ХIакьину жу жулва кказитрай цIусса рубрикалул хъиндайдихьу дуллай буру. Му рубрикалун цIагу дизлай буру «Варистал». Ялун нанисса ник, му жулла культуралул, аьдатирттал, багьу-бизулул, рувхIанийсса ирс-ххазиналул варистал хъанай дуну тIий. Дагъусттаннал университетраву филологиялул факультетрай лакрал отделениялий дуклакицири студентътал – ми ла­кку мазрал тIайланмасса варисталли. Мири ла­кку мазраха зунтIимигу, лакку маз лахьхьин буллантIимигу. Гъирарай ва рубрика тапшур дуллай буру лакрал отделениялул студентътурайн. Щил ци учирчагу, капливун къабагьсса, бюкъавхъусса бухьурчагума, цалчинми ххару дакIнийхтунумири. ДакIнийхтунусса ххуттардияр гихунмайсса ххуллу цIакьгу хъанантIисса. КарчI къадагьарча, гъира къалещарча. Буниялттунгу, ттулва миллатран хайр-мюнпатрансса давриха – лакку мазраха зунну тIий бухьурча. ТIайлабацIу баннав зун, лакрал отделениялул студентътал! Зул кьалам ягу-ялун магьиргу, усттаргу хъананнав! Зул чичрулул давриву хъиндайдихьу дуллалисса ва лажин учительтуран хас дурсса душаву – мугу зул ххуйшивур. Зувату бувксса чичрулул цалчинми ххару – зухьра дарс дирхьусса учительтурайн барчаллагьрайсса буну тIий.

* * *
Жулва билаятрай кIицI лагайсса Учительнал кьинилул хIурматран зуна яла ххирама учительная чичара увкукун, на пикрирдавун лавгунав. Ччай бия цимигу ттула учительная чичин. Амма на язи угьав ттуна яла бусравма учитель Мажидов Илияс Рамазанович.
На чIивисса чIумал Илияс Рамазанович зий уссия шяраваллил администраторну. Яла школалий тарихрал дарсру дихьлан ивкIуна. ХIакьинусса кьинигу учительнува зий ур.
Илияс Рамазановичлущал на кIул хьуссара 5-мур классраву дуклакисса чIумал. Ттул ванаясса цалчинмур пикри бия: хасият кьянкьасса, тIалавшин хъуннасса, хIакьсса тарбиячи. Ванал дихьлахьи­сса историялул дарсирдай ттун най дунара дакI даркьуна. Гъирарай лахьлангу бикIайссияв. Дарс хъинну дурчIин дайва, гьарта-гьарзану бусайва. Ванал дарсирдай бизаршиву къадикIайва. Ца-ца чIумал Илияс Рамазановичлул личIи-личIисса хIазсса хавардугу бусайва – оьрмулуву хъанахъисса, хьусса иширттая, цанма ккавкмуния.
Илияс Рамазановичлун хъинну ххуйну кIула цалла предметгу, бюхъайва оьрчIащал маз лякъингу. Цувагу ия дакI тIиртIусса, хъинсса.
Ванал жу личIи-личIисса кIанттурдайнгу буцайвав, ми кIанттурдаяту жухь гьартану бусайва. Муниятугу жун жулла шяравалугу, буттал улчагу хъиннува ххира шайва.
Барчаллагьрай бикIара Илияс Рамазановичлуйнгу, ттунна кIулшивуртту дуллай бивкIсса махъми учительтурайнгу.

