Февральданул 10-нний Къабардин-Балкьарнал республикалий Нальчик шагьрулий лавайсса даражалий хьунни Дагъусттан Республикалул Кьинирду.
Бадрижамал Аьлиева
Жулла республикалул культура, искусство, багьу-бизу ккаккан буван Къабардин-Балкьарнавун лавгунни хъунмасса делегация, Дагъусттан Республикалул БакIчинал каялувшиндаралу. Шадлугъравух гьуртту хьунни КБР-лул БакIчи Юрий Коковгу.
Нальчикрай махъ лахълай, Дагъусттан Республикалул БакIчинал увкунни:
— Ккавкказуллал дуссар аьмсса цикссагу затру, циняв жулва миллатру кунниха кув хъинну лавхьхьусса бур. Жулла культурарду дур кувнничIан кув гъансса. Шиккува мукIру хьун ччива нава мудангу Къабардин-Балкьарнал республикалий хIайран хъанай икIайшиву ва Нальчик ттунма ххирасса шагьрурдавасса ца бушиву. Дагъусттан мудангу зул хьхьичI тIивтIуну буссар, хъамаллурая жу мудангу ххариссару, — увкунни Р. АьбдуллатIиповлул.
Къабардин-Балкьарнавусса Дагъусттан Республикалул Кьинирдал программа хIадур дурну дия ДР-лул Культуралул министерствалул. Му культуралул программалийн бувну, Нальчик шагьрулий хьусса хъуннасса концертравух гьуртту хьунни «Лезгинка», «Молодость Дагестана», «Хасавюрт» къавтIаврил ансамбллу, «Дагъусттан» балай учаврил группа, Азирбижаннал, Лакрал, Къумукьнал, Лазгиял, Оьруснал театрдал артистътал, концерт дачин дурсса Аьдил Уцумиев, балайчитал Лариса ХIажиева, Зайнаб МахIаева, Амина Гунашева, Аьбдулла МахIаммадмирзаев, Айдун Мамедов, Сафи Султанова, МахIаммадрасул Рабаданов, концертрал каялувчи Карен Мкртычан ва чIявусса цаймигу.
Дагъусттаннал Кьинирдал лагрулий ккаккан дунни «Ттул Дагъусттан» выставкагу.
Кьинирдавух хьхьичIунсса гьурттушинна дурсса ДР-лул культуралул министр Зарема Буттаева буслай бур:
— Нальчик шагьрулул Музыкалул театрданул сахIналий ккаккан дурсса концертрал-театрданул программа ххишала дакъа ххуйну кьамул дунни Къабардин-Балкьарнал инсантурал. Дагъусттаннал искусствалул усттартурал лавайсса даражалий щаллу дурсса му программа хьунни Дагъусттаннал культуралул мяйжаннугусса байран. ДакIнийхтунусса барчаллагь учин ччай бура Дагъусттан Республикалул каялувшиндарахь, хасну БакIчи Рамазан АьбдуллатIиповлухь, КБР-лул БакIчи Юрий Коковлухь. Барчаллагь учин ччай бура КБР-лул Культуралул министерствалухь, хасну министр Мухадин Кумаховлухь. Хъунмасса барчаллагь ва программалувух гьуртту хьусса цинявннанмагу, цал ххишалагу жула культуралия пахру бувансса багьанану хьусса, — тIий бур Зарема Ажуевна.
Лакрал театрданул артистътурава Къабардин-Балкьарнавунсса аьрххилувух гьуртту хьунни Аслан МахIаммадов, Аьбдул Мурадов, Шамсуттин Къапланов. Му аьрххилия укун буслай ур Аьбдул Мурадов:
— Хъинну хIазсса, тяхъасса аьрххи хьунни. Хъинну ххуйну хьунагу бавкьунну, хъинну ххуйну тIайлагу бувккунну. Концерт хьунни лавайсса даражалий, яргну, ххаллилну. На дургьуну уссияв 1 Петрдул роль ва шаэр, чичу Алим Кешоковлул роль – жучIава Расул ХIамзатов куна, КБР-лий машгьурсса чичул роль. Шадлугърал ахирданий «Лезгинка» ансамбльданул директор Жамбулат Мусаевичлун КБР-лул БакIчи Юрий Коковлул дуллунни «Къабардин-Балкьарнал Республикалул культуралул лайкь хьусса зузала» цIа, мукунна «Къабардин-Балкьарнал Республикалул лайкь хьусса артист» цIа дуллунни ва ансамбльданул балетрал артистка Ариадна Рамазановангу. «ДР-лул лайкь хьусса артист» цIа дуллунни Аьдил Уцумиевлун, мукунна цаппарасса культуралул зузалтрангу.
