чIумул суратру. Вай суратирттайну бувчIин бюхълай бур инсантал цукун ялапар хъанай бивкIссарив, гайннал лаххи-ликкия цукунсса диркIссарив, ссаха зий бивкIссарив. Совет заманнул чIумалсса суратирттал буслай бур агьалинал оьрму, магьирлугъ хьхьичIуннай нанаврия.

Выставкалийн бувкIминнан ххаллилсса магьирлугърал программа ккаккан дурна Лакрал райондалул Аьрасатнал халкьуннал аслийсса культуралул центрданул зузалтрал.
Выставка дикIантIиссар май зурул 30-ннийнин.