Декабрьданул 6-нний шагьрулул бакIчи Муса МусаевлучIа гьарца нюжмардий шайсса гьарта-гьарзасса батIаврий гьур­тту хьуну бур шаннагу райондалул бакIчитал, маслихIатчитал ва цаймигу жаваблувсса пишакартал.

З. АьбдурахIманова
БатIаву тIитIлай, Муса Мусаевлул цIуххаву дурну дур Советский ва Кировский районнал бакIчитурая, ларг­сса ххуллун кьини шагьрулул кIичIирттавух цув ялтту увккун махъ щаллу дан ккаккан дур­сса давуртту ци даражалий дур, куну. Шикку Кировский райондалул бакIчи СалихI Сагидовлул бувсун бур, бигьалагай кьини диркIнугу, хъиривмур кьинира дан ккаккан дурминнувасса чIяруми давурттив щаллу дуршиву. ЦIана, масалдаран, К4 коллекторданучIан бияннин, Тарнаирка нех марцI дуллалисса давурттив най дусса дур.
Советский райондалул каялувшиннаралгу бувсун бур цайва бивхьусса буржирдаха зий бушиву.
БатIаврий Муса Мусаевлул кIицI бувну бур, Республикалул БакIчинал хIукмулийн бувну, Къарабудахккантуллал райондалул МахIачкъала шагьрулун дуллушиву 300 гектар аьрщарал. Ванийн бувну бакIчинал амру бувну бур шагьрулул архитекторнайн ва МахIачкъалаллал Депутатътурал Мажлисрайн шагьрулул генпландалий дахханашивуртту дуван аьркиншиврия баян буллалисса чагъарду хIадур бан.
БакIчинал мукунма амру бувну бур Кировский райондалул бакIчинайн цала админист­рациялучIансса ххуллу бакьин бан ва оьвчин ва давривух гьур­тту хьун шагьрулул УЖКХ-райн ва Горзеленхозрайн.
Мукунма шикку Муса Мусаевлул кIицI бувну бур, шагьру хIадур хъанай бушиву ЦIусса шинал байрандалийнгу. ЦIанава хъуншагьрулул майданнив хъунмур елка бихьлахьисса давурттив най дусса дур. Мукунма 8 елка бишин тIий бур шагьрулул агьамми кIичIирттавугу. БакIчинал бувсун бур ларгсса шинал шагьрулул администрациялул майданнивсса хъунмур елкалучIан бувкIсса 4 азарваксса оьрчI барча бувну бивкIшиву. Гьашину умуд бусса бур вайннаярвагу чIявусса оьрчIансса личIи-личIисса тяхъашивуртту дувансса.
Байрандалул хьунийн детсадирттаву, школардай нани­сса хIадуршиннардия мукунма батIаврий бувсун бур шагьрулул КIулшивуртту дулаврил управлениялул хъунама ТIагьир Мансуровлулгу. Ятинсса 180-нния ливчусса оьрчIан пишкаш дан хIадур дурну дусса дур спорт формарду ва №4-сса гимназиялий дуклакисса мушакъатсса оьрчIан пишкаш дуван тIий бу­сса бур шагьрулул ишбажаранчитурал кумаграцIух машан ларсъсса бахшишру.
ЦIусса шинал тяхъашивуртту дувантIиссар шаннагу райондалул администрациярдай. Вайннул хъирив агьаммур тяхъашиврул балл хьунтIиссар хъуншагьрулул майданнивгу.
Гьашину шагьрулул бакI­чинал тавакъюрайну Культуралул управлениялул зузалт­рал хIадур дурну дусса дур оьрчIансса гьарта-гьарзасса программа. Декабрьданул 23-нния байбивхьуну, майданнив­сса хъунмур елкалучIа оьрчIру тяхъа буллантIиссар аниматортурал, хъунисса ссихьрал. ХIадур буллай бусса бур цIусса шинал байрандалун хасъсса, республикалул театрдал актертал ва магьирлугърал школардал дуклаки оьрчIру гьуртту­сса, мюзикл.
Мукунма шикку ххалбивгьуну бур байрандалул кьинирдай халкьуннал мюхчаншиву дуруччинсса чаранну ва цайми суаллугу.
Районнал бакIчитурайн ва хасъсса къуллугъирттайн тапшур бувну бур байраннал гьант­рай шагьрулул кIичIирттава цIинцI дукьаврил, кIичIирттаву низам дуваврил масъаларттугу цила чIумал щаллу буван.