Декабрьданул 13-нний МахIачкъалаллал Кировский райондалул бакIчи СалихI Сагидовлул ва ДР-лул Мелиорациялул хозяйствалул каялувчи Залкип Кьурбановлул Октябрь революциялул каналданул (КОР) ялтту бувккун, икьрал дурну дур шикку ливневкалул канализация дуллалисса давурттив дайдишин.

ХIакьинусса кьининин КОР-данул чIарах нанисса ливневка дусса дур тIиртIуну ва мунийн бувну, му марцI даннинна ччюрк-цIинцIал дуцIлай, ял­тту щинну най, хъуннасса аварашинна дусса дур.
КаналдануцIух яхъанахъисса халкьунналгу цала ччюрк мивун дичлай, цала канализациялул бургъурду мивун буруган бувну лякъайсса бур. Масалдаран, ларгсса нюжмардий Кировский райондалул администрациялул сакин дурсса субботникрал гьантрай мива ччюрклил 10 машина («КАМАЗ») буккан бувну бур.
СалихI Сагидовлул ва Залкип Кьурбановлул ххал бувну бур Семендердайсса КОР-данул ламучIату байбивхьуну, Тарнаирданул балкалучIан бияннин­сса кIану. Шикку хьхьичIра дурну диркIсса ливневка, халкьуннал къатри дурну махъ, каналданул зумардачIан гъанну дуван багьну бур. Ялтту бувккун махъ, СалихI Сагидовлул ва Залкип Кьурбановлул икьрал дурну дур мугьлат бакъа ливневкалул бургъу баххана буллалисса хъуни­сса давуртту дайдишин. Му бихьлай байбишиннин, цIубакIрай дувантIиссар вай кIанттурдал топографиялуцIун дархIусса давурттив. Вай дурну махъ кIул хьунтIиссар ливневка ча, цукун дуллай байбишинтIиссарив. Вай давурттал манзилгу бусса бур сайки 2 километралийхсса.
СалихI Сагидовлул бусаврийну, вай давурттив дайдишин хьхьичI, вайннал тIалав­шиннарайн бувну, каналданул чIарав, гъанну, ихтиярду да­къанна дурсса къатри лекьан дуван тIий бусса бур.
— Жу цал полицейскийтуращал биянтIиссару къатри дан къадагъа диркIсса кIанттурдай ми дурсса заллухърунначIан. Гьарцаннахьхьун тапшур буван­тIиссар «зура зула хушрай лекьан дувара каналданул зуманицI дурсса къатри, чарттал чапарду» тIисса тавакъюращалсса ча­гъарду. Жу тIимур къабарча, яла жухь ихтияр ду­ссар судрайхчIин ми лекьан дуван тIалав бувансса, — буслай ур райондалул бакIчи.
Мукунма хъунмасса тавакъю буллай ур цалла райондалий­сса халкьуннахь, ду-дунийн ччюрк мадичларду, зула-зула кIичIирттаву марцIшиву дувара тIий.
ХIадур бувссар
З. АьбдурахIмановал