Мартрал 5-нний ДР-лул Президентнал кIанайсса Рамазан АьбдуллатIипов бакIчисса Дагъусттаннал делегация гьуртту хьунни «Сбербанк России» ОАО-лул хъунама Герман Грефлул дуллалисса семинар-совещаниялий.
Дагъусттаннаясса делегациялувух бивкIссар ДР-лул ХIукуматрал Председатель Мухтар Мажидов, ганал хъиривчутал, ДР-лул Хъунмур банкирал председатель Сиражуттин Илиясов ва республикалул министерстварттал ва ведомстварттал бакIчитал.
Семинар-совещаниялий ихтилат буллай, Г. Грефлул бувсунни стратегиялул менеджментрал гьанурдая, давурттал принципирттая, аьмсса мурадирттая ва масъаларттая, давриву ишла дуллалисса ттизаманнул технологиярттая. Ихтилат хьунни мукунма агьалинал банкирал системалийн вихшала дишаврия.
«Зуйнна вихшала дирхьусса инсантурал хьхьичI зу жаваб ласласиссару. ЛичIи-личIисса организациярду буссар, цащава шайну тIий къажанжу дуллалисса. Сбербанкрай чIярусса арцу дур, миккугу хьунтIиссар шаймур ххяп-шап дан, миллиард бацин къазахIматссар. На ттулва хьхьичI бакIрайва задача бивхьуссия му ххуллу лакьин, мунияту зун бувцуссия микку зун лайкьсса инсантал. Жунма аьркинссар тасттикь бан, ва хьхьичIвасса совет организация бюхъайшиву дунияллийсса финансирттал компаниярттава ца яла ттизаманнулмурну хьун. Жулла командалуща му масъала щаллу бан бюхъанссар. Бюхъайссар чIявусса тамахIру хIасул хьун. Ттул пикрилий, яла хъунмур масъалану хъанахъиссар ми тамахIирттащал талатаву дачин даву. ХьхьичIми шиннардий Дагъусттаннай арцу дацлай бия. Арцу итадакьлай бия Дагъусттаннайн, амма хIасиллу хъанай дакъая. На учIайссияв республикалийн, кIул шайссияв жура арцу ссан итадаркьуну диркIссарив. Амма федерал бюджетраву итадаркьусса миллиард къуруширттал ишла дурсса кIанттурдал аьш-бакI къалякъайва. Аьркинссар дикIан властьрал культура, власть дикIан аьркинссар аьчухсса, тIиртIусса, га халкьуннаха къуллугърай дикIан аьркинссар. Му чIумал давурттал хIасиллугу хьунтIиссар», — увкунни Г. Грефлул.
Ганал мукъурттийн бувну, гьарца каялувчинал хьхьичIсса масъала хъанахъиссар цачIавасса зузалал бюхъулун кьимат бищаву, ганал даврил мюнпат ххи баву, цанчирча хьхьичIунну зузисса команда дакъахьурча, хьхьичIунну зузисса каялувчигу къаикIайссар.
Совещаниялий ихтилат бунни Дагъусттаннал бакIчи Рамазан АьбдуллатIиповлулгу. Ганал бувсунни Дагъусттаннайн цува учIаврил хIакъираву, шикку хIукумат дузал даврия. ХIакьину гьарзат дунияллий ччяни даххана хъанай дур. Жува дунияллий, Аьрасатнаву, республикалий хъанахъисса иширттал хъирив лаллай бакъару. Мунияту жува бикIан аьркинну хъинну дурккусса, за кIулсса, цIу-цIуну ялун дуклакимур ччяни лаласун бюхъайсса», — увкунни Р. АьбдуллатIиповлул. Ганал барчаллагь увкунни Герман Грефлухь хIала-гьурттуну зузаврихлу ва бувсунни хIадур дурну душиву ляличIисса проектирдал ва инвестициярдал Стратегический совет сакин баврил хIакъиравусса ДР-лул Президентнал ХIукму.
ХIадур бувссар
ХI. Аьдиловлул
