Уттигъанну, Хъаннил байрандалул гьантрай, ЦIуссалакрал райондалийсса Чапаевкаллал шяраву хьунни байрандалун хасъсса хъунмасса мажлис. Шиккун бавтIун бия ва шяраву ялапар хъанахъисса циняв миллатирттаясса, личIи-личIисса оьрмулувусса, личIи-личIисса давурттай зузисса, жагьилссагу, бугьарассагу хъами. Бия чIявусса оьрчIру бусса нинухъру, производствалул передовиктал, захIматрал фронтрай ва къинттуллух зий бивкIми. Вай барча бан увкIун ия шяраваллил администрациялул хъунама МахIаммад-Паша Аьбдуллаев.
А. Аьбдуллаева
П. Рамазанова
Мажлис тIитIлай, хъамигу байрандалущал барча бувну, ванахьхьун махъ буллунни ЦСОН-лул отделданул хъунмур, агьалинал социал дузалшиннарал лайкьсса зузала ПатIимат Къубалаевал. Шяраваллил администрациялул бакIчи М-П. Аьбдуллаевлул цала чулухагу барча бувну, дурккунни райондалул администрациялул чулуха хъами барча буллалисса телеграмма.
Ва мажлис сакин бувну бия ЦСОН-лул ва шяраваллил культуралул къатлул зузалтрал. Мажлис хIадур бан ва микку гьурттушинна дан кIункIу бувну бия дуклаки оьрчIру. Мунил мурадгу бия ялун нанисса ник хъунанал хIурмат буну миннал бивхьусса захIматрал кьадру-кьимат буну тарбия даву.
Хъами байрандалущал барча бан увкIун ия шяраваллил аксакал Асбаров Амир. Махъ лавхъунни мукунма ЦСОН-лул отделданул хъунмур ПатIимат Къубалаевалгу. Ванил бувсунни Хъаннил байрандалул тарихрая. Бувсунни 1910 шинал 8-мур мартрал кьини Клара Цеткинал дартIун диркIшиву хъаннил ихтиярдал цIанийсса конференция, му конференциялий пикри хьушиву 8-мур мартрал кьини Хъаннил кьини хIисаврай кIицI лаглан. Шанна шинава му кIицI лаглан бивкIшиву Аьрасатнавугу.
— Хъаннийри дуниял дарцIуну дусса. Гьарица ххуймур, чаннамур, тIааьнмур хъаннияту наниссар, — увкунни ванил.
Махъру лавхъунни мукунма шяраваллил администрациялул хъунаманал заместитель С. МахIаммадовал, захIматрал фронтрай зий бивкIминнал чулуха Аь. Шамхаловал, чIявусса оьрчIру бусса ниттихъал цIания Кь-П. МахIаммадовал.
Байрандалий чачаннал миллатраясса хъамигу бухьувкун, ми барча бан жулва артистуращал бувкIун бия ЦIуссалакрал школалий дуклакисса чачан душ Л. Пирзукаева. Мунил увкунни чачан мазрайсса балайрду. Мажлис лахъа-хъун бунни Аминов Рамазаннул каялувшиннаралусса Чапаевкаллал художествалул самодеятельностьрал коллективрал, ЦIуссалакрал культуралул къатлул зузалтрал. Хъаннин хас бувсса балайрду увкунни Рамазан Аминовлул цалагу.
Ва мажлис баву бакъассагу, «Как живешь, ветеран» тIисса акциялул лагрулуву, хьхьичIунсса зузалтрачIан шаппа-шаппайн лавгун бахшишру дунни.
ЦСОН-лул чулуха ХIурматрал грамота дуллунни ва байрандалул мажлисравух гьурттушинна дурсса школалул художествалул самодеятельностьрал коллективран, барчаллагь увкунни 55 шинай учительшиву дурсса захIматрал ветеран Роза Жалаловахь. Ва байрандалул мажлис нанисса чIумал бавунни ххарисса хаваргу. Мажлисрал сакиншинначи ПатIимат Къубалаева республикалий баян бувсса «Яла хьхьичIунма социал зузала» тIисса конкурсраву, «Лучшая заведующая учреждения социального обслуживания населения» тIисса номинациялуву ххув хьушиву. Утти ванил документру тIайла бувккун бур Москавлийн. Умуд бур ПатIиматлул тийхгу хьхьичIунсса кIану бугьаншиврийн. Жугу барча тIий буру цилла даву ххирасса, цIими ххисса, инсаншиврул бутIа буллусса, къуманал дакI ххари дан хIадурсса ПатIимат Къубалаевахь ва ххувшаву.
Гьарица хъамитайпалул оьрмулуву ххувшавуртту ва ххаришивуртту чIяру даннав.
