Январь зурул 25-нний ЦIуссалакрал райондалул администрациялул къатраву агьали кьамул бунни ДР-лул транспортрал, связьрал ва энергетикалул министрнал цалчинма хъиривчу Арсланов Арслан Аьбдулвагьитовичлул.
Ванащал агьали кьамул буллай ия ЦIуссалакрал райондалул бакIчинал хъиривчу ХIамзатов Султан ТIагьировичгу.
Шиккун бувкIсса агьалинал сукку бунни аьрщарал, газрал ва ттукIрал шяраваллу дузал даврил, чачаннан къатри зана ритаврил хIакъиравусса ва цаймигу масъалартту.
Коллективрал чулухасса масъаларттая бусан бувкIун бия ЦIуссачIурттащиял шяраваллил администрациялул зузалт. Вайннал мурад бия ЦIуссачIурттащиял шяравалу газрал ва ттукрал дузал даврил, шяраву азархана тIитIаврил, кIира километралул манзилданийсса шяравунсса машинарттал ххуллийн чани буцаврил хIакъиравусса масъалартту щаллу шаву.
— Агьалинал кIицI лавгсса масъалартту дузал бан захIматну бур диялсса арцу итакъадакьаврийн бувну. Мунияту язи бугьлан багьлай бур цалчин хьхьичI ххуттай щаллу бувансса масъалартту. ЦIанакул республикалул каялувчитурал хьхьичI бивхьусса масъаларттугу хъанай бур хьхьичIра дайдирхьусса 200-хъул социал объектру дурну къуртал даву. Машинарттал ххуллурдал хIакъиравусса масъалартту, тIурча, ми чIал къавхьуну щаллу бантIиссар, — увкунни Арслан Арслановлул.
ЛивчIми масъаларттугу лавсунни ДР-лул Минтрансэнергосвязьрал хъирив лавну дувантIисса давурттал сияхIрайн.
ЛичIиссара къулагъасравун лавсунни ЦIуссачIурттащиял шяраваллил жяматрал чулухасса масъалартту.
Ва кьини министрнал хъиривчунал кьамул унни 16 инсан.
ХIадур бувссар
И. Саидовал
