Гьар кьини МахIачкъалаллал кучардавух заллу-зал акъасса ккаччив бугьлагьисса къуллугърал зузалт занай байбивхьуну бур. Ми ккаччив кинологтурал биян байссар Ленинккантуллал ва Семендердал дазуй цIуну бувсса « Питомец » тIисса приютравун.

З. АьбдурахIманова
ХIакьинусса кьини кинологтурал мурад бур оьсса, халкьуннайн хIап тIисса ккаччив бувгьуну, приютраву «бешенствалул » азарданиясса прививка дуван, вакцина буван ва гихунмай, карчIру къадуваншиврул, кка­ччай стерилизациялул операцияртту буван. Кьини къашайсса дур вайннал къуллугърал телефондалийн халкьуннал къаоьвкусса, ккаччая нигьачIишиву душиврия къабувсъсса.
Лавгсса бигьалагай гьантрай «Питомец » приютраву, масалдаран, бувну бур цалчинсса стерилизациялул шанма операция. Цал ккаччив, анестезия дурну, шанаши байсса бур, яла ветеринартурал бувайсса бур операция. Ва буллай шайсса дур дачIи ссят.
МахIачкъалаллал ветеринариялул управлениялул хIакин-эпизоотолог МахIаммад Зай­налаьбидовлул бусаврийну, укунсса журалул приют буваву ва цIусса къуллугърал даврил ца агьаммур шачIану хъанахъиссар. Приютрал даву ца ххуттавун дагьссаннун ккалли хьунтIиссар, зуруй 20 операция буллан бивкIукун. Операция бувну махъ ккаччив бакьайсса бур карантин дусса, хасъсса лампарду лархъсса кIанайн. Шинал ахирданийннин 250-сса ккаччай операция буварча, шагьрулуву ва тагьардануцIун бавхIусса масъала хьхьара хьун тIий бу­сса бур.
Приютравусса тагьарданущал кIул хьун шиккун мукунма бувкIун бур жанаварт буруччай сакиншиннардил вакилталгу. Вайннал къула­гъас дурну дур карантин ду­сса кIанай дяркъу душиврух ва баян бувну бур операция бувсса ккаччан къабучIишиву бя­къин. Ва иширал хIакъираву приютрал хъунама АьбдулхIамид МахIаммадовлул ца ссятрал дянив хасъсса, къатри гъили бай­сса, лампарду дучIан дурну, вайннал тавакъю дузал бувну бур.