Мартрал 5-нний ДР-лул Шяраваллил хозяйствалул министерствалий хьунни «ДР-лул шяраваллил хозяйствалул кооперациялул цIанасса тагьар ва мунил ялун бучIанмур» тIисса масъалалун хасъсса «ккуркки стол». Га бачин бувну ия шяраваллил хозяйствалул министрнал хъиривчу Шарип Шарипов.

ХIасан Аьдилов
БатIаврий гьуртту хьунни министерствалул жаваблувсса зузалт, районнал шяраваллил хозяйствалул управлениярттал хъуними, журналистътал.
Ххалбигьлагьисса масъалалул хIакъираву хъунмур ихтилат бунни Шарип Шариповлул. Ганал бувсмунийн бувну, шяраваллал масъалартту щаллу булланшиврул лябуккан буллан аьркинну бур личIи-личIисса журардал кооперациярду. Шяраваллил хозяйствалул муштаришиврул кооперациялул давуртту хьхьичIуннай дуллалаврийну бюхъан тIий бур базарду дукиялул буцIин бан, зузи кIанттурду гьарза бан, агьалинал маэшат ххуй бан, шяраваллил хозяйствалуву ттизаманнул технологияртту ишла дуллан, шяраваллаву инфраструктура дузал дан, шяраваллил жяматрал культуралул ва кIулшиврул даража лавай бан, ишбажаранчишиву лядуккан дуван.
Кооперативру лябуккан бувну, гай агропродовольствиялул рынок­рал системалуву ишла къабувссаксса, хъунисса ишбажаранчишиврул структурардал гьанулий, шяраваллил хозяйство коммерциялул ххуллийн дучIан къадурссаксса, жунна ччисса хIасиллу къахьунтIиссар. Мунияту захIмат хьунтIиссар Аьра­сатнал Федерациялул Дукиялул мюхчаншиврул доктриналулгу, Шяраваллил хозяйство лядуккан даврин хасъсса паччахIлугърал программалулгу шяраваллил хозяйствалул хьхьичI бивхьусса масъаларттугу щаллу бан.
Дагъусттаннай, Аьрасатнал цаймигу регионнай кунма, шяраваллаву личIи-личIисса журардал ва системарттал кооперативру хIасул хъанай бур. Миннувату яла агьамми бур шяраваллил хозяйствалул кооперативру (производствалулсса ва муштаришиврул) ва муштаришиврул обществартту (потребительские общества).
Масалдаран, шяраваллил хозяйствалул производствалул кооперативру (СПК) ягу колхозру Да­гъусттаннай чIярусса шиннардий яла чIяруми диркIссар, миннул аьдад дия сайки 500, ягу циняв шяраваллил хозяйстварттал организациярдал 70 процент. Щалва билаятрай хIакьину циняв шяраваллил хозяйствалул предприятиярттава СПК-рдал 25% бур, амма 2001 шинал миннул бивкIссар 50%.
Цуксса хIайпнугу, республикалул шяраваллил хозяйствалул бутIувусса чIявуми СПК-рду так формалийну хъанай бур кооперативруну, цанчирча миннувусса укунмасса (рядовые) члентал гьур­тту хъанай бакъар кооперативирттал иширттавух, миннаща бюхълай бакъар цалва председательтурахь укун бара, мукун мабари учин. «О сельско-хозяйственной кооперации» тIисса федерал закон чIявуми СПК-рдаву зий дакъар, члентуран муданма кIулну къабикIай кооперативирттал хъус щил, цукун ишла дуллай буссарив, мунияту шяраваллаву кооперативру сийлий бакъар.
Шарип Шариповлул бувсунни шяраваллил хозяйствалул муштаришиврул кооперативру (СПоК-ру) республикалий та, цукун хIасул хъанан бивкIссарив, министерствалул цукунсса кумаг буллай бивкIссарив ми сакин бавриву. Ганал мукъур­ттийн бувну, цIана аьркинну дур шяраваллил хозяйствалул муштаришиврул кооперациялул даву лядуккан дувансса паччахIлугърал политика. Яни аьркинну бур ца­хъисгу ххуйсса даражалийн буцин законнал база ва ишакаш дуван ми иширттан хасъсса программартту. Ххалбигьлагьисса масъалалул хIакъираву ихтилатру бунни мукунма ДР-лул Экономикалул министерствалул Управлениялул хъунама Шагьмардан Мудуевлул, цаппара СПК-рдал каялувчитурал ва цайминналгу.