Улубиева ТIутIи,
1-мур курс, 1-мур ЦIувкIратусса

* * *
Учительнал пиша бур яла аьркинмур, амма яла захIматмур
Гьарца учительнан ччиссар цалла дарс дирхьусса оьрчIру лажин кIялану бувккун, миннаяту ххуйсса инсантал хьуну. Яла хъунмур ххаришивугу учительнан хъанахъи­ссар оьрчIал барчаллагь. Жунма тачIав хъамабитан къабучIир миннал жула ялув бувсса захIмат.
Циняв учительтал цакуцсса къабикIай, циняв бур личIи-личIисса, амма оьрчIругу бур личIи-личIисса. Учительнал цалчинмур мураднугу хъанай бур цалла дарс дишайсса оьрчIащал ца маз лякъаву. Му хъунмасса гьунарди.
Жул Щардал школалий личIи-личIисса учительтал бур. Ттун ми цинявгу ххирар, цанная ца личIи ан къахьунссар. Учительнал жула ялув байсса захIмат щилчIав къабайссар, так нитти-буттал бакъа. ЦичIав къакIулсса мюрщи оьрчIая, оьрмулия, дунияллия диялсса кIулшивуртту дусса инсантал баншиврул хъунмасса гьунаргу, ссавургу дикIан аьркинссар, оьрчIру ххиранугу бикIан аьркинссар.
Учительнал даву так школалий дарс дишаврийну къуртал къашай­ссар. Дарсирдайн хIадур хьунгу, оьрчIал тетрадру ххал бангу, гайннащал личIи-личIисса школалул кьатIувсса давуртту дуллангу учительнан хъунна­сса чIун аьркин шайссар.
ОьрчIан дуккаврих гьавас бутавугу учительнал агьамсса давур. ОьрчIал хасиятругу, дуккаврихсса гъирагу, гьунаргу цакуцсса къабикIайну тIий, учительнан багьайссар гьарца оьрчIал хасият дурчIин, гайннал дакIурдичIансса ххуллу лякъин, гайннавусса гьунарду аьч бан. Цалла даву кIулсса, му даву ххирасса учитель хьунаакьаву – му хъунмасса тIайлабацIур.
На барчаллагь учин ччай бура ттухьра дарс дирхьусса циняв учительтурахьгу, му пиша язи бувгьуну, захIмат буллалиминнахьгу. Зу бувмур жу тачIав хъамакъабитанну.

Оьмарова Асият,
ш. Щар

* * *
На ялапар хъанай бура Бабаюртуллал райондалийсса Татаюрт тIисса шяраву. Сангардал школагу къуртал бувну, дук­лай бура Дагъусттаннал университетраву, филологиялул факультетрай.
Ттун ччай бур бусан ттухьра дарсру дирхьусса цинявппагу учительтурая. Миннан цинявннан хас буллай бура вай махъру:

Ттул учитель, бусравма
Мудан чIарав уссара,
Оьккинийгу, ххуйнийгу,
Ка дуллуну, гьаз байма.
ЛичIину бусан ччай бура ттунма яла ххирамур, аьзизмур учительницая, хъункIултIутIи кунма, пар-пар тIутIисса, школалул директор АхIмадова Магинора Муртазялиевная.
Дагъусттаннал университетрал дагъусттан филологиялул факультетгу къуртал бувну, таман­сса шиннардий Магинора Муртазялиевна зий бур Сангардал школалий, оьрус мазрал дарсру дихьлай. Хъунма хIал къавхьунни ва хъинну жаваблувсса даврий – школалул директорну бивтун. Хъунмасса захIмат бихьлай бур Магинора Муртазялиевна школалул даву ххуй дан, ванил сий гьаз дан. Ва чIирисса, мукьра-ххюра щар хIала даркьуну дурсса Сангардал щаргу машгьур хъанай дур школалий дуллалисса давурттайну. Жул школалул оьрчIру, цуппа директор бакIчину, лагайссар цинярда фестиваллайн, олимпиадарттайн, занагу бикIайссар хьхьичIунсса кIанттурду бувгьуну.
Магинора Муртазялиевна бур давривугу хIарачат бусса, дакI-аьмалгу хъинсса, дуклаки оьрчIру ххуйну бувчIайсса, ссавур дусса, ххаллилсса инсан. Нава педагогнал пиша язи бугьангу ттун Магинора Муртазялиевна эбратну хьунни.

Мусаева Наида,
Бабаюртуллал район,
ш. Татаюрт

* * *
Жул школалий учительну зий ур Дандамаев Шамил Оьмардул арс. Ттула школалийн ялтту буккан бувкIсса кIанай, на Шамил Оьмаровичлущал чIиви-хъунсса ихтилат бав.
– Шамил Оьмарович, жула шяраву бур личIи-личIисса щархъаясса лак. Вилва мархрая, инава шиккун ча увкIссарав буси.
– На увссара 1963-ку шинал ГьунчIукьатIрал къутандалий. Шиккувасса байбихьулул школалий дуклай ивкIссара. Ттун дакIния къабуккай ттулва учительница ХIусиева Гулизар Мажидовна. Дуккаву ттун ххира хьуна ганил хIарачатрайну. Дянивмур даражалул школа на къуртал бувссар Сангардай, 1981-ку шинал. Яла увхссара Дагъусттаннал университетрал математикалул факультетрайн. Дипломгу канихьну, зана ивкIссара нава къуртал бувсса школалийн.
– Му пиша язи бугьаву цукун хьуна?
– Ттун чIивинийва ххирассия хIисавртту, задачартту буллан. Математика дур яла агьаммур, махъми цинярдагу элмурдаву аьркин хъанахъисса элму. Мунияту, математикалул дарсругу школалий яла агьамминнуву дур.
– Ина зий хъунмасса хIал хьуну бур. Вилва пишалуву цукунсса хьхьичIуннайшиву хьур?
– Ттул ва школалий зий хьунни 27 шин. Ттул учениктал сайки цинярда школалул олимпиадарттаву гьуртту шайссар, даим хьхьичIунсса кIанттурдугу бугьайссар. Ттигъанну лавгссияв ххюя ученикнащал Бабаюртуллал зоналул олимпиадалийн. Миннава мукьуннал цалчинмур, цаннал кIилчинмур кIанттурду бувгьунни. Цалчинми кIанттурду бувгьусса мукьагу оьрчI лавгссар кIилчинмур турданий Бавтугъайливгу. Шиккугу кIиннал цалчинми, кIинналгу кIилчинми кIанттурду бувгьунни.
– Вилва пишакаршиврул даража бюхттул бавриву ина цукунсса давуртту дав?
– На ттулла кIул­шивуртту гьаз давриха, ттизаманнул элмулул даражалий ттулламур даву давриха мудангу зий ура. Гьуртту шара личIи-личIисса конкурсирттаву. 2009-ку шинал «Лучшие учителя России» тIисса конкурсраву гьуртту хьуну, ххув хьура, Аьрасатнал Президентнал грант ласав, арцуйнусса бахшиш – 100 азарда къуруш. 2011-ку шинал ласав «Почётный работник образования России» тIисса цIа.
– Миксса хьхьи­чIу­н­­най­шивурттугу духьувкун, вин вила элмулул даража лахъ бан дакIний бакъарив?
– На му чулухунайгу зий уссара. 2009-2012-ку шиннардий на уссара ДГПУ-рал математикалул ва информатикалул методикалул кафедралий соискательну цIакь хьуну. Дуллуссар кандидатшиврул экзаменну. ЦIана къуртал дуллай ура кандидатшиврул диссертация. Умуд бур ялун нанимур шинал му дуруччин.
– Инава школалий зузисса шиннардий цукунсса-дунугу дахханашивуртту хьурив?
– Хъинну чIярусса ххуй чулийннайсса дахханашивуртту хьуссар.
– Ина рязину икIарав вилла даврия, вилва учениктурая?
– ЧIявуми дуклаки оьрчIру бикIай гьунар бу­сса. Ттул дарсру гъирарай лахьлан бикIай. ЧIа тIий циняв ттулва учениктуран, циняв дуклаки оьрчIан тIайлабацIу, цалва-цалва мурадирттайн бияву.
– Хъунмасса барчаллагь, Шамил Оьмарович. ЦIуллу аннав. Инагу ияннав вилва мурадирттайн, оьрмулувугу, элмулувугу.
Ихтилат бувссар
Мусаева Наидал